Gbanzah ne sǝr Egiɓ ka joŋ fan ki ya
1 Dǝɓlii faa: Ɓǝ pǝgaɓ tǝ za mai mo kaara zaluu sǝr Yuda ɓo, mor ŋwoora kyaŋ ɓo ne me. A syeera mor ɓǝ mai ame ye me ka zyeɓ ɓo ya, ge gbǝra zah mai ɓǝ ah mo ka tǝgbana 'yah ɓe ya, so a ɓoora faɓe' ga tǝ faɓe' maki ahe. 2 Kalra ga sǝr Egiɓ ka fii gbah jolle, amma fiira ɓǝ ah zah ɓe ya. A 'yahra sǝr Egiɓ mo byak ra, so soɓra ɓǝ foo ɓǝǝ uu tǝ goŋ sǝr Egiɓ. 3 Amma goŋ ah ka ga yea ne swah ka gak gbah jol ɓǝǝr a, byak mai Egiɓ mo ga byak ra, ɓǝ ah a ga i zah ne ɓeɓɓe. 4 Peera profetoen ɓǝǝ ge dai yaŋ Egiɓien maluu ma ɗii ne Zoan ne Hanes ɓe. 5 Swãa ga re za sǝr Yuda, mor soɓra suu ɓǝǝ ɓo wo za ma bai goŋga, za matǝtǝ̃ǝ mai mo ka gak gbahra jol ɓǝǝ ya yo.
6 Mai ɓǝ faa Masǝŋ mo faa ɓo tǝ fan cok ma fah kǝsyicok morkǝsǝŋ yo: goŋ tǝ syeera pǝ sǝr magaɓ ah mai ɓol mo gŋ, ne sooyii tǝkine dragoŋ ma zoo ne yee daŋ . A woora fan haozah wol ma lee gaɓ ah ne korro tǝkine njoŋnjoŋ ga nyi za mai mo ka gak gbahra jol ɓǝǝ laŋ ya ne ko. 7 Gbah jol mai Egiɓ moo gbah ka ne yeɓ ya. Mor ahe, me ɗii Egiɓ ne Dragoŋ-Mai-Mo-Ka-Ne-Yeɓ-Ya.
Ɓǝ bai laa zah zana
8 Comki Masǝŋ faa nyi me ka me ŋwǝǝ ɓǝ zai ge pǝ ɗerewol, ka ɓǝ ah mo yea na fan ma joŋ syedowal tǝ ɓǝǝ ga lii. Cẽecẽe a ŋwoora kyaŋ ne Masǝŋ, a gwahra berre, 9 ka zyii laara ɓǝ cuu ah ya. 10 A faara nyi profetoen: We kaa 'wa, we faa ɓǝ fan matǝ goŋga nyi ru ka. Sai we faa ɓǝ fan mai ru ne 'yah laa ah nyi ru to. We soɓ ru syee mor ɓǝ kol ɓuuru. 11 We zol tǝ fahlii ɓuu ge lalle, we ɓeɓ fahlii ɓuu pel ɓuu ka. Ru 'yah laa ɓǝ Masǝŋ ɓii Matǝdaŋdaŋ mǝ za Israel ko ya.
12 Ɓǝ mai Masǝŋ Matǝdaŋdaŋ mǝ za Israel mo faa a naiko: Awe zyii ka laa ɓǝ mai me faa nyi we ya, we uu ɓo tǝ ɓǝ ma joŋ ne swah tǝkine vǝrvǝrri. 13 Awe pǝɓe', awe tǝgbana korvuu mai moo sǝǝni so moo lee ga sǝŋ, we ga lee gwari nai ta. 14 Awe ga yea tǝgbana cii vuu mai mo dah pǝɓe' ɓe, kpẽe ah mo ka coŋ nǝn ɓaŋ yakwii wala bee bii rǝk ga pǝ cii ne ya.
15 Dǝɓlii Masǝŋ Matǝdaŋdaŋ mǝ za Israel faa nyi zana: We soɓ suu ɓii wo ɓe, we faa ɓǝ ki ka. Nai ɓe, we ga yea pǝswahe, we ga kaa jam. Amma we zyii ka joŋ nai ya! 16 We so faa we ga zyeɓ pǝr ka ɗuu gin wo za syiŋ ɓii kal ne ko. A pǝsãhe, we ɗuu o! Awe lǝŋ pǝr ɓii ga syeera gwari, amma pǝr mǝ za mai mo tǝ foora mor ɓii ga syeera gwari kal ma ɓiiri. 17 Ne cok we kwo dǝɓ vaŋno tǝgǝǝ za syiŋ ɓii ɓe, za ujenere kǝsyil ɓii a ga ɗuura kalle, za syiŋ ɓii dappe nai to a ga joŋra we ne pãa ɓii daŋ ɗuu gal kalle. Koo dǝɓ ki ka ga coŋ kǝsyil za sal ɓii ya, sai kpuu tutowal mai mo pee ɓo tǝgee sǝŋ to! 18 Ne daŋ laŋ, Dǝɓlii tǝ byak we ka joŋ gboŋgboŋ wo ɓiiri, a 'yah ka kwan syak tǝ ɓiiri, mor cẽecẽe a joŋ fan masãh ah to. We soɓ suu ɓii wo Dǝɓlii ɓe, we ga laa pǝ'nyahre.
Masǝŋ ga ẽe zan ahe
19 Awe za mai we kaa ɓo yaŋ Jerusalem, we ka ga yeyee faɗa yao, mor Dǝɓlii pa kwan syak yo. Ne cok we yeyee wol ah fii gbah jol ne ɓe, a ga laa yee ɓiiri. 20 Dǝɓlii ga joŋ we dan pǝ zah'nan magaɓ ahe, amma ako ne suu ah a ga yea gŋ ne we, ka cuu fan nyi we, we ka ga kyeɓ ko kyeɓ faɗa yao. 21 We cak gin tǝ fahlii ka ga nǝjokǝsãh wala nǝjokǝlǝɓai ɓe, we ga laa kyaŋ ah fahfal ɓii faa: Fahlii nyẽeno, we ge syee gŋ. 22 We ga woo masǝŋ ki ɓii ra mai we ɓaŋ ne vãm solai ne mai we ɓaŋ ɓo ne vãm kaŋnyeeri myah ga lal tǝgbana fan maɓea ah faa: We ge fah lal ŋhooko! 23 Ne cok daŋ we ruu fakpãhpǝǝ ɓii ɓe, Dǝɓlii ga pee bam tǝ gin tǝl ahe, a ga joŋ we lwaa fagwahl pǝlli, faɓal ɓii ga lwaa cok pii masãh ahe. 24 Dǝǝ pǝpǝǝ tǝkine korro mai wee pǝǝ 'wah ɓii ne ko, a ga rera farel tǝkine wom masãh ahe. 25 Ne zah'nan ah ne cok mai Masǝŋ moo ga muŋ za syiŋ ɓiiri, so a ga tǝ bamme, bii ga ɗuu gin tǝwaa ne gee daŋ ge sǝŋ. 26 Fĩi ga sǝǝ cok tǝgbana comme, so com ga sǝǝ cok kal matãa zahlǝŋ rǝŋ, tǝgbana cokfãi ma zah'nan tǝ rǝŋ. Fan mai daŋ a ga joŋ ne cok mai Dǝɓlii moo ga kiŋ nwãh mai mo kan wo zan ah tǝkine laɓ ra.
Masǝŋ ga ŋgoŋ kiita tǝ sǝr Asiria
27 Za gak kwanra swah Masǝŋ tǝkine yǝk ah gin pǝɗǝkki. Wii ne suŋwii a cuu kpãh ah mo ɓaŋko ɓo. Mo faa ɓǝ ɓe, ɓǝ faa ah a syen tǝgbana wii. 28 A pee zyak kal pel ah tǝgbana bii mai mo ge ɓe, moo ɓaŋ fan daŋ kal ne ko, a gbǝǝ za sǝr daŋ ka muŋ ra, a in zah ɓǝɓe' ɓǝǝ mo foora ɓo ka joŋ daŋ tǝɗe'. 29 Amma awe za Masǝŋ, we ga laa pǝ'nyahre, we ga ɗǝǝ lǝŋ tǝgbana mai wee ɗǝǝ lǝŋ ne suŋ ne cok joŋ fĩi matǝdaŋdaŋ. We ga laa pǝ'nyah tǝgbana za mai moo ɓaŋra ɓal zah cii jak tǝ fahlii ga yaŋ Dǝɓlii, pa ma byak Israel.
30 Dǝɓlii ga soɓ za daŋ laara kyaŋ yǝk ahe, a ga cuu 'man kpãh ah mo ɓaŋ ɓo. Mabǝlaowii ne zyak mǝǝzuwuŋrĩ, syaŋ tǝkine bam malii ga ge. 31 Ne cok Asirien mo laara kyaŋ yǝk Masǝŋ tǝkine swah ah mo cuu ɓo ne ŋgoŋ kiita tǝ ɓǝǝ ɓe, gal ga re ra pǝlli. 32 Ne cok mai Dǝɓlii mo tǝ ik Asirien, zan ah Israel a ga daara ma ɓǝǝ yuŋ tǝkine tǝnjuŋni. Masǝŋ ne suu ah ye ga ruu sal ne Asirien. 33 Zyeɓra cok ma'man ah mai wii mo ga sye goŋ Asiria gŋ kan ɓo daga ɓaaɓe, lak ah cii ɓo pǝɗǝkki a pǝ'ahe, zahwii baa ge ɓo gŋ pǝ'manne. Dǝɓlii ga fee tǝ'yak gin tǝl ah pǝ'man ka ɓoo wii nyi ne ko.
© Bible Moundang © Alliance Biblique du Tchad, 1996.
