Lǝŋ Mosus
1 Ne cok ah Mosus ne za Israel ɗǝǝra lǝŋ mai yii Dǝɓlii ne faara:
Me ga ɗǝǝ lǝŋ yii Dǝɓlii ne mor ako cuu yǝk ah ɓe,
Woo pǝr ne za ma yee tǝl ah myah ge pǝ mabii.
2 Dǝɓlii ye pa byak ɓe, ako pǝswahe.
Ako ye pa ǝ̃ǝ ɓe.
Ako ye Masǝŋ ɓe, me ga yii ko.
Ako Masǝŋ pa ɓe, me ga sãa ko.
3 Dǝɓlii ye pa ruu salle, tǝɗii ah ye Dǝɓlii.
4 Waa muŋta sal Farao ne sooje ah ra ɓaa ge pǝ mabii.
Mabii Syẽ sǝ̃ǝ za swah sal ah maswah ahe.
5 Wea bii jǝŋ ra kǝrik,
Cwǝǝra ge mor paŋbii tǝgbana tǝsalle.
6 Dǝɓlii, jokǝsãh ɓo pǝswahe.
Dǝɓlii, jokǝsãh ɓo myah za syiŋ ɓuu ge lalle.
7 Ne swah lii ɓo mo mgbai za ma cakra mo,
Mo pee kpãh ɓo ge sye ra tǝgbana tǝndǝŋ moo syen wii.
8 Mo fee mabii ne tǝ'yak ɓo, so bii wea ge tǝki,
Bii ur uu ne ɓal na ɓaale,
Wea bii pǝ mabii joŋ pǝyakke.
9 Za syiŋ man faara: Na ga foo mor ɓǝǝ na ga dai ra.
Na ga woŋ fan ɓǝǝra, na ga faŋ val tǝ ɓǝǝra.
Na ga nǝǝ kafahe man na ga ik ra ne ko.
10 Amma Dǝɓlii, mo fee tǝ'yak ɓo, mabii jǝŋ ge tǝ ɓǝǝra,
Cwǝǝra ge mor paŋbii na vãm mayǝkki.
11 Dǝɓlii, azu ye na mo kǝsyil masǝŋ ki ra ne?
Azu ye pǝyǝk ne daŋdaŋ na mo ne?
Azu ye gak joŋ dǝǝbǝǝri ne yeɓ matǝ gǝriŋ ah na mo ne?
12 Mo ɓaŋ jokǝsãh ɓo sǝŋ, sǝr njǝk ge tǝ za syiŋ ɓuuru.
13 Ne kwan syak ɓo mo syee ne za mai mo wǝǝ ra.
Mo zaŋ ra ne swah ɓo ge cok kal ɓo matǝdaŋdaŋ ne ra.
14 Za sǝr daŋ laara ɓǝ ahe, coora coo.
Gal re za ma kaara sǝr Filistien.
15 Tǝtǝl byǝŋ za goŋ Edom ne galle.
Suu coo za swah sǝr Moaɓ.
Za ma kaara sǝr Kanaan daŋ taŋra tǝnjokki.
16 Gal re ra, suu coo ra coo,
Ka gak gaira suu ya, mor tǝ kwanra swah lii ɓo mai mo tǝ joŋni Dǝɓlii.
Uura ɓo pǝ cok ɓǝǝ ŋhaa za mai mo wǝǝ ra ɓo ge pǝ̃ǝra kalle.
17 So mo ga ne ra, mo ga rǝk ra tǝ waa mai mo nǝǝ ɓo mor cok kal ɓo Dǝɓlii,
Pǝ cok matǝdaŋdaŋ mai amo Dǝɓlii mo zyeɓ ɓo.
18 Dǝɓlii, mo kaa goŋ cẽecẽe ŋhaa ga lii ga lii.
Lǝŋ Miriam
19 Za Israel syeera pǝ mabii tǝ sǝr yakke. Amma ne cok muŋta sal Egiɓien mo syeera pǝ mabii ne pǝr tǝkine za ma yee tǝl ah daŋ, Dǝɓlii joŋ mabii ge tǝ ɓǝǝra.
20 Miriam profeto madǝwin naa mah Aron ɓaŋ yuŋ jolle, ŋwǝǝ daŋ pǝ̃ǝra ge mor ah ne yuŋ ne dǝdaa. 21 So Miriam ɗǝǝ lǝŋ nyi za Israel faa: We ɗǝǝ lǝŋ yii Dǝɓlii ne ko, mor ako cuu yǝk ah ɓe, woo pǝr ne za ma yee tǝl ah myah ge pǝ mabii.
Bii Maara
22 Mosus zaŋ za Israel gin zah mabii syẽ kal ge fah kǝsyicok Sur ne ra, syeera kǝsyicok tǝgǝǝ zah'nan sai, lwaara bii ya. 23 So ge daira Maara, amma gak zwahra bii Maara ya, mor bii ah pǝzwakke. Mor maiko ɗiira cok ah ne Maara. 24 Za kyãhra ɓǝ nyee wo Mosus, faara: Ru ga zwah fẽene? 25 So Mosus ɓyaŋ ɓǝ wo Dǝɓlii. Dǝɓlii cuu kpuu nyi ko, so ɓoo kpuu ah ge pǝ bii, bii ah joŋ pǝ'nyahre.
Daga cok ah Dǝɓlii nyi ɓǝ lai nyi ra, lii ra gŋ ta, 26 so faa: We laa zah ɓe Dǝɓlii Masǝŋ ɓii ne yella ɓe, we joŋ fan matǝ njaŋ pel ɓe ɓe, we syii sok tǝ ɓǝ lai ɓe ra, so we gbǝ ɓǝ lai ɓe ra daŋ ɓe, koo me ka kan syem mai me ik Egiɓien ne ko nyi we vaŋno ya. Mor ame ye Dǝɓlii pa wok syem ɓii masãhe.
27 Ge daira Elim, cok ah lak biikyaŋ no gŋ jemma tǝ gwa ne kpuu dabonooje gŋ jemma rǝŋ, ɗǝrra gŋ kah bii.
© Bible Moundang © Alliance Biblique du Tchad, 1996.
