David re yaŋ Rabba
(2 Sa 12:26-31)1 Na tǝ'nanki ah ne cok zah bam mai za goŋ moo pǝ̃ǝra ruu sal ne ko, Joaɓ woo za sal ge ɗaŋ sǝr Ammon ne ko, ge ryaŋra yaŋ Rabba, ka David kaa mǝ ah ɓo yaŋ Jerusalem. Joaɓ ruu sal ne yaŋ Rabba, ɓeɓ yaŋ ahe. 2 Masǝŋ Ammonien ma ɗii ne Molok a ne njok ma ne vãm kaŋnyeeri, yǝk njok ah nǝn kilo jemma sai tǝtǝl dappe, tǝsal mai lee ah moo yea pǝgaɓ a no tǝ njok ah ta. David ɓaŋ maa ge tǝ njok mǝ ahe. David woo fan ma lwaa zah sal yaŋ ah pǝlli ta. 3 So nĩi za yaŋ ah pǝ̃ǝra ge lalle, joŋ za ki na za sǝǝ kpuu, za ki na za ma ŋgom vãmme. Joŋ nai ne za ma yaŋ maluu pǝ sǝr Ammon daŋ. So ako ne zan ah daŋ pii soora kal ge yaŋ Jerusalem.
Ruura sal ne Filistien
(2 Sa 21:15-22)4 Fahfal ah ruura sal ne Filistien Gezar. So Sibbekai ma Huska i dǝɓ mawah ma ɗii ne Sippai pǝ wulli, so Filistien ɗuura kalle. 5 So ruura sal maki ah ne Filistien kpǝ, Elkanan we Jair i Lami naa mah Goliat ma yaŋ Gat pǝ wulli, dǝɓ ah kǝ̃r zǝǝ ah tǝgbana kpuu kaŋ mbǝro. 6 Ruura sal maki ah yaŋ Gat faɗa. Dǝɓ ki no gŋ a pǝwahe, a ne tǝwee jol yea yea ne ma ɓal daŋ. Dǝɓ ah morsǝ̃ǝ za mawah ah matãa ra yo. 7 Tǝǝ za Israel, so Yunatan we Syimma naa mah David i ko pǝ wulli.
8 Za marai David ne zan ah mo ik ra pǝ wulli, morsǝ̃ǝ za mawah ah ma yaŋ Gat ye ra.
© Bible Moundang © Alliance Biblique du Tchad, 1996.
