Haozah woli
1 Ame dǝɓlii eklesia, me pee leetǝr mai wo pa 'yah ɓe Gaiyus , mai me tǝ 'yah ko ne goŋga.
2 Pa 'yah ɓe, me 'yah ka pǝ fan daŋ fahlii ah mo ge jol ɓo pǝsãhe, suu ɓo laŋ mo yea jam tǝgbana zahzyil ɓo mo jam ta. 3 Ame laa pǝ'nyah pǝlli, mor ne cok wee pa man manyeeki ah mo gera nyeeno, ge faara ɓǝ goŋga ɓo mo ne nyi me, tǝgbana mai moo syee mor goŋga cẽecẽe. 4 Ɓǝ 'nyah ma kal mai mee laa wee ɓe tǝ syeera mor goŋga, kǝka wo ɓe ya.
Yeɓ sãh Gaiyus
5 Pa 'yah ɓe, amo joŋ yeɓ ɓo wo wee pa man ma gwǝǝ ra pǝsãh no cam. 6 Ge faara ɓǝ 'yah ɓo pel eklesia nyeeko. Me so tǝ pǝǝ mo, mo gbah jol ɓǝǝra, mor ka mo ɓaŋra fahlii gwǝǝ ɓǝǝ ge pel tǝgbana Masǝŋ mo 'yahe. 7 Mor pǝ̃ǝra ɓo tǝ kyãh ga ne yeɓ Kristu, ka tǝ fiira fan gbah jol wo za ma bai iŋ ya. 8 Ana eklesia, sai na gbah jol za ma morãiko, mor ka na tai ne ra pǝ yeɓ mai mo tǝ joŋra mor goŋga.
Diotrefes ne Demetrius
9 Me ŋwǝǝ we leetǝr wo eklesia, amma Diotrefes mai mo tǝ 'yah ka yea dǝɓlii ɓǝǝra, ka tǝ zyii ɓaŋ syiŋ ɓǝ mai me tǝ faa ya. 10 Ne cok me ge wo ɓii ɓe, me ga faa ɓǝ fan mai mo joŋko, ɓǝɓe' mai mo faako tǝ ɓuuru, ne ber mai mo tǝ gwahko zah ɓuuru. Amma mai laŋ so kii ko ya, so ka tǝ zyii nyiŋ wee pa man mai mo tǝ kyãhra ya, so a cak za mai mo tǝ 'yahra ka nyiŋ ra, a kyeɓ ka nǝǝ ra pǝ eklesia ga lalle.
11 Pa 'yah ɓe, mo kor ɓǝɓe' ka, amma mo kor ɓǝ masãh ahe. Dǝɓ mai moo joŋ fan sãhe, ka dǝɓ Masǝŋ yo. Dǝɓ mai moo joŋ fan maɓe' ahe, ka kwo Masǝŋ ya.
12 Za daŋ a faara ɓǝ sãh tǝ Demetrius, goŋga ne suu ah laŋ tǝ faa ɓǝ sãh tǝl ahe. Aru laŋ ru tǝ faa ɓǝ sãh tǝl ah ta, amo tǝ ɓe, ɓǝ faa ɓuu goŋga yo.
Haozah wol ma fahfal tǝ lii ahe
13 Me no ne ɓǝ pǝlli ka faa nyi mo, amma me 'yah ka ŋwǝǝ ne plim ne aŋkǝr ya. 14 Me tǝ kyeɓ ka ga ẽe mo gwari, ka na ge faa wo ki ne zahe.
15 Jam mo yea tǝ ɓo.
Bai ɓo ra haora zah wo ɓo. Mo haozah wo bai man ra daŋ.
© Bible Moundang © Alliance Biblique du Tchad, 1996.
