Joaɓ lai David
1 Ge faara nyi Joaɓ: Goŋ tǝ yeyee a swaa ɓǝ Absolon. 2 Swah ma com moo za mo joŋni, so ciŋ ɓǝ swaa wo za daŋ. Mor com ah za laa goŋ tǝ swaa ɓǝ nan ahe. 3 Com ah za gera yaŋ pǝ muŋ tǝgbana za mai mo ɗuura zah sal ɓe swãa moo ren ra. 4 Goŋ jǝŋ fan tǝtǝlli, so lai yee pǝ'manne: Na ɓe Absolon, Absolon na ɓe, na ɓe!
5 Joaɓ dan ge wo goŋ ɓǝr yaŋ, faa nyi ko: Tǝ'nah mo joŋ swãa re za yeɓ ɓo mai mo ǝ̃ǝra cee ɓo ne mǝ wee ɓo mawǝǝ ne maŋwǝǝ tǝkine mǝ ŋwǝǝ ɓo ne mǝǝ byak ɓo daŋ. 6 Amo mo tǝ 'yah za mai mo syiŋra mo ɓo, mo so syiŋ za mai mo tǝ 'yahra mo. Tǝ'nah mo joŋ zaluu ɓo ne za yeɓ ɓo tǝgbana ara ye ka fan ki pel ɓo ya. Mor me tǝ ɓe, tǝ'nah kǝnah Absolon mo no sǝŋ ɓe, ka ru daŋ ru yee wuk ma nyẽeko, mai a yea pǝ'nyah wo ɓo. 7 Me pǝǝ mo, mo pǝ̃ǝ na ge, mo ge faa ɓǝ wuu zahzyil nyi za yeɓ ɓo ra ne ko. Mor me tǝ faa nyi mo pǝ tǝɗii Dǝɓlii, mo zyii pǝ̃ǝ gan a ɓe, koo mo ka lwaa dǝɓ vaŋno kaa ne mo ne suŋ mai ya. Bone ah a ga yea tǝ ɓo pǝ'man kal bone daŋ mo tǝŋ gin tǝ ɓo daga laŋ ɓo ŋhaa tǝ'nahko. 8 Goŋ ur pǝ̃ǝ ge kaa zahɓelle. Ge faara ɓǝ ah nyi za daŋ: Goŋ kaa ɓo zahɓelle. So za daŋ taira ge pel goŋe.
David pii soo ge yaŋ Jerusalem
Amma za Israel daŋ ɗuura kalle, zune daŋ kal ge fah yaŋ ahe. 9 Ne cok ah ban Israel daŋ ara ne bal kǝsyil ki. A faara: Goŋ David yee wǝǝ na jol za syiŋ mana, ako yee ǝ̃ǝ na jol Filistien ta, so zǝzǝ̃ǝ ɗuu gal Absolon gin pǝ sǝr nyẽe kal ɓo. 10 So Absolon mai na syee nǝm tǝl ah kan goŋ ne kŋ laŋ wǝ zah sal ɓe ta, ko mor fẽe we faa ɓǝ jin gin yaŋ ne goŋ ya ne?
11 Goŋ David pepee faa nyi Sadok ne Abiatar za joŋzahsyiŋrĩ: We faa nyi zaluu Yuda sye: We ciŋ za fahfal ɓo ne ɓǝ jin gin yaŋ ne goŋ mor fẽene? Mor ɓǝ mai moo faara kǝsyil za Israel daŋ goŋ laa ɓǝ ahe. 12 Awe ye wee pa ɓe, awe ye nǝǝ suu ɓe, so mor fẽe we ciŋ za fahfal ɓo ne ɓǝ jin gin ne goŋ ne? 13 We faa nyi Amasa sye: Amo ye ka nǝǝ suu ɓe ya ne? Me ka ga ɓaŋ mo kan dǝɓlii ne pel ɓe tǝ za sal pǝ cok Joaɓ ne ga lii ya ɓe, Masǝŋ mo i me pǝ wulli. 14 David fer zahzyil za Yuda daŋ na zahzyil dǝɓ tǝ vaŋno, so peera pee wo goŋ faa: Mo pii soo ge tǝkine za yeɓ ɓo daŋ.
15 Goŋ pii soo ge dai el Yordan, za Yuda gera Gilgal mor ka zyaŋ tǝ goŋe, ka yee el Yordan ne ki. 16 Syimai we Gera dǝɓ ban Benyaamin ma Bakurim hǝǝ ge ne za Yuda mor ka zyaŋ tǝ goŋ David. 17 Za Benyaamin ujenere no ne ki ta. Siba dǝɓ yeɓ yaŋ Saul ne wee ah jemma tǝtǝl dappe tǝkine za yeɓ ah jemma gwa kalra pel goŋ ge pǝ el Yordan. 18 So kal tǝ joŋra yeɓ mor ka yeera bii ne za yaŋ goŋe, a joŋra fan mor ka 'nyah suu goŋe.
David joŋ ɓǝ 'nyah wo Syimai
Ne cok goŋ mo tǝ yee el Yordan, Syimai we Gera ge kea ge sǝŋ pel goŋe. 19 So faa: Dǝɓlii ɓe goŋ mo kee faɓe' tǝ ɓe ka, mo foo ɓǝɓe' mai dǝɓ yeɓ ɓo mo joŋ ne cok dǝɓlii ɓe goŋ mo pǝ̃ǝ gin yaŋ Jerusalem ka. Goŋ mo gbǝ ɓǝ ah pǝ zahzyil kao, 20 mor me tǝ ɓe, me joŋ faɓe' ɓo, so me ge tǝ'nahko, me hǝǝ kal pel za yaŋ Yuseɓ daŋ mor ka gin zyaŋ tǝ dǝɓlii ɓe goŋe.
21 Abisai we Seruja faa: Syimai ka nǝn pǝkoŋ in ga lal pǝ wul a ne? Mor tǝǝ dǝɓ mai Dǝɓlii mo syee nǝm tǝl ahe. 22 Amma David faa nyi Abisai ne naa mah ah Joaɓ: Azu ye syea we ne? We 'yah ka kyeɓ gaɓ lwaa me ne ne? Tǝ'nah ame ye goŋ Israel, dǝɓ Israel vaŋno ka wǝ ya. 23 So goŋ faa nyi Syimai: Mo ka wǝ ya, me faa ɓo naiko.
David joŋ ɓǝ 'nyah wo Mefiboset
24 Mefiboset we Saul ge ka zyaŋ tǝ goŋe. Amma daga cok mai goŋ mo kalle, ŋhaa pii soo ahe, vãh ɓal ah ra ya, vãh jol a, ce ɓal pyaŋ laŋ ya, vãh mbǝro ah ra laŋ ya ta. 25 Ne cok mo ge yaŋ Jerusalem ka zyaŋ tǝ goŋe, goŋ fii ko: Mor fẽe mo ge ne me ya ne Mefiboset? 26 Zyii faa: Dǝɓlii ɓe goŋe, dǝɓ yeɓ ɓe joŋ tǝgwĩi ne me. Me faa nyi ko: Mo baŋ korro nyi me ka me yee tǝl ahe, me ga ne goŋe. Mor dǝɓ yeɓ ɓo lem yo. 27 Amma so kal ge ce me ɓo wo dǝɓlii ɓe goŋe. Amma dǝɓlii ɓe goŋ tǝgbana Angelos Masǝŋ, mo joŋ fan mai zahzyil ɓo mo 'yahe. 28 Mor za yaŋ pa ɓe daŋ kiira ɓo nǝn pǝ koŋ wul pel dǝɓlii ɓe goŋe. Amma ne daŋ laŋ mo kan dǝɓ yeɓ ɓo kǝsyil za ma renra farel cok vaŋno ne mo. So coŋ maki ɓo no ka me yeyee ah wo goŋ kpǝ ne? 29 Goŋ faa nyi ko: Mo so kal tǝ faa ɓǝ ga pel kpǝ ne? Me faa ɓe, amo ne Siba we ga woŋ 'wahe. 30 Mefiboset faa nyi goŋe: Mo ɓaŋko daŋ o, mor dǝɓlii ɓe goŋ ge yaŋ ah jam ɓe.
David joŋ ɓǝ 'nyah wo Barzilai
31 Barzilai dǝɓ Giliat ge gin Rogelim, ge yee el Yordan ne goŋ mor ka swan fahlii ah kan ga nǝzakǝŋhaa. 32 Barzilai tam pǝlli ɓe, joŋ syii ɓo jemma nama. Ako ye yea tǝ ga nyi goŋ ne farel ne cok mo yea kaa ɓo Makanayim, mor pa joŋ malii ye ko. 33 Goŋ faa nyi Barzilai: Mo ge ne me, me ga wol mo wo ɓe yaŋ Jerusalem.
34 Amma Barzilai zyii zah goŋ faa: Coŋ syii ɓe ɓo ka yea ne cee kǝɗii ka me so ge yaŋ Jerusalem ne goŋ kpǝ ko ne? 35 Tǝ'nah me joŋ syii ɓo jemma nama o, me gak woŋ kǝsyil fan masãh ne maɓe' faɗa ne? Dǝɓ yeɓ ɓo gak laa 'nyah fan mai moo ren tǝkine mai moo zwan no faɗa ne? Me gak laa kyaŋ ɗǝǝ lǝŋ za wǝǝ ne mǝ ŋwǝǝ camcam no ne? Dǝɓ yeɓ ɓo ga nyi faswaa nyi dǝɓlii ɓe goŋ mor fẽene? 36 Dǝɓ yeɓ ɓo ge ka yee el Yordan mai ne goŋ to, amma so goŋ 'yah joŋ ɓǝ 'nyah mai wo ɓe nai mor fẽene? 37 Mo soɓ dǝɓ yeɓ ɓo pii soo, me ga wǝ yaŋ ɓe, kah pal pa ɓe ne ma ɓe. Amma we ɓe Kimham nyẽeno, a ga ne dǝɓlii ɓe goŋe, ka mo joŋ fan mai zahzyil ɓo mo lǝŋ ɓo wol ah o.
38 Goŋ faa: Kimham mo geko ne me o, me ga joŋ fan mai zahzyil ɓo mo 'yah daŋ wol ahe. Fan mai mo 'yah wo ɓe daŋ me ga joŋ nyi mo.
39 Za daŋ yeera el Yordan, goŋ laŋ yee ta, so zwǝ Barzilai ne zahe, ẽe ko, so Barzilai pii soo kal fah yaŋ ahe.
Za Yuda ne za Israel bǝǝra bal tǝ ɓǝ goŋe
40 Goŋ syee kal ge fah Gilgal, Kimham laŋ ge ne ki. Za Yuda daŋ tǝkine raita za Israel swǝra fahlii goŋe. 41 So za Israel daŋ gera wo goŋ faara nyi ko: Goŋe, mor fẽe wee pa ɓuu za Yuda lal ɓaŋra mo ne za yaŋ ɓo tǝkine za ma ne mo daŋ yee el Yordan ne ne?
42 Za Yuda daŋ zyiira zah za Israel faara: Mor goŋ ne ru gwari. Mor fẽe nanaa we so ɓaŋ kpãh ɓo tǝ ɓǝ ah ne? Goŋ nyi farel ɓo ru ne? Wala ru ɗǝǝ fan ɓo gŋ ne? 43 So za Israel zyiira zah za Yuda faa: Ru ne fan wo goŋ zahlǝŋ jemma . David laŋ ma ɓuu ye kal we ɓe, we syẽa ru nai mor fẽene? Aru ye ka za ma faa ɓǝ gin ne goŋ man kǝpel a ne?
Amma ɓǝ faa za Yuda pǝcwak kal mǝ za Israel ɓe.
© Bible Moundang © Alliance Biblique du Tchad, 1996.
