Za mǝ Dǝɓlii
(Pǝ̃ǝ 34:11-16)1 Dǝɓlii Masǝŋ ɓii ga zaŋ we ga pǝ sǝr mai we tǝ ga re ne ko, a ga nĩi za pǝlli pǝ sǝr ah ga lalle. We tǝ syee ga ɓe, a ga nĩi zahban camcam rǝŋ mai mo kalra we ɓo ne pãa ne swah daŋ pel ɓiiri: Hetien, Girgasien, Amorien, Kanaanien, Perisien, Hevien, ne Jebusien. 2 Ne cok Dǝɓlii Masǝŋ ɓii mo ge soɓ za mai ge jol ɓii we kaa kacella tǝ ɓǝǝ ɓe, ka we ik ra daŋ pǝ wulli. We gbǝ zah ne ra ka, we kwo syak tǝ ɓǝǝ ka ta. 3 We woo wee ɓǝǝ maŋwǝǝ kan ka. We soɓ wee ɓii maŋwǝǝ kan wee ɓǝǝ mawǝǝ ka ta. 4 Mor a ga kǝǝra wee ɓii a soɓra Dǝɓlii, a ga syeera mor masǝŋ ki ra, so Dǝɓlii ga ɓaŋ kpãh tǝ ɓii a ga vǝr we gwari nai sǝ. 5 We hah cok joŋ syiŋ ɓǝǝ ge sǝŋ, we dah masǝŋ ki ɓǝǝ ra ma ne tǝsal ge lalle, we cee masǝŋ ki ɓǝǝ ra mai mo kpuu yo ge sǝŋ, we syak masǝŋ ɓǝǝ ra ne wii. 6 We joŋ naiko, mor awe ye mǝ Dǝɓlii Masǝŋ ɓiiri. Nǝǝ we ɓo gin kǝsyil za sǝr daŋ, ka we ciŋ za mǝ ahe.
7 Dǝɓlii 'yah we ɓo, nǝǝ we, ka mor we kal za maki ah ra ne pãa ɓe ya, awe pǝlaŋ kǝsyil za sǝr daŋ. 8 Amma Dǝɓlii 'yah we ɓo, mor a 'yah ka baa ɓǝ mai mo faa ɓo nyi pa ɓii lii ra ga cok ahe. Mor ah ǝ̃ǝ we ne swah ah malii mo ne ko, wǝǝ we gin pǝ byak jol goŋ sǝr Egiɓ. 9 We yaŋ ka, Dǝɓlii Masǝŋ ɓii ako ye Masǝŋ to, ako ye Dǝɓ tǝ goŋga. A ga byak ɓǝ gbanzah ah mo gbǝ ɓo, a ga cuu 'yah ah mo ne wo za ma 'yahra ko, tǝkine syee mor ɓǝ lai ah ra, ŋhaa a dai zahŋhǝǝtǝ̃ǝ ujenere. 10 Amma ka ga gbǝ rol ne ŋgoŋ kiita tǝ za ma syiŋra ko ya. 11 Zǝzǝ̃ǝko, we syee mor ɓǝ mai me faa ɓo nyi we, tǝkine ɓǝ lai mai daŋ me nyi ɓo nyi we tǝ'nahko.
Eẽ Masǝŋ tǝ ɓǝ laa zahe
(CuuƁ 28:1-14)12 We laa ɓǝ lai marai we so syee mor ah ne goŋga ta ɓe, Dǝɓlii Masǝŋ ɓii a ga joŋ ɓǝ gbanzah ah mo gbǝ ɓo ne we, a ga cuu 'yah ah mo ne nyi we, tǝgbana mai mo faa ɓo nyi pa ɓii lii ra. 13 A ga 'yah we, a ga ẽe we, ka we ɓoo pǝpãare, so we bem wee pǝlli. A ga ẽe 'wah ɓiiri, ka we lwaa sor ne lee kpuu vin tǝkine nǝmmi. A ga ẽe we, a ga nyi dǝǝ ne gwii nyi we pǝlli. A ga nyi fan marai daŋ nyi we pǝ sǝr mai mo faako ɓǝ ah nyi pa ɓii lii ra, zye ga nyi nyi we. 14 Za sǝr daŋ mai ẽe moo ga yea tǝtǝl ah na we ka ga yea ya. Masoo ka ga yea kǝsyil ɓii wala kǝsyil faɓal ɓii ra ya. 15 Dǝɓlii ga byak we wo syem daŋ. Ka ga pee syem maɓe' camcam mai we kwo sǝr Egiɓ ge tǝ ɓii ya, amma a ga pee syem ah ra daŋ ga tǝ za syiŋ ɓii ra. 16 We vǝr za mai daŋ Dǝɓlii Masǝŋ ɓii mo soɓ ra ge mor jol ɓiiri, we kwo syak tǝ ɓǝǝ ka. We juupel wo masǝŋ ɓǝǝ ra ka, mor a ga yeara wo ɓii na mǝmmǝǝ.
17 We faa sõone za mai kalra we ne pãa ɓe, we ka gak nĩi ra ya ka. 18 We ɗuu gal ɓǝǝ ka. We foo ɓǝ fan mai Dǝɓlii Masǝŋ ɓii mo joŋ wo goŋ sǝr Egiɓ, ne wo zan ah daŋ. 19 We foo ɓǝ bone magaɓ camcam mai we kwo ne nahnǝn ɓiiri, dǝǝbǝǝri ne yeɓ matǝ gǝriŋ ah ne ma'man ah ra tǝkine yeɓ maswah ah ra mai Dǝɓlii Masǝŋ ɓii mo joŋ wǝǝ we ne ko. A ga vǝr za mai daŋ we tǝ ɗuu gal ɓǝǝ zǝzǝ̃ǝko, tǝgbana mai mo vǝr za sǝr Egiɓ ta. 20 A ga pee ɗuu gal ge kǝsyil ɓǝǝra, ka vǝr za mai mo ɗuura ǝ̃ǝ mo ge mokra suu ɓǝǝ ɓo. 21 We ɗuu gal za mai ka, Dǝɓlii Masǝŋ ɓii a no ne we, ako ye Masǝŋ mayǝk mai mo nǝn ɗuu gal ah to. 22 Nje nje, a ga nĩi za mai daŋ pel ɓiiri, we ka ga vǝr ra gwari nai sǝ ya. We kal nĩi ra gwari sǝ ɓe, fafyãh cok a ga ɓoo pǝpãare, a so gaɓra we. 23 Dǝɓlii Masǝŋ ɓii a ga soɓ za syiŋ ɓii ga mor jol ɓiiri, a ga joŋ ra ɗuu gal ŋhaa sai ka vǝr ra tǝɗe' ɓe. 24 A ga soɓ za goŋ ɓǝǝ ga mor jol ɓiiri, ka we ik ra pǝ wul ka tǝɗii ɓǝǝ mo vǝr gin wo sǝrri. Koo dǝɓ vaŋno ka gak uu pel ɓii ya, we ga vǝr ra daŋ. 25 We syak masǝŋ ɓǝǝ ra ne wii, we cwaa vãm solai wala vãm kaŋnyeeri mai mo no wo masǝŋ ah ra ka, we woo laŋ ka kaa ne mor suu ɓii ka. We kal woo ɓe, ka ɓǝ ah a pǝɓe'. Mor Dǝɓlii syiŋ ɓǝ masǝŋ ki ra ɓo syiŋ. 26 We woo masǝŋ ki ah ra koo mafẽene ah ge yaŋ ɓii ne ka, mor ka tǝkẽawãk mai mo tǝ masǝŋ ah ra mo pii soo ge tǝ ɓii ka. We syiŋ ɓǝ masǝŋ ki ah tǝkine syẽa ɓǝ ahe, mor tǝkẽawãk Dǝɓlii tǝtǝl ɓǝǝra.
© Bible Moundang © Alliance Biblique du Tchad, 1996.
