Dǝɓlii kaa kacella tǝ za sǝrri
1 Azu ye tǝ gin fah Bosra sǝr Edom gin ŋhaa ne? Azu ye ɓoo mbǝro masyẽ tǝ nyaknyak tǝ syee gin ne ne swah ŋhaa ne? Dǝɓlii ma ne swah ka ǝ̃ǝ za yo, tǝ gin ka cuu swah ahe. 1:11-12; Ob 1-14; Mal 1:2-5 2 Mor fẽe ɓoo mbǝro ɓo pǝsyẽ tǝgbana dǝɓ ma ŋhǝǝ bii lee kpuu vin ne?
3 Dǝɓlii zyii faa: Ame ŋhǝǝ za sǝr tǝgbana bii lee kpuu vin, dǝɓ ki gbah jol ɓe gŋ ɗǝ ya. Ame dah za ne kpãh ɓe me ɓaŋ ɓo, so syim ɓǝǝ 'men ge ɓo wo mbǝro ɓe ne lii ah daŋ. 4 Ame faa pǝ zahzyil ɓe, zah'nan ka me ǝ̃ǝ za ɓe ge dai ɓe, cok mai ka me ŋgoŋ kiita tǝ za syiŋ ɓǝǝ ge ɓe. 5 Ne cok me kyeɓ pa ma gbah jol ɓe, me so lwaa dǝɓ vaŋno ya, me kaa tǝ ɓǝ ah gǝriŋ. Amma kpãh ɓe me ɓaŋ ɓo, so joŋ me pǝswahe, me kaa kacella. 6 Ne kpãh ɓe me ɓaŋ, me dah za sǝr ne, me cẽe ra pãmpãm, syim ɓǝǝ ɗuu ge tǝ sǝrri.
Dǝɓlii joŋ ɓǝ sãh wo za Israel
7 Me ga faa ɓǝ tǝ gboŋgboŋ mai Dǝɓlii mo joŋni, me ga yii ko mor fan mai daŋ mo joŋko mor mana. Eẽ za Israel ɓo pǝlli, mor 'yah lii ah tǝkine kwan syak ahe.
8 Dǝɓlii faa: Ara ye za ɓe, ka ga joŋra vǝrvǝr ne me ya. 9 So ǝ̃ǝ ra zah bone mai daŋ mo tǝ laara. Angelos ye ka ge ǝ̃ǝ ra ya, amma Dǝɓlii ne suu ah ye ǝ̃ǝ ra. Ako ye 'yah ra ɓo, kwo syak tǝ ɓǝǝ wǝǝ ra. Daga ɓaaɓe yea tǝ byak ra. 10 Amma ŋwoora kyaŋ ne ki, so joŋra ko swaa ɓǝ. Dǝɓlii so ciŋ pa syiŋ ɓǝǝra, ruu sal ne ra.
11 Amma so foora ɓǝ mai mo joŋ kǝpel ne cok zah'nan Mosus dǝɓ yeɓ Dǝɓlii, so fiira fii faa: Dǝɓlii mai mo ǝ̃ǝ zaluu ma pel zan ah pǝ mabii kŋ a kẽe zǝzǝ̃ǝ ne? Dǝɓlii mai mo nyi swah nyi Mosus kŋ a kẽne? 12 Dǝɓlii mai mo cuu swah ah mo joŋ fan matǝ gǝriŋ ah ne jol Mosus, mo woŋ bii mabii pel zan ah kǝsyil gwa, ka cuu tǝɗii suu ah ne ga lii kŋ kẽne?
13 Ne cok Dǝɓlii mo zaŋ ra syee pǝ mabii ne ko, ɓal ɓǝǝ pǝswah tǝgbana ɓal pǝrri, ka ɓea tǝ ɓal a. 14 Tǝgbana dǝǝ mai moo syee pǝ cok ma dǝǝ tǝ tǝpee ahe, Dǝɓlii nyi 'yak nyi zan ahe. Dǝɓlii zaŋ zan ah yee ne ko, so joŋ tǝɗii ah yii pǝyǝkki.
Juupel ma mor fii kwan syak ne gbah jolle
15 Dǝɓlii, mo ẽe ru daga coksǝŋ pǝ cok kal ɓo matǝdaŋdaŋ ne mayǝk ge sǝŋ ɗao. Tǝwon mai mo ne pǝ zahzyil ɓo mor ɓuu kŋ a kẽne? Swah ɓo kẽne? 'Yah lii ɓo ne kwan syak ɓo kŋ kẽne? Mo tǝ ru yao ne? 16 Amo ye pa ɓuuru. Pa ɓuu lii Abraham ne Yakuɓ ka gak gbahra jol ɓuu ya, amma Dǝɓlii amo ye pa ɓuuru, amo ye Dǝɓ mai moo wǝǝ ru cẽecẽe. 17 Dǝɓlii, mo soɓ ru cak tǝ fahlii ɓo ga lal mor fẽene? Mo soɓ ru yer zahzyil ka soɓ mo ɓoo mor fẽene? Mo pii soo ge wo ɓuu mor 'yah za yeɓ ɓo mai mo joŋra mor ɓo, mor za mai cẽecẽe ara ye za ɓo.
18 Aru, ru ye za ɓo matǝdaŋdaŋ za syiŋ ɓuu a gin gbahra za ɓo kal ne ko, a ɓeɓra yaŋ ɓo. 19 Mo joŋ ru tǝgbana mo ye ka yea kaa goŋ ɓuu ɓo ya, tǝgbana ru yea za ɓo ɗǝ ya syaŋsyaŋ.
© Bible Moundang © Alliance Biblique du Tchad, 1996.
