We byak ŋgaɓ fan Masǝŋ
1 Zǝzǝ̃ǝko me tǝ faa ɓǝ nyi zaluu eklesia mai mo kǝsyil ɓiiri. Ame ye dǝɓlii eklesia ta, me ye pa syedowal bone Kristu, me ga kaa pǝ yǝk ah mai mo tǝ ginni. 2 Me lai we: We pii ŋgaɓ fan mai Masǝŋ mo soɓ ɓo jol ɓiiri, we byak ŋgaɓ fan ah ne 'yahe, tǝgbana Masǝŋ mo tǝ 'yah ka we joŋ bai doole pǝ zahzyilli. We joŋ yeɓ ɓii mor ka lwaa soo ne to ka, amma we joŋ ne 'yah ma joŋ yeɓɓe. 3 We kyeɓ ka kaa tǝ za mai Masǝŋ mo soɓ ɓo jol ɓii ka ẽe ne swah ka, amma we yea na fan ma cuu fan nyi ŋgaɓ ahe. 4 Ne cok Pakǝpii Malii moo ga ge, we ga lwaa njok yǝk mai moo sǝsãh mo ka ɓeɓ ya ŋhaa ga lii. “We pii ŋgaɓ fanne”
5 Nai ne wee tǝbanna ta. We laa zah za mai mo pǝluu kal we. Awe daŋ we ɓoo wonsuu tǝgbana mbǝro mor ka we joŋ mor ki ne ko, mor Ɗerewol faa: Masǝŋ a tǝr za ma yiira suu, a joŋ gboŋgboŋ wo za ma wonra suu ɓǝǝra. 6 We wonsuu ɓii mor swah Masǝŋ, mor ka mo ge yiiko we ne zah'nan mai mo cuuko ɓo. 7 We rǝk ɓǝ magaɓ ɓii daŋ ge tǝl ahe, mor ako ye tǝ byak we.
8 We joŋ yella, we byakke! Mor pa syiŋ ɓii Satan a ɓyaŋ ɓǝ kah ɓii tǝgbana ɓol moo ɓyaŋ ɓǝ, a kyeɓ dǝɓ ka sǝ̃ǝ ga ɓǝrri. 9 We yea pǝ iŋ ɓii pǝswahe, we uu ne ki gǝrgǝr, mor we tǝ ɓe, wee pa ɓii mai mo myahra ɓo wo sǝr ne lii ah daŋ tǝ laara bone ma morãi ta. 10 Amma fahfal we laa bone ne cok matǝ biŋ mai vǝr ɓe, Masǝŋ matǝ gboŋgboŋ mai mo ɗii we ka we kaa pǝ yǝk ah ma ga lii ne Yesu Kristu, ako ye ga joŋ we ne suu ah na za sãh tǝɗe', a ga joŋ we ka we laŋ ka, a ga swaa we pǝswahe, a ga ɓaŋ we uu tǝ kpii maswahe. 11 Masǝŋ yea pǝswah ga lii ga lii! Amen.
Haozah wol ma fahfal tǝ lii ahe
12 Me ŋwǝǝ leetǝr matǝ biŋ mai wo ɓiiri, Silas ye gbah jol ɓe gŋ. Me kwo ko na we pam masãhe. Me 'yah ka swaa zahzyil ɓii tǝkine joŋ syedowal goŋga tǝ ɓǝ gboŋgboŋ Masǝŋ. We uu pǝzyil ah pǝswahe.
13 Eklesia ma yaŋ Babilon mai Masǝŋ mo syen ɓo tǝgbana we, haora zah wo ɓiiri, we ɓe Markus haozah wo ɓii ta. 14 We haozah wo ki ne zwan ki ne zah ne 'yah mǝ za Kristu.
Za Kristu daŋ, jam mo yea tǝ ɓiiri.
© Bible Moundang © Alliance Biblique du Tchad, 1996.
