Ezekiel faa ɓǝ fan mai mo tǝ ga joŋ wo za Israel
1 Dǝɓlii faa nyi me: 2 We dǝfuu, amo kaa ɓo kǝsyil za ma ŋwookyaŋ. Ara ne nahnǝnni, amma ka kwan fan a, ara ne sokki, amma ka laa ɓǝ ya, mor ra ye za ŋwookyaŋ. 3 Mor ahe, we dǝfuu, mo baŋ fan ɓo, tǝgbana dǝɓ mai mo tǝ eeni, ka mo zol gin pǝ cok mai mo gŋ ne com gǝǝ, ka za daŋ mo kwora mo ne ga cok maki ahe. Ɗah maki za ŋwookyaŋ rai a ga foora ɓǝ no ne? 4 Mo woo fan ɓo pǝ̃ǝ ne ko ne com gǝǝ tǝgbana mo tǝ eeni, ka mo kwora, mo soɓ mo ẽera mo, mo zol ne lilli, tǝgbana mo tǝ ee ga zah sǝr za ki. 5 Mo ɓaŋ fan wea yaŋ ɓo ne ko ne nahnǝn ɓǝǝra, ka mo woo faswaa ɓo pǝ̃ǝ gŋ ne ko. 6 Mo ɓaŋ faswaa ɓo kan tǝbǝǝsah ne nahnǝn ɓǝǝ ka mo ẽera, ka suŋ mo foo ɓe, mo zol ne ko, mo koo nahnǝn ɓo ne fanne, ka mo kwo cok mai mo tǝ ga gŋ ka. Fan mai mo joŋ daŋ, a ga yea na lai wo za Israel.
7 So me joŋ fan mai Dǝɓlii mo faa ɓo nyi me ka me joŋ, me wea fan ɓe ne com gǝǝ na dǝɓ mai mo tǝ ee ga ee. Ne cok lil mo joŋni, me wea yaŋ ne jolle, so cok mo fooni, me ɓaŋ faswaa ɓe kan ge tǝbǝǝsahe, me zol ne ko ne nahnǝn ɓǝǝ kalle.
8 Tǝ'nan ah ne zah'nan Dǝɓlii faa ɓǝ nyi me, 9 faa: We dǝfuu, za Israel za ŋwookyaŋ rai mo fiira mo tǝ ɓǝ fan mai mo tǝ joŋ ɓe, 10 ka mo faa nyi ra, ame Dǝɓlii Masǝŋ me tǝ faa nyi ra, ɓǝ mai a tǝtǝl dǝɓ mai mo kaa goŋ yaŋ Jerusalem ɓo, ne tǝtǝl za mai mo kaara ɓo gŋ daŋ. 11 Mo faa nyi ra, fan mai mo joŋni, a no na fan ma cuu fan mai mo tǝ ga joŋ wo ɓǝǝra, a ga woora ra kal ga pǝ byak ne ko. 12 Dǝɓ mai mo kaa goŋ ɓǝǝ ɓo, a ga ɓaŋ fan ah kan ga tǝbǝǝsah ne suŋni, a ga geera wo suu yaŋ nyi ko, ka mo pǝ̃ǝko gŋ kalle, a ga koo nahnǝn ah ne fanne, ka mo kwoko cok mai mo tǝ gako gŋ ka. 13 Amma ame Dǝɓlii, me ga saa mǝmmǝǝ gbǝ ko ne ko, so me ga Babilon ne ki, a ga wǝ gŋ bai kwan sǝr ahe. 14 Za mai mo ne ki, sooje ma byakra ko, ne za sal ah ra daŋ, me ga myah ra ga laa sǝr nai daŋ, so za ga foora mor ɓǝǝ ka ik ra pǝ wulli.
15 Ne cok me myah ra ge kǝsyil za ki pǝ sǝr za gwǝǝ ɓe, a ga tǝra, ame ye Dǝɓlii. 16 Me ga soɓ za ki kǝsyil ɓǝǝ sal ne koŋ tǝkine syem maɓe' ka ik ra ya, ka mo ge keera ɓǝ fan maɓe' ah mai mo joŋra ɓo kǝsyil za mai mo gera ɓo gŋ, so ara laŋ, a ga tǝra, ame ye Dǝɓlii.
Fan ma cuu ɓǝ suu coo profeto
17 So Dǝɓlii faa nyi me: 18 We dǝfuu, ne cok mo tǝ ren farel ɓe, mo coo ne coo, ne cok mo tǝ zwan fan ɓe, mo coo ne gal coo. 19 Ka mo so faa nyi za mapãa ah daŋ Dǝɓlii Masǝŋ faa sye, za ma kaara yaŋ Jerusalem, mai mo kaara ɓo pǝ sǝr ɓǝǝ ba, ne cok mo tǝ renra farel tǝkine zwan fan ɓe, a ga coora ne coo, tǝkine ɗuu galle. Sǝr ɓǝǝ ga ɓeɓɓe. Mor za mai mo kaara ɓo gŋ daŋ a joŋra ɓǝɓe' pǝlli. 20 Yaŋ ɓǝǝ maluu mai za mo baa ɓo gŋ kǝrkǝr daŋ, a ga ɓeɓɓe, sǝr ah ga ciŋ cok kolle, so a ga tǝra, ame ye Dǝɓlii.
Ɓǝ faa Dǝɓlii tǝ ga joŋ ga cok ahe
21 So Dǝɓlii faa nyi me faɗa: 22 We dǝfuu, za Israel a faara ɓǝ kikiŋ mai kǝsyil ɓǝǝ cẽecẽe nai mor fẽene? A faara: Cok tǝ pǝ̃ǝ ganne, ɓǝ fakwan koo vaŋno laŋ joŋ ge cok ah ya. 23 Mo faa nyi ra sye, ame Dǝɓlii Masǝŋ me ga cak ɓǝ kikiŋ ahe, ka ga faara ɓǝ kikiŋ ah kǝsyil za Israel faɗa yao. Mo faa nyi ra, jeertǝ cok ah no gin gwari, ɓǝ mai mo faa ɓo daŋ a ga joŋ baa ga cok ahe.
24 Ka ga faara ɓǝ fakwan ma lǝlǝŋ ahe, ne ɓǝ cuu ma zyak za kǝsyil za Israel yao. 25 Ame Dǝɓlii Masǝŋ, me ye ga faa ɓǝ nyi ra, so fan mai me faa ɓǝ ah ɓe laŋ, ka nǝn a, a ga joŋ. Awe za ŋwookyaŋ raino, pǝ zah'nan ɓii me faa ɓǝ ɓe, me ga joŋ ɓǝ ah ta. Ame Dǝɓlii Masǝŋ me faa naiko.
26 Dǝɓlii so faa nyi me: 27 We dǝfuu, za Israel a lǝŋra ɓǝ fakwan ɓo, ne ɓǝ mai mo faa daŋ, mo faa ɓo mor zah'nan pel pǝɗǝk ba. 28 Mo faa nyi ra, ame Dǝɓlii Masǝŋ me faa, ɓǝ mai me faa ɓo, ka nǝn ne gin joŋ ya, ɓǝ mai me faa daŋ a ga joŋ 'manna 'manna. Ame Dǝɓlii Masǝŋ me faa naiko.
© Bible Moundang © Alliance Biblique du Tchad, 1996.
