Yunas yaŋ Niniwe
1 So Dǝɓlii faa nyi Yunas: 2 Mo ge yaŋ malii ma ɗii ne Niniwe, ka mo faa ɓǝ mai me faa nyi mo nyi zan ahe. 3 Yunas so laa zah Dǝɓlii, ur kal ge Niniwe, amma yaŋ ah a pǝ'man no cam, a nǝn dǝɓ mo syee gŋ zah'nan sai. 4 Yunas syee tǝgǝǝ yaŋ ah nǝn zah'nan vaŋno 'wa, cuu ɓǝ nyi za yaŋ ah faa: Coŋ zah'nan ɓo jemma nai yaŋ Niniwe ga vǝrri.
5 Za yaŋ Niniwe nyiŋra ɓǝ faa Masǝŋ mo faa. So faara ɓǝ syẽe fanne, ka zaluu ne wee nyee daŋ mo ɓaa mbǝro dahsuu, ka cuu rǝ toobii ɓe.
6 Ne cok goŋ Niniwe mo laa ɓǝ ahe, ur gin tǝ fakal goŋ ah wǝǝ mbǝro wo suu ah ge lal ɓoo mbǝro dahsuu so kaa ge pǝ sãhe. 7 So pepee wo za yaŋ Niniwe daŋ faa: Goŋ ne zaluu ah faa sye: Koo zune mo re fan ka, dǝfuu, dǝǝ ne gwii, mo re fan wala zwǝ bii ka. 8 Dǝfuu ne faɓal daŋ mo ɓaa mbǝro dahsuu, ka koo zune daŋ mo juupel ne swah wo Masǝŋ, so mo soɓko fahlii ɓe' ah tǝkine faɓe' mai mo tǝ joŋko. 9 Ɗah maki Masǝŋ ga fer ɓǝ foo ah mo foo ɓo, a ga soɓ kpãh ah mo ɓaŋ ɓo ka na wuk ka no ne?
10 Ne cok Masǝŋ mo kwo fan mai mo joŋra naiko, ne mai mo soɓra fahlii ɓe' ɓǝǝra, fer ɓǝ foo ah mo foo ɓo ka joŋni, so ŋgoŋ kiita tǝ ɓǝǝ tǝgbana mai mo faako yao.
© Bible Moundang © Alliance Biblique du Tchad, 1996.
