EZRA 8 - Bible Moundang (MUA)

Za ma pǝ byak piira soo

1 Marai pãa zaluu ma morsǝ̃ǝ za camcam, mo yeara pǝ byak pǝ sǝr Babilon, mo so pii soora ge ɓo yaŋ Jerusalem ne Ezra yo. Ne cok ah ka Artaserses ye kaa goŋ ɓo.

2-14 Gersom, daga morsǝ̃ǝ Fineas. Daniel, daga morsǝ̃ǝ Itamar. Hatus we Sekania, daga morsǝ̃ǝ David. Zakarias, daga morsǝ̃ǝ Paros, a ne za 150 mai tǝɗii ɓǝǝ mo ŋwǝǝ ɓo. Eljonai we Zeraja, daga morsǝ̃ǝ Pakat-Moab, a ne za 200. Sekania we Jahaziel, daga morsǝ̃ǝ Zattu, a ne za 300: Ebed we Yunatan, daga morsǝ̃ǝ Adin, a ne za 50: Jesaia we Atalia, daga morsǝ̃ǝ Elam, a ne za 70: Zebadia we Mikal, daga morsǝ̃ǝ Sefatia, a ne za 80: Obadias we Jehiel, daga morsǝ̃ǝ Joaɓ, a ne za 218. Selomit we Josifia, daga morsǝ̃ǝ Bani, a ne za 160. Zakarias we Bebai, daga morsǝ̃ǝ Bebai, a ne za 28. Johanan we Hakatan, daga morsǝ̃ǝ Asgad, a ne za 110. Elifelet, Jiel, ne Semaja, daga morsǝ̃ǝ Adonikam, a ne za 60. So Utai ne Zakkur, daga morsǝ̃ǝ Bigvai, ara ne za 70.

Ezra lwaa Lewitien ka joŋ yeɓ yaŋ Masǝŋ

15 Ezra faa: Ame tai za daŋ kah el mai bii ah moo ɗuu ga kah yaŋ Ahava, aru ɗǝr gŋ zah'nan sai. Me kwo za pãa ne za joŋzahsyiŋ daŋ ara no, amma Lewitien kǝka gŋ ya. 16 So me pepee ɗii zaluu doraŋ: Eliezar, Ariel, Semaja, Elnatan, Jariɓ, ne Elnatan maki ahe, Natan, Zakarias, ne Mesulam, tǝkine za cuu fan gwa: Jojariɓ ne Elnatan. 17 Me pee ra kal ge wo Iddo, dǝɓlii ma pel za mai mo yaŋ Kasifia, mor ka faa nyi ko ne za mai moo joŋra yeɓ yaŋ Masǝŋ, mo peera za ge nyi ru, mor ka joŋ yeɓ yaŋ Masǝŋ. 18 Masǝŋ joŋ gboŋgboŋ wo ɓuu so peera Serebia dǝɓ ma ne tǝtǝl ge nyi ru, Lewitiyo ma morsǝ̃ǝ Makli yo, ge ne wee ah tǝkine wee pah ah daŋ jemma tǝtǝl nama. 19 So peera Haskabia, ne Jesaia daga morsǝ̃ǝ Merari, ara ne wee ɓǝǝ daŋ joŋ jemma gwa. 20 So peera za ma joŋ yeɓ yaŋ Masǝŋ ge 220, zan ah goŋ David ne zaluu pel ah ye rǝk pa ɓǝǝ lii ra ka mo gbahra jol Lewitien ne yeɓɓe. Ŋwǝǝra ɗii ɓǝǝ ɓo ŋwǝǝre.

Ezra faa nyi za mo syẽera fan tǝkine juupelle

21 Ka ru kah el Ahava ba, me faa nyi za daŋ: Na syẽe fanne, tǝkine wonsuu pel Masǝŋ ka na fii ko, ka mo syeeko ne na, mo byak na ne wee man tǝkine fan man daŋ jam. 22 Swãa cak me ne fii goŋ ka mo nyiko sooje ne za pǝr nyi ru ka byak ru wo za syiŋ ɓuu tǝ fahlii. Mor me faa nyi ko: Masǝŋ ɓuu ga ẽe za mai daŋ mo soɓra suu ɓǝǝ ɓo wol ahe, amma a ga ŋgoŋ kiita tǝ za mai daŋ mo soɓra ko ɓo. 23 Mor ahe, ru syẽe fan tǝkine juupel wo Masǝŋ ka mo byakko ru, so Masǝŋ laa juupel ɓuuru.

Nyira fan mor yaŋ Masǝŋ

24 So me syen za kǝsyil za joŋzahsyiŋ maluuri: Serebia, ne Haskabia, ne za ki gŋ jemma. 25 Me so lii vãm solai, ne vãm kaŋnyeeri, ne fan manyeeki ah mai goŋ ne zaluu ma gbah jol ah ne zaluu tǝsal ɓǝ tǝkine za Israel daŋ mo nyira mor joŋ yeɓ yaŋ Masǝŋ, me nyi nyi za joŋzahsyiŋrĩ. 26-27 Fan mai me nyi nyi ra a naiko: Me nyi vãm solai nyi ra kilo 20.000, fan yeɓ ma vãm solai temere, tai daŋ a nǝn kilo 3.000, ma vãm kaŋnyeeri nǝn kilo 3.000, ne fazwan fan ma vãm kaŋnyeeri jemma gwa yǝk ah nǝn kilo 8, tǝkine tahsah ma ɓaŋ ne vãm syẽ mai moo sǝsãh gwa. A pǝsyem tǝgbana vãm kaŋnyeeri ta .

28 Me faa nyi ra: Nǝǝra we rǝk ɓo mor Dǝɓlii Masǝŋ pa ɓii ra, so fan ma vãm solai mai ne ma vãm kaŋnyeeri daŋ nyira ɓo mor Dǝɓlii. 29 We byak fan ah ra pǝsãhe, ka we ge lii fan ah ra pel zaluu za joŋzahsyiŋrĩ, ne Lewitien, ne zaluu ma morsǝ̃ǝ Israel daŋ, mor ka mo rǝkra ge ɓǝr yaŋ maki ah pǝ yaŋ Masǝŋ yaŋ Jerusalem. 30 So za joŋzahsyiŋ ne Lewitien nyiŋra vãm solai ne vãm kaŋnyeeri, ne fan manyeeki ah ra, ka ga yaŋ Masǝŋ yaŋ Jerusalem ne ko.

Ge daira yaŋ Jerusalem

31 Ne fĩi patǝ vaŋno, ne zah'nan jemma tǝtǝl gwa ah ru ur gin kah el Ahava ne ka ga yaŋ Jerusalem. Dǝɓlii no ne ru, byak ru tǝ fahlii wo za syiŋ ɓuu ne za mai moo kaara fuu ɓuuru. 32 Ne cok ru ge dai yaŋ Jerusalem, ru kaa 'yak zah'nan sai. 33 Amma ne zah'nan patǝ nai ah ru ur kal ge yaŋ Masǝŋ, ru ge lii vãm solai ne vãm kaŋnyeeri, ne fan manyeeki ah ra, ru nyi nyi pa joŋzahsyiŋ Merimot we Urias, ka Eleasar we Fineas ne Lewitien gwa: Jozabad we Joswa, ne Noadia we Binwi no ne ki. 34 Keera fan ah ra, so liira daŋ. So ŋwǝǝra pãa ah daŋ.

35 Ne cok ah za mai mo pii soora gin pǝ byak ge daŋ, nyira faɓal mor ka joŋ syiŋ suŋwii ne wo Masǝŋ Israel. Nyira ŋgǝǝri jemma tǝtǝl gwa mor za Israel daŋ, kǝbǝr jemma doraŋ tǝtǝl yea, wee pǝsǝ̃ǝ jemma rǝŋ tǝtǝl rǝŋ, kǝdai jemma tǝtǝl gwa. Fan marai daŋ a mor ka joŋ syiŋ suŋwii ne wo Dǝɓlii, ka vãh faɓe' ɓǝǝ ga lalle. 36 So ɓaŋra ɗerewol ɓǝ lai mai goŋ mo nyi nyi ra, nyira nyi govener ra, ne zaluu ma fahfal ɓǝǝ pǝ sǝr ma morcomlil kah el Efrat. So zai laŋ gbahra jol zana, tǝkine ɓǝ yeɓ yaŋ Masǝŋ daŋ.