ESTAR 8 - Bible Moundang (MUA)

Faara nyi Yahuduen mo camra tǝ suu ɓǝǝra

1 Com moo sǝ ta, goŋ soɓ fan Haman pa syiŋ Yahuduen daŋ nyi magoŋ Estar. Estar faa nyi goŋ azye ye zum Mordekai. So ɗiira Mordekai ge pel goŋe. 2 Goŋ ɓaŋ tǝgaa ah mai mo zyeɓ lamba goŋ ɓo tǝl ahe, (mai mo nyiŋ gin jol Haman) so nyi nyi Mordekai. Estar soɓ yaŋ Haman daŋ nyi Mordekai.

3 So Estar faa ɓǝ nyi goŋ faɗa, kea ge sǝŋ pel ah ne yee, pǝǝ ko ka mo cakko ɓǝɓe' mai Haman dǝɓ morsǝ̃ǝ Agag mo zyeɓ ɓo ka joŋ wo Yahuduen. 4 Goŋ cuu kǝndaŋ ma vãm kaŋnyeeri mai mo jol ah ge nyi, so Estar ur uu sǝŋ pel ah faa: 5 Goŋ mo zyii ɓe, mo tǝ foo ɓǝ ɓe no ta ɓe, ɓǝ ah mo 'nyah suu ɓo ɓe, oseni mo jin cak ɓǝ leetǝr mai Haman we Hamedata dǝɓ morsǝ̃ǝ Agag mo ŋwǝǝ pea ɓo pǝ sǝr goŋ daŋ, mor ka ik Yahuduen ga lal pǝ wulli. 6 Me gak rõm kaa ɗii ka kwan ɓeɓ mai mo ga ge tǝ za ɓe, ne zahzum ɓe ka ik ru ga lal pǝ wul ko ne?

7 Goŋ Ahasverus faa nyi magoŋ Estar, ne Mordekai Yahuduyo: We ẽe, me rao Haman ge tǝ kpuu sǝŋ tǝ ɓǝ ah mo zyeɓ kǝnah ɓo ka joŋ wo Yahuduen ɓe. Me soɓ yaŋ ah daŋ nyi Estar ɓe ta. 8 Amma we ŋwǝǝ ɓǝ wo Yahuduen na mai we 'yahe, pǝ tǝɗii goŋe, ka we kan lamba ma ne tǝgaa goŋ tǝl ahe, mor ɓǝ lai mo pǝ̃ǝ pǝ tǝɗii goŋe, mo so kan lamba goŋ tǝl ah ta ɓe, ɓǝ ah ka gak fer ao.

9 Fan ah joŋ ne zah'nan jemma gwa tǝtǝl sai pǝzyil fĩi patǝ sai ah ma ɗii ne fĩi Sivan. Mordekai ɗii za ŋwǝǝ fan goŋ daŋ, faa ɓǝ nyi ra. Ŋwǝǝra leetǝr wo Yahuduen ne govener camcam, ne za yeɓ sǝr goŋ tǝkine zaluu mai mo pǝ sǝr ah daŋ. Tǝŋ daga sǝr India, ŋhaa dai sǝr Etiopia tǝ sǝr camcam 127, leetǝr ah ra ŋwǝǝ pea ge pǝ sǝr ah ra daŋ ne zah mai moo faara pǝ sǝr mooko. Ŋwǝǝra ge wo Yahuduen ne zah ɓǝǝ ta. 10 Mordekai ŋwǝǝ leetǝr ah ra ne tǝɗii goŋ Ahasverus, so kan lamba goŋ tǝl ahe, pea leetǝr ah kal ne jol za pǝr mai mo yeera pǝr ma syel lii ah ra ma yaŋ goŋ ɓo.

11 Pǝ leetǝr ah goŋ nyi fahlii nyi Yahuduen pǝ yaŋ camcam daŋ mo taira wo ki, ka mo camra tǝ suu ɓǝǝra: Mo za makẽne ah yo, koo mo za pǝ sǝr goŋ ɓe maki ah yo, mo ge ka ikra we ɓe, ka we ruu sal ne ra, we ik ra ge lal ne ŋwǝǝ ɓǝǝ ne wee ɓǝǝ daŋ, we vǝr ra belbelle, so ka we woo fan ɓǝǝra. 12 Ɓǝ lai ah myah pǝ sǝr goŋ Persia ne lii ah daŋ pǝ zah'nan mai mo kanra ɓo ka ik Yahuduen ne ga lal pǝ wulli, ne zah'nan fĩi Adar jemma tǝtǝl sai, pǝzyil fĩi patǝ jemma tǝtǝl gwa ah yo. 13 Ɓǝ ma pǝ leetǝr ah a tǝgbana ɓǝ lai, ɓǝ ah myah ge pǝ sǝr goŋ ne lii ah daŋ, ka za mo tǝra ɓǝ ahe. Ka Yahuduen laŋ mo zyeɓra suu ɓǝǝ kaa ne ko, ka mo camra tǝ suu ɓǝǝ mo faŋra val tǝ za syiŋ ɓǝǝra. 14 Za ma yeera pǝr yeera pǝr ma syel lii ah ra ma yaŋ goŋ kalra ne ne hǝǝ tǝgbana mai goŋ mo faa ɓo. So keera ɓǝ lai ah laŋ nyi za yaŋ Suusa daŋ ta.

15 Mordekai ur gin yaŋ goŋe, ɓoo mbǝro goŋ maŋwǝǝ ah ɓo, mbǝro ah cuŋ ɓo ne zyim marwãh mafãi tǝ kaŋkaŋ ahe. So maa njok vãm kaŋnyeeri ɓo tǝtǝl ta. Tǝ fahlii tǝgǝǝ yaŋ Suusa ne lii ah daŋ, za ɓyaŋra ɓǝ gŋ ne laa pǝ'nyahre. 16 Ɓǝ ah ɓǝ 'nyah suu ne ɓǝ laa pǝ'nyah ne yǝk tǝkine fan ma cuu kaa kacella ye wo Yahuduen. 17 Pǝ sǝr ah camcam ne pǝ yaŋ maluu daŋ, ɓǝ lai mai goŋ mo kan ɓo mo so ge kee gŋ, Yahuduen daŋ 'nyahra suu, laara pǝ'nyah pǝlli, so joŋra fĩi. So za pǝlli pǝ sǝr ah ciŋra Yahuduen, mor gal Yahuduen re ra.