Juupel Habakuk
1 Juupel profeto Habakuk.
2 Dǝɓlii, ame laa ɓǝ yeɓ mai mo joŋni, so ɓǝ ah re gal ɓe pǝlli, mo so joŋ yeɓ malii mai mo yea tǝ joŋ pǝtãa ne zah'nan ɓuu zǝzǝ̃ǝ ɗao faɗa. Koo mo ɓaŋ kpãh ɓo laŋ, mo so foo ɓǝ kwan syak ɓo moo kwan tǝ dǝɓɓi.
3 Masǝŋ tǝ ga gee fah sǝr Edom ge faɗa, Masǝŋ Matǝdaŋdaŋ tǝ gin tǝgee Paran ra ginni, swah goŋ ah rii coksǝŋ ne lii ah daŋ, yǝk ah baa sǝr kǝrkǝrri. 4 Tǝ gin tǝgbana cokfãi moo sǝǝni, cokfãi tǝ pǝ̃ǝ gin mor jol ah tǝgbana guu, pǝ cok mai swah ah mo ne mo muŋ ɓo gŋ. 5 Pee syem maɓe' ah kal ɓo pel ahe, so faa nyi wul ka mo syeeko ge mor ahe. 6 Ne cok mo ge uu ɓe, sǝr coo gǝrgǝr, mo tǝ ẽe cok ɓe, za coora coo ne galle, waa ma ga lii ah ra ŋgǝ̃ǝre, gee mai mo yea tǝ syee gŋ daga ɓaaɓe daŋ njwǝǝ ge sǝŋ.
7 Ame kwo za Kusan tǝ ɗuura galle, za Midian tǝ coora ne gal makmakke. 8 Dǝɓlii, el makẽe ye kǝǝ mo ɓo tǝ joŋ kpãh ne? Mabii makẽe ye joŋ mo ɓaŋ kpãh ɓo ne? Amo yee ɓo tǝ swãh bamme, mo yee ɓo tǝ muŋta ɓo ma ɗii ne swãh bam mor ka kaa kacella. 9 Amo zyeɓ suu ɓo ka 'nǝǝ guu, guu baa sok ɓo ɓo cil, amo ŋgǝ̃ǝ sǝr ka el mo yea, bii mo ɗuu gŋ. 10 Ne cok waa mo kwora mo, laŋra geri geri, so bii ɗuu ge lal pǝ'manne, cii yee bii mor sǝr cii pǝlli, wea ge sǝŋ pǝ'manne. 11 Ne cok mo 'nǝǝ guu, sãh ah mo tǝ sãhni, ne zǝǝ ɓo mo nǝǝ ɓo mo tǝ sãhni, com ne fĩi gak ka syeera ya. 12 Amo ɓaŋ kpãh kyãh wo sǝr ne ko, so mo dah za sǝr ne ɓal ne kpãh ɓo mo ɓaŋ ɓo. 13 Amo kal ge ɓo mor ka ǝ̃ǝ za ɓo, ka ǝ̃ǝ goŋ ɓo mai mo nǝǝ ɓo. Amo lee dǝɓlii za faɓe' ge sǝŋ, mo muŋ za syee mor ah tǝɗe'. 14 Mo jwǝǝ zaluu sal ah ra ne guu ɓo, ne cok mai mo gera ne swah na zyak mǝǝzuwuŋ ka myah ru. A ɓyaŋra ɓǝ ne laa pǝ'nyah tǝgbana za mai moo cuura bone nyi pa syak pǝ cok muŋ ahe. 15 Amo cwǝǝ ge pǝ mabii ne pǝr ɓo ra, ŋhaa bii ah so gaŋ tǝfǝǝre.
16 Ne cok me laa ɓǝ ah naiko, suu coo me ne gal kpakpa, tǝkpuuzah ɓe laŋ ne gal gberi gberi, ɓal coo mor ɓe geri geri.
Me ga yea zahe, me kaa byak zah'nan mai Masǝŋ moo ga ŋgoŋ kiita ne tǝ za mai moo ruura sal ne ru.
17 Kpuu wuu ka ga lee ya, kpuu vin ka ga lee syẽm ya, kpuu tǝbaakãm laŋ ka ga lee ya, 'wah sor ka ga byaŋ sor a ta, pǝsǝ̃ǝ daŋ a ga wukki, jol dǝǝ daŋ a ga yea tǝkolle. 18 Amma ma ɓe, me ga 'nyah suu, me laa pǝ'nyahre, mor Masǝŋ Dǝɓlii ako ye pa ǝ̃ǝ ɓe. 19 Dǝɓlii nyi swah ɓo nyi me, joŋ me ɓo tǝgbana nǝǝminni, soɓ me ɓo tǝ syee pǝ cok ma tǝgee sǝŋ ah ra jam.
© Bible Moundang © Alliance Biblique du Tchad, 1996.
