Dǝɓlii faa ɓǝ nyi Jeremias
1 Dǝɓlii so faa ɓǝ nyi me faɗa, faa: 2 Mo kan mawin wala mo bem wee ne cok mai ka. 3 Me ga cuu ɓǝ fan mai moo ga joŋ wo wee mai mo bemra nyeeko, tǝkine wo za ɓǝǝra. 4 A ga wukra ne syem maɓe' ahe. Koo dǝɓ vaŋno ka ga yeyee wul ɓǝǝr a, wul ɓǝǝ laŋ ka ga cii ya ta, a ga yeara tǝ sǝr tǝgbana mǝr fanne. A ga ikra ra ne salle, wala a ga wukra ne koŋne, juu ga rera wul ɓǝǝ ne fahyãh cokki.
5 Mo dan ge yaŋ mai mo tǝ yera yee wul gŋ ka, mo ɓaŋ syiŋ ɓǝ ah ka ta. Me ka ga ẽe ra ka nyi jam nyi ra ya, me ka ga 'yah ra ka so kwan syak tǝ ɓǝǝr a ta. Ame Dǝɓlii me faa naiko. 6 Za joŋ ne za masyak a ga wukra pǝ sǝr maiko, amma koo dǝɓ vaŋno laŋ ka ga yeyee wul ɓǝǝ wala cii ra ya, koo dǝɓ vaŋno ka ga ɗea suu ah wala sõo tǝtǝl ne ɓǝ wul ɓǝǝr a. 7 Dǝɓ piicel dǝɓ mo wǝ laŋ, koo dǝɓ vaŋno ka ga kaa re farel wala zwǝ fan ne ki ka wuu zahzyil nyi ko ne ɓǝ ah ya. Koo pah dǝɓɓi, wala mah ah ye mo wuu, koo dǝɓ vaŋno laŋ ka ga haozah wol dǝɓ ah tǝ ɓǝ ah ya.
8 Mo dan ge ɓǝr yaŋ mai za mo taira ɓo tǝ joŋ fĩi gŋ ka, mo kaa re farel wala zwǝ fan ne ra ka. 9 Mo laa ɓǝ mai ame Dǝɓlii ma ne swah daŋ me tǝ faani: Me ga yea zah lǝŋ mai za ma ɓaŋ win fuu ne ŋwǝǝ ɓǝǝ moo ɗǝǝra pǝ cok ma 'nyah suu ne tǝkine laa pǝ'nyahre. Za mai ara mo nyee ne cee zǝzǝ̃ǝko, fan ah mo joŋ ɓe, a ga kwora.
10 Ne cok mo faa ɓǝ fan mai daŋ nyi ra ɓe, a ga fiira mo faa: Dǝɓlii zyeɓ ɓeɓ malii mai ɓo ka pee gin tǝ ɓuu nai mor fẽene? A so ga fiira fii faa: Aru joŋ ɓǝɓe' fẽe ɓo ne? Ru joŋ faɓe' fẽe ɓo wo Dǝɓlii Masǝŋ ɓuu ne? 11 Ka mo faa nyi ra: Dǝɓlii faa: Pa ɓii lii ra soɓra me ɓoo, so kal tǝ joŋra mor masǝŋ ki ra tǝkine juupel wo ɓǝǝra, soɓra me ɓoo, zyii ka syeera mor ɓǝ lai ɓe ya. 12 Amma awe laŋ we so joŋ pǝɓe' kal pa ɓii lii ra ɓe, awe daŋ we ye za ŋwookyaŋ, we joŋ faɓe', we ka laa zah ɓe ya. 13 Mor ahe, me ga nĩi we pǝ sǝr mai ga pǝ sǝr maki ah mai awe ne pa ɓii lii ra we tǝ taa ya, ka we ge joŋ mor masǝŋ ki ra gŋ ŋhaako, com ne suŋ daŋ. Me ka ga kwo syak tǝ ɓii ya.
14 Dǝɓlii faa: Zah'nan ah no ginni, ne cok ah koo dǝɓ vaŋno ka ga haa zah faa, 'manna tǝgbana Masǝŋ mai mo no sǝŋ mo zaŋ za Israel pǝ̃ǝ gin sǝr Egiɓ ne ko ya. 15 Amma a ga haara zah ne me tǝgbana Masǝŋ ma no sǝŋ, mai mo tai za Israel gin pǝ sǝr ma fahsǝŋ, ne pǝ sǝr camcam daŋ mai me myah ra ge gŋ. Me ga zaŋ ra ge pǝ sǝr ma syak ɓǝǝ mai me nyi nyi pa ɓǝǝ lii ne ko. Ame Dǝɓlii me faa naiko. 16 Ame ga pee za gban syiŋ gin pǝpãare, ka mo gbahra zai ko. So me ga pee za gao gin pǝpãare, ka mo kaara gao ɓǝǝ tǝwaa ne cok ma tǝgee ah ra tǝkine tǝgǝǝ tǝsal daŋ. Ame Dǝɓlii me faa naiko. 17 Ame kwan fan mai daŋ moo joŋra, fan ki muŋ gŋ nahnǝn ɓe ɗǝ ya, faɓe' ɓǝǝ pel ɓe taŋraŋ. 18 Me ga soo ra tǝ ɓǝɓe' ɓǝǝ ne faɓe' ɓǝǝ zahlǝŋ gwa. Mor ɓeɓra sǝr ɓe ɓo ne masǝŋ ki ra mai mo tǝgbana wul fanne, baara sǝr mai me nyi ɓo nyi ra ne fan kol ɓǝǝra.
Jeremias juupel wo Dǝɓlii ne zahzyil daŋ
19 Dǝɓlii, mo byak me, mo nyi swah nyi me, amo ye pa ma gbah jol ɓe pǝ zah'nan gaɓɓe. Za camcam a ga urra pǝ sǝr daŋ gera wo ɓo. A ga faara: Pa ɓuu lii ra yeara ne fan ki ya, sai masǝŋ ki ra makol mai mo ka ne yeɓ ya to. 20 Dǝɓ gak zyeɓ Masǝŋ matǝ goŋga no ne? Ka gak ya. Koo mo joŋra laŋ, Masǝŋ matǝ goŋga ah ye ka.
21 So Dǝɓlii faa: Zǝzǝ̃ǝko me ga cuu swah ɓe ne yǝk ɓe nyi ra daŋ, a ga tǝra, ame ye Dǝɓlii.
© Bible Moundang © Alliance Biblique du Tchad, 1996.
