Ɓǝ faa dǝɓ ma ɗii ne Agur
1 Ɓǝ faa mai ɓǝ faa Agur we Jake yo, faa: Masǝŋ ka ne me ya, Masǝŋ ka ne me ya, ame pǝtǝtǝ̃ǝre . 2 Ame ka na dǝfuu ya, me na faɓalle, me ka ne tǝtǝl mai dǝfuu mo ne ya. 3 Me fee fatan a, me tǝ ɓǝ ki tǝ ɓǝ Masǝŋ laŋ ya. 4 Azu ye yee ge sǝŋ ko so ɗǝr ge ɓo sǝŋ ne? Azu ye tai zyak ge ɓo mor jol ne? Azu ye tai bii baŋ ge ɓo pǝzyil mbǝro ah ne? Azu ye kan tǝsyee sǝr ɓo ne? A ɗii dǝɓ ah ɗǝne? Wel ah ɗii ɗǝne?
5 Masǝŋ gbǝ ɓǝ mai mo faako ɓo ne zah ah daŋ kaa ɓo ne ko. Masǝŋ yee byak za mai mo soɓra suu ɓǝǝ ɓo wol ah daŋ. 6 Mo ɓoo ɓǝ ki mai mo faako ya ge tǝ ɓǝ faa ah ɓe, a ga ŋgoŋ kiita tǝ ɓo, a ga cuu nyi mo, mo pǝberre.
7 Masǝŋ, me fii mo, mo soɓ me lwaa fan camcam gwa kǝpel wul ɓe. 8 Oseni, mo cak me ne gwah berre, mo soɓ me yea pǝkǝ̃ǝ wala pǝsyak ka. Mo nyi farel nyi me re kǝ̃ǝ na mai me ne 'yah ahe. 9 Mor farel mo kal jol ɓe, maki ɓǝ ah ga kǝǝ me, me ka ɓaŋ syiŋ ɓo ya. Amma so me pǝsyak ɓe, a ga kǝǝ me kiŋ nyin me ɓeɓ tǝɗii Masǝŋ ɓe ne ko.
10 Mo ɓeɓ tǝgǝǝ dǝɓ yeɓ ne pah yeɓ ah ka, mo ga lwaa tǝǝ tǝ ɓǝ ahe, mo ga laa bone mor ah ta.
11 Za ki no a tǝǝra pa ɓǝǝra, so ka faara ɓǝ sãh tǝ ma ɓǝǝr a ta. 12 Za ki no a kwanra suu ɓǝǝ ne nahnǝn ɓǝǝ na za sãhe, so a yeara ma ne faɓe' ɓǝǝ 'wa. 13 Oho za ki no a kwanra suu ɓǝǝ ne nahnǝn ɓǝǝ pǝsãh no cam. 14 Za ki no a cuura syak nyi za syak tǝkine mabaidǝɓ pǝlli, ciŋra farel ɓǝǝ ma kaa wo sǝr ɓo.
15 Darsuŋsuŋ no ne wee pǝ ŋwǝǝ gwa, a ɗiira gwa daŋ ne Mo Nyi Gee me! 16 Fan no nai, ka kǝ̃ǝ kpee ya: palle, masoore, sǝr mayak mai mo ne koŋ bamme, tǝkine wii mai moo syen cokki.
17 Dǝɓ mai mo syak pah ah wala syẽa mah ah ne cok tam ahe, vak cok mo re ko, wala mavak mǝr mo nǝǝ nahnǝn ahe.
18 Fan no camcam nai mai mo joŋ me kaa ɓo gǝriŋ, me ka laa mor ah ya: 19 zoo vak moo zoo sǝŋ, syel soo moo syee tǝtǝl tǝsalle, syel dah moo syee tǝ mabii, tǝkine ɓǝ dǝwor ne madǝwin wo ki.
20 Fahlii mawin ma joŋ ɓǝǝ a naiko: a joŋ ɓǝǝre, so a er bii, amma a so faa zye joŋ faɓe' ya.
21 Fan no nai mai moo ɓeɓ sǝrri: 22 byak mai mo kaa goŋe, tǝgwĩi mai moo lwaa farel mai zahzyil ah mo tǝ 'yah daŋ renne, 23 mawin maɓe' ah mo lwaa wor kanne, tǝkine mabyak mai mo nyiŋ wor jol mah yaŋ ah kanne.
24 Fan no nai, ara pǝnyee kal fan ma wo sǝr daŋ, amma ara pǝ yella pǝlli: 25 Sǝwǝǝre, ara ka pǝswah ya, amma a hǝǝ taira farel ɓǝǝ ga yaŋ ne cok kal sǝ. 26 Tǝkpiiwa: ara ka pǝswah ya, amma a zyeɓra yaŋ ɓǝǝ tǝgǝǝ tǝsalle, a swahra gŋ. 27 Tǝzyeere: ara ka ne goŋ ya, amma mo zoora ga ɓe, a baŋra ki mbaŋmbaŋ. 28 Dǝwee: dǝɓ gak gban maki ah lal ne jolle, amma mo ga lwaa ra ɓǝr yaŋ goŋe.
29 Fan no nai a syeera pǝsãh nǝn ẽere: 30 ɓolle, a pǝswah kal fan cok daŋ, ka ɗuu gal fan ki ya, 31 kǝdai, ne watǝcoo, tǝkine za goŋ moo yeara ma pel za ɓǝǝra.
32 Mo joŋ tǝgwĩi ne yii suu tǝkine joŋ faɓe' ɓe, mo uu mo foo ɓǝ. 33 Mo ŋhǝǝ won ɓe, mo ga lwaa nǝm ahe. Mo i võo nyi dǝɓ ɓe, syim ga pǝ̃ǝ gŋ. Mo kǝǝ dǝɓ ɓaŋ kpãhe, a ga ge ne balle.
© Bible Moundang © Alliance Biblique du Tchad, 1996.
