Paulus ge gwǝǝ sǝr Makedonia ne sǝr Grek
1 Ne cok ɓǝ gaŋ ah mo vǝr o, Paulus tai za ma iŋ daŋ lai ra, so faa nyi ra: We kaa jam o. Ur ɓaŋ fahlii ka ga sǝr Makedonia. 2 Ne cok mo tǝ kyãh sǝr ahe, lai za ma iŋ ne ɓǝ camcam pǝlli. Fahfal ah so kal ge sǝr Grek. 3 Kaa gŋ fĩi sai. So tǝ zyeɓ suu ka yee dah ka ga sǝr Siria ne ko, so mo laa Yahuduen faara ɓǝ ɓo kal ah ka in ko, so foo ɓǝ ka pii soo ga sǝr Makedonia. 4 Za mai mo swǝra fahlii ah a naiko: Sopater we Pirrus ma yaŋ Berea, Aristarkus ne Sekundus daga yaŋ Tessalonika, Gaiyus ma yaŋ Derbe ne Timoteus, Tikikus ne Trofimus ma sǝr Asia. 5 Za mai daŋ kalra ge pel ge kyaŋra tǝ ɓuu yaŋ Troas. 6 Ru yee dah yaŋ Filipi fahfal zah'nan fĩi Paska. Ne zah'nan dappe ah ru ge lwaa ra yaŋ Troas, ru nǝn gŋ zah'nan rǝŋ.
Paulus ge yaŋ Troas ma fahfal tǝ lii
7 Pǝ lil ah ne zah'nan vaŋno ma tǝŋ mor kee com 'yakke, ru tai ɓo ka woŋ farelle, mor ka Paulus tǝ yah ga na tǝ'nan ah o. Cuu ɓǝ nyi za liilii ŋhaa dai kǝsyisuŋni. 8 Ɓǝr yaŋ mai ru tai ɓo gŋ pitǝrla rao ɓo gŋ pǝpãare. 9 We tǝbanna ki no gŋ a ɗii ne Utikus kaa ɓo zah feneetǝr. Ne cok Paulus mo tǝ faa ɓǝ liilii, lee nǝm pǝṽaŋ ŋhaa nǝm so ɓaŋ gin tǝ yaŋ ma sǝŋ patǝ sai ah zah feneetǝr lee ge sǝŋ. Ge ɓaŋra ko lwaara ko wǝ ɓe. 10 Amma Paulus ɗǝr ge sǝŋ ɗǝŋ ge tǝtǝl ahe, so ɓaŋ ge jol faa: We foo ɓǝ ki ka, a ne cee. 11 So yee kal ge sǝŋ faɗa, ɓǝl farel re. Fahfal ah so faa ɓǝ liilii ŋhaa com zooni, so ur kalle. 12 Zaŋra we tǝbanna kal ne ko ne cee ah jam, laara pǝ'nyah pǝlli.
Paulus ge yaŋ Milet
13 Ru yee dah ru kal ge pel Paulus ne yaŋ Assus ka byak ko gŋ ka ɓaŋni, mor mǝ ah faa zye ga zoo fahlii ma lalle. 14 Ne cok mo ge dai ru yaŋ Assus, ru ɓaŋ ko ge pǝ dah ru kal ge Mitilene. 15 Ru ur gin gŋ ru syee tǝ bii ne dahe, tǝ'nan ah ru dai kah Kios. So tǝ'nanŋhaa ah ru kal ge Samos, na tǝ'nanŋhoo ah ru ge dai yaŋ Milet. 16 Mor Paulus faa zye 'yah ka pǝ̃ǝ kah Efesus ne dah kpaŋ kalle, zye ka uu gŋ ya, mor ka zye gbǝ rol pǝ sǝr Asia ka. Mor tǝ hǝǝ ka fan ki mo cak ko ya ɓe, ka fĩi Pentekost mo ge joŋ tǝl ah yaŋ Jerusalem.
Paulus pepee ge wo zaluu eklesia Efesus
17 Paulus pepee yaŋ Milet kal ge yaŋ Efesus mor ka ɗii zaluu eklesia ka mo gera wol ahe. 18 Ne cok mo ge daira wol ahe, faa nyi ra: Daga zah'nan mai me ge dai pǝ sǝr Asia, tǝkine mai me kyãh tǝgǝǝ ɓii daŋ we tǝ ɓe, 19 me joŋ yeɓ Dǝɓlii ne wonsuu ne mĩi nahnǝnni, tǝkine kǝsyil bone mai Yahuduen mo cuura nyi me. 20 We tǝ ɓe, me muŋ ɓǝ masãh ah nǝfal ka ɓii koo vaŋno ya, me faa ɓǝ daŋ nyi we, tǝkine cuu nyi we pel zana ne ɓǝr yaŋ ɓii daŋ. 21 Me cuu nyi Yahuduen tǝkine za mai mo ye ka Yahuduen a daŋ ka mo ferra zahzyil ɓǝǝ mo gera wo Masǝŋ mo nyiŋra Yesu Dǝɓlii mana. 22 Zǝzǝ̃ǝko me ga Jerusalem tǝgbana Tǝ'yak Matǝdaŋdaŋ mo faa ɓo nyi me, amma me tǝ fan mai mo ga joŋ me gŋ ya. 23 Sai fan vaŋno me tǝ ɓe, mor Tǝ'yak Matǝdaŋdaŋ faa nyi me: daŋgai ne bone tǝ byak tǝ ɓe yaŋ daŋ. 24 Amma me ka kwan cee suu ɓe nahnǝn ɓe na fan mayǝk ah ya, mor me 'yah ka me lwaa vǝr pee ɓe, ka me vǝr yeɓ mai Dǝɓlii Yesu mo soɓ ɓo jol ɓe ka cuu Ɓǝ'nyah gboŋgboŋ mai Masǝŋ mo joŋ ɓo.
25 Me kyãh kǝsyil ɓii daŋ ne cuu ɓǝ Goŋ Masǝŋ nyi we, amma zǝzǝ̃ǝko me tǝ ɓe, koo dǝɓ vaŋno kǝsyil ɓii ka fǝ̃ǝ kwo nahnǝn ɓe yao. 26 Mor ahe, daga tǝ'nahko me tǝ faa nyi we, dǝɓ vaŋno kǝsyil ɓii mo ge muŋ ɓe, ka ɓǝ ah ka tǝ ɓe ya. 27 Mor me cuu ɓǝ Masǝŋ nyi we daŋ, me muŋ maki ah wo ɓii ɗǝ ya. 28 We byak suu ɓiiri, tǝkine ŋgaɓ mai Tǝ'yak Matǝdaŋdaŋ mo soɓ ɓo jol ɓii ka piini. We ẽe eklesia Masǝŋ mai mo lee ne wul Wel ah pǝsãhe. 29 Me tǝ ɓe, fahfal me kal ɓe, za ma na goobam ma ɓeɓ fan a gera kǝsyil ɓiiri, ka soɓra ŋgaɓ ah ya. 30 So kǝsyil ɓii laŋ za ki ga urra, a ga tǝŋra cuu ɓǝ ber ka kǝǝ za ma iŋ ka syee mor ɓǝǝra. 31 Mor maiko we byakke, so we foo, me kyaŋ syii sai com ne suŋ daŋ me lai we vaŋno vaŋno daŋ ne mĩi nahnǝnni.
32 Zǝzǝ̃ǝko me soɓ we jol Masǝŋ tǝkine ɓǝ gboŋgboŋ ahe, ako yee gak swaa we tǝkine nyi fahlii nyi we ka ga ren fan sãh mai mo kan ɓo mor zan ahe. 33 Me cwaa vãm solai ne vãm kaŋnyeeri tǝkine mbǝro jol dǝɓ ɗǝ ya. 34 Awe ne suu ɓii laŋ we tǝ ɓe, me joŋ yeɓ ne jol ɓe mor ka lwaa fan mai me 'yah ne ko ne za mai mo ne me daŋ. 35 Me cuu fahlii nyi we pǝ fan daŋ, ka we joŋ yeɓ naiko, mor ka we gak gbah jol za matǝtǝ̃ǝre. So na foo ɓǝ mai Yesu Dǝɓlii man mo faa ne suu ahe: Nyi fan pǝ'nyah kal ɗǝǝ ah ɓe.
36 Fahfal Paulus mo faa ɓǝ mai vǝrri, so kea ge sǝŋ ne zahciŋɓal ne ra daŋ juura pelle. 37 Ara daŋ yera yee ne mĩiri, gbahra Paulus ne jol ka zwan ko ne zah ka nyi fahlii nyi ne ko. 38 Swaara ɓǝ yera yee ne lii ɓǝǝ daŋ mor ɓǝ mai mo faa nyi ra: We ka fǝ̃ǝ kwo nahnǝn ɓe yao. Swǝra fahlii ah ge kan zah dahe.
© Bible Moundang © Alliance Biblique du Tchad, 1996.
