Ɓǝɓe' Israel
1 Za mana bone! Ame tǝgbana dǝɓ ma ne koŋ mai mo tǝ kyeɓ ka in zah koŋ ne lee kpuu, so lwaa lee kpuu ah tǝ kpuu mah ah ya, mor lee vin ka tǝ kpuu ah ka ren a, lee wuu masãh ah ka tǝ kpuu mah ah yao, mor ŋhǝǝra vǝr ɓe. 2 Za masãh ah kǝka pǝ sǝr ah yao. Dǝɓ ma ɗuu Masǝŋ kǝka vaŋno laŋ yao. Zune daŋ mo lwaa cok ah ɓe, kaa ɓo ne ɓal ka in wulli. Zune daŋ a saa mǝmmǝǝ pel jǝk ah ka gban ko ne ko. 3 Ara daŋ tǝra yella joŋ faɓe' ɓo. Za goŋ ɓǝǝ ne lakaali ɓǝǝ daŋ, a nyiŋra lak jol za tǝ ɓǝ kiita. Zaluu a joŋra fan mai zahzyil ɓǝǝ mo 'yahe, a ferra ɓǝ matǝ goŋga ah ferre. 4 Dǝɓ masãh tǝ pǝram ah ma kǝsyil ɓǝǝ a tǝgbana sãhmme, wala waa.
Zah'nan ah no ginni, ne cok ah Masǝŋ ga ŋgoŋ kiita tǝ za mai tǝgbana mo lai ra ne zah profetoen ah ra mo faara. Tǝtǝl ga kiŋ ra. 5 Mo gbǝ ɓǝ yǝk pa jǝk ɓo wala bai ɓo ka. Mo joŋ yella ne ɓǝ mai moo faani, koo wo mawin ɓo laŋ, mo joŋ yella ne ko. 6 Mor ne cok mai mo ga ge, wee ga kwora pa ɓǝǝ tǝgbana tǝgwĩi, wee maŋwǝǝ a ga urra ɓǝ ne ma ɓǝǝra, ŋwǝǝ macuu ah a ga kyeɓra bal ne magor ɓǝǝra, pa ma syiŋ pah yaŋ sye, a ga yea kǝsyil za yaŋ ah sǝ.
7 Amma ma ɓe, me ga ɓaŋ nahnǝn ẽe Dǝɓlii to, me ga soɓ suu ɓe wo Masǝŋ mai mo tǝ ga ǝ̃ǝ me. Masǝŋ ɓe ga laa juupel ɓe.
Dǝɓlii ge ne ǝ̃ǝre
8 Za syiŋ man ka gak syakra na ya. Ana lee ge ɓo sǝŋ, amma na ga ur sǝŋ faɗa, zǝzǝ̃ǝ mai ana pǝ cokfuu, amma Dǝɓlii ga sǝǝ cokfãi nyi na. 9 Ana joŋ faɓe' wo Dǝɓlii, amma zǝzǝ̃ǝko sai na rõm kpãh ah mo ɓaŋ ɓo. Amma fahfal ah ɓe, a ga ǝ̃ǝ na, a ga jin zyeɓ ɓǝɓe' mai mo joŋko wo mana. A ga ɓaŋ na ge pǝ cokfãi ne ko, na ga ẽe ǝ̃ǝ ah mo tǝ ga ǝ̃ǝ na ne suu mana. 10 Za syiŋ man mai moo faara nyi na Masǝŋ ɓii kŋ a kẽne, mo kwora nai ɓe, swãa ga re ra, a ga ɗuura galle, za ga dahra ra tǝgbana dǝɓ moo dǝǝ vuuri.
11 Za yaŋ Jerusalem, cok mai ka we vuu ɓaale yaŋ nyẽe ne no ginni, ne cok ah sǝr ɓii ga yea pǝ'manne. 12 Za ɓii ga pii soora gin cok camcam ge, daga sǝr Asiria nǝfah kǝmorcomzah'nanne, daga fah sǝr Egiɓ nǝfah morkǝsǝŋ, daga pǝ sǝr ma kah bii ah ra tǝkine ma tǝwaa pǝɗǝkki. 13 Amma sǝr daŋ ga ciŋ kǝsyicok kolle mor ɓǝɓe' mai za ma kaara gŋ moo joŋra.
Dǝɓlii kwo syak tǝ za Israel
14 Dǝɓlii, mo ciŋ pakǝpii za ɓo mai mo syen ra ɓo. Mor kaara ɓo kǝsyicok pǝ cok mai sǝr masãh ah mo ryaŋ ra ɓoo ɓo kǝsyilli. Mo pii ra tǝwom pǝ cok masãh ah ma Basan ne ma Giliat tǝgbana mai moo joŋ ne ra ɓaaɓe.
15 Dǝɓlii, mo joŋ dǝǝbǝǝri mor ɓuu tǝgbana mo joŋ ne cok zah'nan ma kǝpel mo zaŋ za ɓo pǝ̃ǝ gin sǝr Egiɓ ne ko, 16 ka za ki mo kwora ɓe, swãa mo re ra, tǝtǝl mo jin ra ne swah ɓǝǝ mo ne daŋ. A ga coora jol ga zah ɓǝǝra, a ga coora jol ga sokki. 17 A ga kwakra ɓǝr tǝ sǝr tǝgbana soo. A ga pǝ̃ǝra gin ɓǝr yaŋ ɓǝǝ ma ne fan sal ge lal ne suu cocoo. A ga gera wo Dǝɓlii Masǝŋ man a ga ɗuura gal pel ahe.
18 Dǝɓlii, Masǝŋ maki ah na mo kǝka. Amo rõm faɓe' za ɓo mai mo coŋra ɓo sǝŋ. Mo ka kaa ne kpãh ga lii ya, amma mo tǝ cuu 'yah ɓo malii mai mo ne nyi ru. 19 Mo ga kwo syak tǝ ɓuu faɗa. Mo ga dah ɓǝɓe' ɓuu ru joŋ wo ɓo ga sǝŋ ne ɓalle, mo ga woo myah ga pǝ paŋbii maɗǝkki. 20 Mo ga cuu ɓǝ sãh ɓo tǝkine 'yah lii ɓo mo ne nyi za ɓo Israel morsǝ̃ǝ Abraham tǝgbana mai mo faa ɓǝ ah ɓo nyi pa ɓuu lii ra daga ɓaaɓe kŋ.
© Bible Moundang © Alliance Biblique du Tchad, 1996.
