Haozah woli
1 Ame Paulus, papee Yesu Kristu tǝgbana 'yah Masǝŋ mo 'yah ɓo, pee me ka cuu ɓǝ ma lwaa cee mai mo faa ɓǝ ah ɓo, na ne ko ne tai ki ne Yesu Kristu, 2 me ŋwǝǝ leetǝr mai wo ɓo we 'yah ɓe Timoteus.
Masǝŋ Pam ne Dǝɓlii man Yesu Kristu, mo joŋ gboŋgboŋ wo ɓo ne kwan syak tǝ ɓo tǝkine nyi jam nyi mo.
Osoko tǝkine swaa zahzyilli
3 Me tǝ joŋ osoko nyi Masǝŋ mai me tǝ joŋ yeɓ ah ne fatan zahzyil masãh ah tǝgbana pa ɓe lii mo joŋra. Me joŋ osoko nyi ko cẽecẽe, com ne suŋ daŋ me foo ɓǝ ɓo pǝ juupel ɓe. 4 Ame foo ɓǝ mĩi yee ɓo, me ne koŋ pǝlli ka ga ẽe mo, mor ka me laa pǝ'nyah pǝlli. 5 Ame foo ɓǝ iŋ matǝ goŋga mai mo ne ko, iŋ mai ma ɓo lii Lois ne ma ɓo Unike ara mo ne kǝpel nyi mo. Ame tǝ belbel mo no ne iŋ ah ta. 6 Mor maiko, me 'yah ur ɓǝ foo ah wo ɓo, ka mo byak fan ɗǝǝ mai Masǝŋ mo nyi mo ne cok mai me kan jol tǝ ɓo. 7 Mor Tǝ'yak mai Masǝŋ mo nyi ɓo nyi na, ma joŋ na ɗuu gal ye ka, amma Tǝ'yak ma nyi swah nyi na, ne 'yahe, tǝkine joŋ na cak suu yo.
8 Swãa mo re mo ne joŋ syedowal tǝ Dǝɓlii man ka, swãa mo re mo tǝ ɓǝ ɓe dǝɓ daŋgai mor ah ka ta. Amma mo laa bone mor Ɓǝ'nyahre, tǝgbana mai Masǝŋ mo tǝ nyi swah ah nyi mo. 9 Ako ye ǝ̃ǝ na, so ɗii na ka na ciŋ zan ahe, ka mor na joŋ yeɓ ɓo ya, amma joŋ nai ne ɓǝ foo zahzyil ah tǝkine gboŋgboŋ suu ahe. Joŋ gboŋgboŋ mai wo man ne Yesu Kristu kǝpel ka fan ɓah joŋ laŋ ya ba. 10 Amma ge cuu ɓǝ ah ge ɓo na lal zǝzǝ̃ǝko ne gin pa ǝ̃ǝ man Yesu Kristu. Mor Yesu Kristu ge vǝr swah wul ɓe, so cuu cee ma ga lii nyi na ne fahlii Ɓǝ'nyahre.
11 Masǝŋ soɓ yeɓ cuu Ɓǝ'nyah mai ɓo jol ɓe tǝgbana papee ah ne pa cuu ahe. 12 Mor ah me tǝ laa bone maraiko. Amma me uu ɓo gŋ pǝswahe, mor me tǝ Dǝɓ mai me soɓ suu ɓe wol ah ɓe, me tǝ belbel a ne swah ka byak yeɓ mai mo soɓ ɓo jol ɓe ŋhaa ka dai zah'nan gin Kristu. 13 Mo gbǝ ɓǝ goŋga mai me cuu ɓo nyi mo na fan ma cuu fahlii syel ɓo nyi mo, mo uu pǝswah pǝ iŋ tǝkine 'yah mai na lwaa ɓo ne tai ki ne Yesu Kristu. 14 Mo byak ɓǝ cuu masãh mai mo soɓra ɓo jol ɓo ne swah gbah jol Tǝ'yak Matǝdaŋdaŋ mai mo kaa ɓo pǝ zahzyil mana.
15 Amo tǝ ɓe, za mai mo sǝr Asia daŋ soɓra me ɓe, Figelus ne Hermogenes ara kǝsyil ɓǝǝ ta. 16 Dǝɓlii mo joŋ gboŋgboŋ wo za yaŋ Onesiforus, mor a gbah jol ɓe cẽecẽe. Swãa ka ren ko tǝ ɓǝ ɓe me pǝ daŋgai ya ta, 17 amma ne cok mai mo ge dai yaŋ Rom, kal ne kyeɓ me, ŋhaa lwaa me. 18 Dǝɓlii mo joŋ ko ka mo ge lwaako reba ɓǝ sãh jol Dǝɓlii ne zah'nan gin ahe. Amo tǝ ɓǝ yeɓ mai daŋ mo joŋko wo ɓe yaŋ Efesus ɓe!
© Bible Moundang © Alliance Biblique du Tchad, 1996.
