Fiira Masǝŋ ka mo nĩiko za syiŋ ɓǝǝra
1 Lǝŋ Asaf.
2 Masǝŋ, mo yea zah ka, mo kaa 'wa ka,
Mo 'yak ka ta.
3 Mo ẽe ɗǝ, za syiŋ ɓo ŋwoora kyaŋ urra ɓǝ ɓo.
4 Tǝ kyeɓra ɓǝɓe' ne za ɓo mai mo tǝ byak ra.
5 A faara: We ge o,
Na vǝr ra gin kǝsyil zana,
Ka tǝɗii Israel mo yea kao.
6 Zyeɓra ɓǝ ah kǝsyil ɓǝǝ uura ɓo pǝ cok tǝ vaŋno,
Gbǝra zah ɓo wo ki ka ɓo.
7 Za mai mo gbǝra zah ɓo tǝɗii ɓǝǝ naiko:
Za sǝr Edom, Ismaelien, ne za sǝr Moab tǝkine Hagarien,
8 Za sǝr Gebal, Ammonien, Amalekien, tǝkine
Filistien ne za ma kaara yaŋ Tirus.
9 Sǝr Asiria laŋ tai ki ɓo ne ra ka nyira swah nyi wee Lot.
10 Mo joŋ ne ra tǝgbana mo joŋ ne za
Midian ne Sisera, tǝkine Jabin kah el Kison.
11 Mo vǝr ra daŋ pǝ cok ma ɗii ne En-Dor,
Wul ɓǝǝ sõo tǝ sǝr nooko.
12 Mo joŋ ne za swah sal ɓǝǝ tǝgbana mo joŋ ne Oreɓ ne Zeeɓ,
Mo joŋ ne goŋ ɓǝǝ tǝgba mo joŋ ne Zebak tǝkine Salmuna.
13 Mor faara: Na nyiŋ sǝr Masǝŋ ka na ciŋ ma syak man ne ko.
14 Masǝŋ ɓe, mo myah ra ge lal tǝgbana ɓǝmmi tǝgbana fǝryãksyer mai zyak moo ɓaŋ kal ne ko.
15 Ka mo yeara tǝgbana kpuu mai wii moo syen pǝ gǝ̃ǝre,
Wala tǝgbana fãa gao mai wii moo syen kǝsyicokki.
16 Mo nĩi ra ne kpãh ɓo, ka mo ɗuura gal ɓo.
17 Dǝɓlii, mo joŋ ka swãa mo re ra,
Ka mo so kyeɓra mo.
18 Ka tǝtǝl mo jin ra,
Ka swãa mo re ra ga lii,
Ka mo muŋra.
19 Ka mo tǝra, amo ye Dǝɓlii mayǝkki,
Mo ne swah tǝ sǝr daŋ.
© Bible Moundang © Alliance Biblique du Tchad, 1996.
