Masǝŋ joŋ Gog na fan yeɓ ahe
1 Dǝɓlii faa nyi me: 2 We dǝfuu, mo faa ɓǝ nyi Gog goŋ za Mesek ne Tubal mo pǝ sǝr Magog, mo faa ɓǝ ɓe nyi. 3 Mo faa nyi ko, ame Dǝɓlii Masǝŋ me ga joŋ ki ne ki. 4 Me ga joŋ mo jin nǝfalle, me ga maa kǝṽǝl ga nyi mo zah mor ka nǝǝ mo ne ko ne za sal ɓo ra daŋ, pǝrri, za ma yee tǝ pǝr mai mo ɓaara mbǝro masyẽa ah ɓo, ne za pǝpãa mai mo woora bal sal ɓo ne kafahe daŋ. 5 Sooje sǝr Persia, Etiopia ne Libia no ne ki, ara daŋ ne bal ruu sal jolle, ne njok vãm tǝtǝlli. 6 Za ma ruu sal ma sǝr Gomer ne Bet-Togarma nefah kǝsǝŋ daŋ no ne ki, so za sǝr manyeeki ah camcam no ne ki ta. 7 Mo faa nyi ko, mo zyeɓko suu ah ne za sal ah ra daŋ. 8 Fahfal syii pǝpãa mo kal ɓe, me ga nyi fahlii nyi ko ka mo ɗaŋko sǝr mai zan ah mo pii soora gin pǝ sǝr camcam ge kaara ɓo jam bai ɗuu gal ɓǝ salle, ka mo ɗaŋko sǝr Israel mai mo yea ɓeɓ ciŋ cok kol ɓo daga ɓaaɓe, amma zǝzǝ̃ǝko za daŋ kaara ɓo gŋ jam. 9 Ako ne za sal ah ne za camcam mo ne ki, a ga gera na zyak mǝǝzuwuŋrĩ, a ga jǝŋra cok na swãh bamme.
10 Ame Dǝɓlii Masǝŋ me tǝ faa nyi Gog: Ne cok zah'nan ah mo ge dai ɓe, mo ga tǝŋ foo ɓǝ maɓe' ahe, 11 mo ga faa: Me ga ruu sal ne za mai mo bai ɓǝ ki, mo kaara ɓo jam pǝ sǝr mai yaŋ maluu mo gŋ mo ka ne ɓaale ne zahfah vãm ya. 12 Mo ga ɗaŋ ra, mo ga woo fan ma lwaa zah sal jol za mai mo kaara ɓo pǝ yaŋ maluu mai mo yea ciŋ gboŋ ɓo, zan ah taira ra gin kǝsyil za sǝr camcam pii soo ge ɓo ne ko, zǝzǝ̃ǝko ara ne fan camcam pǝlli so kaara ɓo tǝwoŋ fahlii mai mo kǝsyil dunia jaŋjaŋ. 13 Za Seba ne Dedan ne za ma joŋra fillu daga Espania, a ga fiira mo: Mo tai za sal ɓo ge ne ka ruu sal mor ka woo fan ma lwaa zah sal ne? Mo ge ɓo ka woo vãm solai ne vãm kaŋnyeeri ne faɓal ne zahban fan camcam ne?
14 So Masǝŋ Dǝɓlii pee me ɓo wo Gog ka me faa ɓǝ mai mo faako ɓo nyi ko: Zǝzǝ̃ǝko za ɓe Israel kaara ɓo jam, mo ga ur gin 15 pǝ cok kal ɓo ne fahsǝŋ ga ge ne za sal maswah ah ra pǝpãa daga kǝsyil zahban za camcam, ara daŋ yeera pǝr ɓo. 16 Mo ga ge tǝ za ɓe Israel tǝgbana zyak mǝǝzuwuŋ ka ruu sal ne ra. Ne cok zah'nan ah mo ge ɓe, me ga pee mo ka mo ge ɗaŋ sǝr ɓe, mor ka cuu nyi za sǝr ame ye Masǝŋ matǝdaŋdaŋ. 17 Amo ye dǝɓ mai me faa ɓǝ ah ɓo daga ɓaaɓe, ne cok me faa ɓǝ ah ne zah za yeɓ ɓe profetoen za Israel: Zah'nan mai mo tǝ yah ginni, me ga pee dǝɓ ki ge ka ruu sal ne za Israel. Ame Dǝɓlii Masǝŋ me faa naiko.
Masǝŋ ŋgoŋ kiita tǝ Gog
18 Masǝŋ Dǝɓlii faa: Ne zah'nan mai Gog mo ga ɗaŋ sǝr Israel, me ga ɓaŋ kpãh ne pǝ'manne. 19 Pǝzyil kpãh ɓe me ɓaŋ ɓo pǝ'manne, me faa sǝr ga coo pǝ sǝr Israel pǝ'manne. 20 Syiŋ pǝ bii ne juu ma zoo sǝŋ, faɓal maluu ah ne manyee ah ra, tǝkine dǝfuu mai mo no wo sǝr daŋ, a ga coora coo ne ɗuu gal ɓe. Waa ga leara ga sǝŋ, gee daŋ a ga leera ga sǝŋ ta, ɓaale daŋ ga hah ga sǝŋ. 21 Me ga joŋ gal re Gog, ne bone camcam mai me ga pee ge. Ame Dǝɓlii Masǝŋ me faa naiko. Sooje ah ra a ga jinra ik ki ne kafahe. 22 Me ga ŋgoŋ kiita tǝtǝl ah ne syem maɓe' ah tǝkine ik zan ah pǝ wulli. Me ga tǝ bam ne syaŋ ne wii tǝkine sulfer ge tǝtǝl ah ne sooje ah ra, ne za pǝlli mo tǝ gbahra jol ahe. 23 Ne joŋ ah nai me ga cuu nyi za sǝr ame ye Masǝŋ mayǝkki, ame daŋdaŋ, so a ga tǝra, ame ye Dǝɓlii.
© Bible Moundang © Alliance Biblique du Tchad, 1996.
