Boas ɓaŋ Rut kanne
1 Boas kal ge kaa zah ɓaale yaŋ pǝ cok mai za moo tai gŋ, so zum ma ren yaŋ mai Boas mo faa ɓǝ ah kŋ ge pǝ̃ǝ. Boas faa: Amo fanyẽe, mo pii soo mo ge kaa sǝŋ nyee ɗǝ. Dǝɓ ah pii soo ge kaa ge sǝŋ. 2 Boas syen za jemma kǝsyil zaluu yaŋ ahe, faa: We ge hai nyeeno. Ge haira ge sǝŋ. 3 So faa nyi dǝɓ matǝ gwari ma ren yaŋ kŋ: No'omi mai mo pii soo gin sǝr Moab ge ɓo a ga lee fan ne 'wah mǝ naa pa man Elimelek kŋ. 4 Kǝpel laŋ me foo ɓǝ ah ɓo ka me faa nyi mo, ka mo lee 'wah ah pel za mai mo haira ɓo nyeeno, tǝkine pel za ɓe maluuri. Mo 'yah lee ah no ɓe, mo lee o. Mo 'yah lee ah ya ɓe, ka mo faa nyi me ka me laa. Mor dǝɓ ma lee ah maki ah na mo kǝka, ame ye patǝ gwa ɓo ba mgbaŋ. Dǝɓ ah zyii faa: Me ga lee. 5 Amma Boas so faa: Com mai mo ga lee 'wah jol No'omi ka mo ɓaŋ laŋ Rut Moabiyo mawin pa wul ta, mor ka mo soɓ tǝɗii nyi pa wul fahfal ahe.
6 Dǝlaŋ ma ren yaŋ kŋ zyii faa: Me ka gak lee yao, mor me ka gak ɓeɓ faren ma ɓe ya. Fan mai me tǝ ga lee kǝnahe, mo lee pǝ cok ɓe o, mor ma ɓe me ka gak lee yao.
7 Daga ɓaaɓe ɓǝ ah a kǝsyil za Israel na zahsyiŋ ɓǝǝra, mor ka swaa ɓǝ lee fanne, wala kun fanne, wala ne ɓǝ fẽene daŋ, dǝɓ ki nǝǝ sǝɓal gin ɓal ah a nyi nyi dǝɓ ki . Fan ah a na syedowal kǝsyil za Israel. 8 Mor ahe, dǝɓ mai mo ye dǝlaŋ ma ren yaŋ kŋ faa nyi Boas: Mo lee ka syak ɓo. So nǝǝ sǝɓal gin ɓal ahe. 9 Boas so faa nyi zaluu tǝkine za daŋ: Awe, tǝ'nah awe ye za syedowal ma cuu me lee fan mai mo fan Elimelek ne Kilion ne Makilon daŋ jol No'omi ɓe. 10 Me nyiŋ laŋ Rut Moabiyo mawin Makilon ɓe, me ɓaŋ ko ɓo ka mo ciŋko mawin ɓe, mor ka me soɓ tǝɗii nyi pa wul fahfal ahe, ka tǝɗii pa wul nyẽe mo vǝr gin kǝsyil wee pah ah tǝkine sǝr ah ka. Tǝ'nah awe ye za syedowal. 11 Za mai mo zah ɓaale yaŋ ah daŋ tǝkine zaluu faara: Aru ye za syedowal ahe. Dǝɓlii mo joŋko mawin mai mo ga dan ga yaŋ ɓo tǝgbana Rakel ne Lea, ŋwǝǝ matǝ gwa mai yaŋ Israel daŋ mo tǝŋ ɓo ne ra. Ka mo yea pǝswah yaŋ Efrata, ka mo yea ne tǝɗii yaŋ Betlehem. 12 Morsǝ̃ǝ mai Dǝɓlii moo ga nyi nyi mo ne mawin nyẽeko, mo yea tǝgbana yaŋ Peres mai Tamar mo byaŋ nyi Yuda.
Boas tǝkine morsǝ̃ǝ ahe
13 Boas ɓaŋ Rut, ciŋ mawin ahe. Ne cok mo kaa ne ki, Dǝɓlii nyi ɓil nyi nyi, byaŋ we worre. 14 Ŋwǝǝ so faara nyi No'omi: Osoko Dǝɓlii mai mo soɓ mo ɓo ka tǝ'nah bai zum matǝ gwari ya. Tǝɗii ah mo yea pǝyǝk kǝsyil za Israel ga lii. 15 Wel ah a ga yea wo ɓo na pa wuu zahzyil nyi mo, ne pa gban tam ɓo. Magor ɓo mai moo 'yah mo, mo kal wee wǝǝ rǝŋ ɓo wo ɓo, ako ye byaŋ nyi mo. 16 No'omi nyiŋ wel ah kan ge tǝ ɓalle , so wol ko.
17 So ŋwǝǝ mai ara ye mo bai ah ɗiira wel ah ne Obed. Mor faara: Byaŋra we wor nyi No'omi ɓe.
Obed ye pah Isai mai mo byaŋ David.
18 Morsǝ̃ǝ Peres a naiko: Peres byaŋ Hesron, 19 Hesron byaŋ Ram, Ram byaŋ Amminadaɓ, 20 Amminadaɓ byaŋ Naason, Naason byaŋ Salmon, 21 Salmon byaŋ Boas, Boas byaŋ Obed, 22 Obed byaŋ Isai, Isai byaŋ David.
© Bible Moundang © Alliance Biblique du Tchad, 1996.
