Dǝɓlii ga kaa goŋ tǝ sǝr daŋ
1 Zah'nan ah no ginni, waa mai yaŋ Masǝŋ mo uu ɓo gŋ, a ga yea pǝwah kal waa daŋ. Za sǝr camcam a ga gera wo waa ahe. 2 A ga faara: Na yee ge tǝwaa Dǝɓlii, pǝ yaŋ Masǝŋ Israel, na ge fee ɓǝ fan mai mo 'yahko ka na joŋ, na ga syee tǝ fahlii mai ako ye mo nǝǝ ɓo.
Fan cuu Dǝɓlii mo tǝ cuu ur gin Jerusalem ge. Faa ɓǝ daga Sion ge nyi zan ahe. 3 A ga wahl bal kǝsyil za sǝr camcam daŋ, a ga wahl bal ma kǝsyil sǝr maswah ah ra mai mo gwari ne maɗǝk ah daŋ. A ga woora fan sal ɓǝǝ coo kpãh ne ko, a ga woora zǝǝ ɓǝǝ coo fan yii fãa ne ko. Za ka ga ruu sal faɗa yao, ka ga zyeɓra suu ka ruu sal ao. 4 Dǝɓlii ma ne swah daŋ faa: Koo zune daŋ a ga kaa mor kpuu vin ah ra tǝkine kpuu wuu ah jam. Dǝɓ ma ga joŋ ko ɗuu gal ka yea yao.
5 Za sǝr camcam a ga juura pel wo masǝŋ ɓǝǝ tǝkine syee mor ɓǝǝra. Amma ma man na ga juupel wo Dǝɓlii Masǝŋ man tǝkine syee mor ah ga lii ga lii.
Za Israel ga pii soora pǝ byak ginni
6 Dǝɓlii faa: Zah'nan ah no ginni, ne cok ah me ga tai za mai me ŋgoŋ kiita ɓo tǝ ɓǝǝ mo tǝ laara bone pǝ byak ɓǝǝ ge ne ko. 7 Ara ye lemme, ara pǝɗǝk ne sǝr ɓǝǝra, amma me so ga zyeɓ ɓǝ mafuu ah ne ra, a ga ciŋra zahban ma'man ahe. Ne cok ah me ga kaa goŋ tǝ ɓǝǝ tǝwaa Sion ga lii.
8 Amo Jerusalem mai Masǝŋ mo yea tǝ byak zan ah gŋ, mo ga ciŋ yaŋ goŋ malii mai mo yea katãako. 9 Amo yeyee ne kyaŋ lii mor fẽene? Amo tǝ laa bone tǝgbana mawin mai mo kaa byaŋ ɓo mor fẽene? Goŋ kǝka kǝsyil ɓii yao ne? Za ma gbah jol ɓii wukra ɓe ne? 10 Za yaŋ Jerusalem, we laa bone, we 'mee tǝgbana mawin mai mo kaa byaŋ ɓo, mor zǝzǝ̃ǝ mai we ga pǝ̃ǝ gin yaŋ nyẽeko, we ga kaa kǝsyicokki. We ga sǝr Babilon. Amma Dǝɓlii ga wǝǝ we gŋ comki, a ga ǝ̃ǝ we jol za syiŋ ɓiiri.
11 Za sǝr camcam a taira ki ka ruu sal ne we. A faara: Yaŋ Jerusalem ga ɓeɓɓe, ru ga kwo gboŋ ahe. 12 Amma za mai a ga faara nai mor tǝra ɓǝ mai Dǝɓlii mo foo ɓo ya. Tǝra sõone Dǝɓlii tai ra ɓo nai ka ŋgoŋ kiita tǝ ɓǝǝ tǝgbana dǝɓ moo tai sor ga tǝki ka ɗuuni, tǝra ya.
13 Dǝɓlii faa: Awe za yaŋ Jerusalem, we ge ŋgoŋ kiita tǝ za syiŋ ɓii o. Me ga joŋ we pǝswah tǝgbana ŋgǝǝri, me ga nyi ciŋ vãm nyi we tǝkine fyãh ɓol pǝyak tǝgbana vãm syẽ, we ga ik za sǝr camcam pǝlli, joŋ mai mo lwaara ɓo daŋ a ga ciŋ ma ɓe Dǝɓlii sǝr daŋ.
© Bible Moundang © Alliance Biblique du Tchad, 1996.
