Ezekias zyeɓ fahlii ka syee mor Dǝɓlii
1 Ne cok fĩi ah mo joŋ vǝrri, za Israel daŋ ur kalra ge yaŋ maluu pǝ sǝr Yuda daŋ, ge 'walra tǝsal mai mo vuura ɓo ka foo ɓǝ ah ge sǝŋ, ceera kpuusok masǝŋ ki ma ɗii ne Astarte ge lalle, dahra cok joŋ syiŋ daŋ ge sǝŋ, tǝkine cok juupel za gwǝǝ daŋ. Joŋra nai pǝ sǝr Yuda, sǝr Benyaamin, sǝr Efraim ne Manasse daŋ. Fahfal ah pii soora kal ge yaŋ ɓǝǝra.
2 Goŋ Ezekias rǝk za joŋzahsyiŋ ne Lewitien ne kul ɓǝǝ camcam pǝ cok ɓǝǝ na matãa, zune daŋ ne zah yeɓ mǝ ahe, ka mo joŋra syiŋ suŋwii, syiŋ ma nyi jam, ka ɗǝǝ lǝŋ ka yii Dǝɓlii, tǝkine yeɓ ma joŋ zahfah yaŋ Masǝŋ. 3 Goŋ nyi faɓal ma ka syak ah mor ka mo joŋra syiŋ suŋwii ne ko, ne zah'nan ne lil daŋ, ne syiŋ suŋwii ma ne zah'nan com 'yakke, ne mai ka fĩi mafuu mo ciŋ ɓe, mo joŋra fĩi ah ne ko, tǝkine fĩi manyeeki ah ɓǝ lai Dǝɓlii mo faa ɓǝ ah ɓo daŋ.
4 Goŋ so faa nyi za mai mo no yaŋ Jerusalem, ka mo nyira fan nyi mai mo mor nyi nyi za joŋzahsyiŋ ne Lewitien nyi ra, mor ka mo soɓra suu ɓǝǝ mor ka byak ɓǝ lai Dǝɓlii pǝsãhe. 5 Ne cok za mo laara ɓǝ ahe, za Israel daŋ nyira sor ɓǝǝ masãh ahe, bii lee kpuu vin, nǝmmi, tǝnjwǝǝre, tǝkine fakpãhpǝǝ ɓǝǝ manyeeki ahe, so nyira patǝ jemma fan mai mo jol ɓǝǝ daŋ ta. 6 Za mai mo kaara ɓo pǝ yaŋ maluu pǝ sǝr Yuda daŋ, ge nyira patǝ jemma dǝǝ ɓǝǝ ne mǝ gwii ɓǝǝra. So gera ne fan nyi mai mo nǝǝra rǝk ɓo mor Dǝɓlii Masǝŋ ɓǝǝ ta. 7 Tǝŋra gin ne fan nyi ah pǝzyil fĩi patǝ sai ahe, ŋhaa yeɓ ah syee ge pel ge i zah ne fĩi patǝ rǝŋ ahe. 8 Ne cok goŋ Ezekias ne zaluu pel ah ra mo ge kwora za mo nyi fan ɓo pǝlli naiko, joŋra osoko nyi Dǝɓlii, so joŋra nyi zan ah Israel ta. 9 Goŋ fii za joŋzahsyiŋ ne Lewitien tǝ ɓǝ fan nyi ahe. 10 Azaria dǝɓlii za joŋzahsyiŋrĩ, mai mo morsǝ̃ǝ Sadok zyii zah ah faa: Ne cok mai za mo tǝŋ ginra ne fan nyi yaŋ Masǝŋ, aru ren farel kǝ̃ǝre, ŋhaa so soɓ ɓo pǝ'man 'wa, aru lwaa fan mai daŋ nai mor Dǝɓlii ẽe zan ah ɓo.
11 So goŋ faa mo zyeɓra yaŋ rǝk fan ma ɓǝr yaŋ Masǝŋ 12 ka mo rǝkra fan nyi tǝkine patǝ jemma fan daŋ gŋ, ka mo byakra gŋ pǝsãhe. So ɓaŋra Lewitiyo ma ɗii ne Konania kan zah ahe, naa mah ah Syimai ye patǝ gwa ahe. 13 So rǝkra Lewitien manyeeki ah jemma, ka mo joŋra yeɓ ne ra, tǝɗii ɓǝǝ a naiko: Jehiel, Azazia, Nahat, Asayel, Jerimot, Jozabad, Eliel, Jismakia, Makat, ne Benaja. Za marai daŋ a joŋra yeɓ byak fan tǝgbana mai goŋ Ezekias ne pa joŋzahsyiŋ Azaria mo faara ɓǝ ah ɓo. 14 Kore we Imna Lewitiyo, mai ako ye mo swah za ma byak zahfah yaŋ Masǝŋ ma fah kǝmorcomzah'nanne, ɓaŋra ko kan ka mo nyiŋko fan nyi mai za moo gin nyira nyi Dǝɓlii, ka mo so womko fan ah nyi za ta. 15 Pǝ yaŋ maluu manyeeki ah mai za joŋzahsyiŋ mo kaara ɓo gŋ, so Kore woo Lewitien mai mo gbahra jol ah ne goŋga rǝk gŋ, zan ah Eden, Minjamin, Joswa, Semaja, Amaria ne Sekania. A womra farel nyi wee pa ɓǝǝ Lewitien zahki daŋ, tǝgbana yeɓ ɓǝǝra, 16 ka woŋra ne morsǝ̃ǝ ya. A nyira nyi za wǝǝ mai daŋ mo joŋra syii ɓo jemma sai, koo kal maiko, za mai moo gara tǝ yeɓ ɓǝǝ yaŋ Masǝŋ zah'nan daŋ tǝgbana cok ul ɓǝǝ ara mo gŋ. 17 A woora za joŋzahsyiŋ ga tǝ yeɓ ɓǝǝ ne morsǝ̃ǝre. Lewitien mai mo joŋra syii ɓo jemma gwa, wala kalle, a rǝkra ra ne kul ɓǝǝ tǝ yeɓ ɓǝǝ camcam moo joŋra. 18 Ara daŋ ŋwǝǝra tǝɗii ɓǝǝ ɓo ne ŋwǝǝ ɓǝǝ ne wee ɓǝǝ tǝkine za ɓǝǝ manyeeki ah ra daŋ, mor ka ne cok fẽene daŋ mo zyeɓra suu kaa ne ko ka joŋ yeɓ ɓǝǝra. 19 Kǝsyil za joŋzahsyiŋ ma morsǝ̃ǝ Aron mai mo kaara ɓo pǝ yaŋ ɓǝǝ maluu tǝkine cok pii fan ah ra, za mai mo ŋwǝǝra tǝɗii ɓǝǝ ɓo ŋwǝǝ no gŋ, a womra farel nyi za wǝǝ ma yaŋ za joŋzahsyiŋrĩ, tǝkine ma morsǝ̃ǝ Lewitien mai mo ŋwǝǝra tǝɗii ɓǝǝ ɓo daŋ.
20 Goŋ Ezekias joŋ fan masãh ah ne ma 'nyah suu Dǝɓlii Masǝŋ ah pǝ sǝr Yuda ne lii ah daŋ. 21 A ne pejii pǝ fan joŋ ah ra daŋ mor a joŋ yeɓ mor yaŋ Masǝŋ tǝkine mor ɓǝ lai Dǝɓlii daŋ ne goŋga ne zahzyil vaŋno wo Masǝŋ ahe.
© Bible Moundang © Alliance Biblique du Tchad, 1996.
