Za syiŋ ma fahsǝŋ
1 Ne syii patǝ nai ah Jojakim we Josias mo kaa goŋ sǝr Yuda ɓo, Dǝɓlii faa ɓǝ nyi Jeremias tǝ za sǝr Yuda daŋ. Ka syii patǝ vaŋno ah Nebukanezar mo kaa goŋ sǝr Babilon ɓo yo. 2 Jeremias faa nyi za sǝr Yuda ne za ma kaara yaŋ Jerusalem daŋ: 3 Daga syii jemma tǝtǝl sai Josias we Amon mo kaa goŋ Yuda ɓo, ŋhaa ge dai tǝ'nah syii jemma gwa tǝ sai. Dǝɓlii a faa ɓǝ nyi me, so me laŋ me faa ɓǝ mai mo faako nyi me daŋ nyi we. Amma we ka zyii ɓaŋ syiŋ ɓǝ ah ya. 4 Dǝɓlii a pee za yeɓ ah profetoen gin wo ɓiiri, amma we ka zyii laa ɓǝ ah wala ɓaŋ syiŋ ah ya. 5 A faara nyi we, we soɓ fahlii ɓe' ɓii tǝkine fan maɓea ah mai wee joŋni, ka we kaa pǝ sǝr mai Dǝɓlii mo nyi we ne pa ɓii lii ra ka we yea ne ga lii. 6 A faara nyi we, we juupel wo masǝŋ ki ra tǝkine joŋ mor ɓǝǝ ka, we kǝǝ Dǝɓlii ɓaŋ kpãh ne juupel wo masǝŋ ki mai we zyeɓ ra ne jol ɓii ka. We tǝ laa zah Dǝɓlii ɓe, ka ga ŋgoŋ kiita tǝ ɓii ya. 7 Amma Dǝɓlii ne suu ah faa we zyii ka laa ɓǝ faa ah ya, jeertǝ we joŋ ko ɓaŋ kpãh ne ɓǝ masǝŋ ki ɓii ra, we 'nam kiita ah gin tǝ suu ɓii ne ko.
8 So Dǝɓlii ma ne swah daŋ faa: We zyii ka laa ɓǝ faa ɓe ya. 9 Mor ah me ga ɗii za ma fahsǝŋ daŋ, tǝkine dǝɓ yeɓ ɓe Nebukanezar goŋ sǝr Babilon, me ga zaŋ ra ge ne ka gin ruu sal ne sǝr mai ne za ma kaara gŋ tǝkine za mai mo ryaŋra ɓo daŋ. Me ga vǝr ra tǝɗe', me ga joŋ ra na fan ma ren njẽa ah ne fan mai za moo wetǝwel tǝl ahe, sǝr ɓǝǝ ga ciŋ gboŋ ga lii ga lii. Ame Dǝɓlii me faa naiko. 10 Me ga yea zah lǝŋ ɓǝǝ mo tǝ ɗǝǝra 'nyah suu ne tǝkine laa pǝ'nyahre, me ka ga laa kyaŋ za ma ɓaŋ ŋwǝǝ wala ɓaŋ wǝǝ ya, me ka ga laa cii nin laŋ sum ya. Me ga rum pitǝrla ɓǝǝ ta. 11 Sǝr mai daŋ a ga ciŋ gboŋ ne cok kolle, zan ah daŋ a ga joŋra byak nyi goŋ sǝr Babilon syii jemma jemma rǝŋ. 12 So fahfal ah me ga ŋgoŋ kiita tǝ goŋ Babilon ne zan ah mor faɓe' ɓǝǝra, me ga ɓeɓ sǝr ma ɓǝǝ ta, a ciŋ gboŋ ga lii ga lii. Ame Dǝɓlii me faa naiko. 13 Me ga ŋgoŋ kiita tǝ za sǝr Babilon ne fan mai ɓǝ ah mo ŋwǝǝ pǝ ɗerewol maiko, so Jeremias mo faa ɓǝ ah ɓo ka ɓǝǝra. 14 Za sǝr pǝlli tǝkine za goŋ maluu daŋ a ga joŋra ra na byakke, me ga faŋ val ɓǝ fan mai mo joŋra daŋ tǝtǝl ɓǝǝra.
Kiita Masǝŋ mo ŋgoŋ tǝ zana
15 Dǝɓlii Masǝŋ Israel faa nyi me: Tahsah mai bii lee kpuu vin kpãh ɓe mo baa ɓo gŋ cyõ nyẽeno, mo ɓaŋ ka mo ge nyi nyi za mai me pee mo ga wo ɓǝǝ daŋ ka mo zwahra. 16 Ne cok mo zwǝra ɓe, a ga coora coo, tǝtǝl ga jin ra, mor sal mai me pee ge ɓo tǝ ɓǝǝra.
17 So me nyiŋ tahsah ah gin jol Dǝɓlii me ge nyi nyi za mai Dǝɓlii mo pee me ɓo wo ɓǝǝ ne daŋ ka zwanne. 18 Ame nyi nyi yaŋ Jerusalem ne yaŋ maluu sǝr Yuda ne za goŋ ɓǝǝ tǝkine zaluu ɓǝǝ daŋ zwǝ, ŋhaa za syiŋ ɓǝǝ ge ɗaŋra sǝr ah ciŋ gboŋ ne cok makol ahe, tǝkine cok ma ren njẽa ah mai za moo wetǝwel tǝl ahe. Za ga tǝǝra tǝɗii ɓǝǝ tǝgbana ma tǝ'nahko.
19 Me nyi tahsah ah nyi Farao goŋ sǝr Egiɓ ne za yeɓ ah ne zaluu ah ra ne za sǝr Egiɓ tǝkine za gwǝǝ mo gŋ daŋ zwǝ. 20 Me nyi za goŋ sǝr Us daŋ, ne za goŋ yaŋ maluu sǝr Filistien: Askalon, Gaza, Ekron tǝkine za mai mo coŋra ɓo Asdod daŋ, 21 ne za Edom, Moab ne Ammon, 22 ne za goŋ sǝr Tirus ne Sidon, ne za goŋ ma pǝ sǝr ma kah mabii Mediterrania daŋ, 23 ne za yaŋ maluu ma ɗii ne Dedan, Tema ne Bus tǝkine za mai daŋ moo cenra ɓal pyaŋ ɓǝǝra, 24 ne za goŋ sǝr Arabia, tǝkine za goŋ zahban mai daŋ mo kaara ɓo kǝsyicokki, 25 ne za goŋ Zimri, ne za goŋ Elam ne za goŋ Media daŋ, 26 tǝkine za goŋ ma fahsǝŋ mai mo pǝɗǝk ne mai mo gwari daŋ, zwahra ne patǝtǝlli. Zahban wo sǝr daŋ ga zwǝra tahsah ahe. Fahfal ah lii goŋ sǝr Babilon ga zwǝ.
27 So Dǝɓlii faa nyi me: Mo faa nyi za sye, ame Dǝɓlii Masǝŋ Israel ma ne swah daŋ me faa, mo zwǝra ka mo tǝǝra ne mo zwǝǝra zah ŋhaa mo leara ge sǝŋ ka mo gak urra sǝŋ ka, jol sal mai me tǝ ga pee gin tǝ ɓǝǝra. 28 Mo zyii ka nyiŋra tahsah ah jol ɓo ka zwan a ɓe, ka mo faa nyi ra: Dǝɓlii ma ne swah daŋ faa: Sai we zwǝ. 29 Me ga tǝŋ ɓeɓ fan sye gin tǝ yaŋ ma syak ɓe sǝ. Ɗah lǝŋra ɓo kiita ka ga lwaa ra ya ne? Ka nai ya, a ga lwaara kiita, mor me tǝ ga pee sal ge tǝ za ma kaara wo sǝr daŋ. Ame Dǝɓlii ma ne swah daŋ me faa naiko.
30 Amo Jeremias, mo faa ɓǝ mai daŋ me faa ɓo, mo faa nyi zai sye: Dǝɓlii tǝ ga haŋ daga coksǝŋ, a ga faa ɓǝ daga coksǝŋ pǝɗǝkki, a ga ɓyaŋ ɓǝ tǝ zan ahe, a ga ɓyaŋ ɓǝ tǝgbana dǝɓ ma ŋhǝǝ bii lee kpuu vin. Koo zune mo wo sǝr daŋ a ga laa kyaŋ ahe. 31 Cii ah a cii ga dai zahtǝmgboo sǝrri, mor Dǝɓlii tǝ joŋ ɓǝ faa ne za sǝrri. A ga ŋgoŋ kiita tǝ za daŋ, a ga ik za maɓea ah pǝ wulli. Dǝɓlii faa ɓo naiko.
32 Dǝɓlii ma ne swah daŋ faa: Ɓeɓ ga ge tǝ za sǝr vaŋno vaŋno daŋ. Zyak mǝǝzuwuŋ ma'man ah ga ur gin cok maɗǝk ah zahtǝmgboo sǝr ge. 33 Ne zah'nan ah wul za mai Dǝɓlii moo ga ikki, a ga myah tǝ sǝr ŋhaa ga dai zahtǝmgboo sǝr daŋ. Koo dǝɓ vaŋno ka ga yeyee wul ɓǝǝr a, za ka ga woora wul ɓǝǝ laŋ ka cii ya ta, wul ɓǝǝ ga yea tǝ sǝr na zãa nooko.
34 Zaluuri, we ɓyaŋ ɓǝ, we ɓyaŋ ɓǝ ne kyaŋ lii, we yeyee we hǝr tǝ sǝr ne ko. Mor zah'nan ŋgom ɓii ge ɓe, we ga dah tǝgbana cii ma lee syem ah ra. 35 Zaluu ma pel za ka ga lwaara fahlii ka ɗuu ǝ̃ǝ ya. 36-37 A yera yee pǝ bone tǝkine 'meere, mor Dǝɓlii ɓaŋ kpãh ɓeɓ za ɓǝǝ ne ko, soɓ sǝr ɓǝǝ matǝ jam kŋ ɓo na gboŋni. 38 Dǝɓlii soɓ zan ah ɓoo tǝgbana ɓol moo pǝ̃ǝ soɓ yii ahe. Gal sal tǝkine kpãh Dǝɓlii joŋ sǝr ah ciŋ cok kolle.
© Bible Moundang © Alliance Biblique du Tchad, 1996.
