Ezekiel kwo yǝk Masǝŋ
(1:1–7:27)Fakal Masǝŋ
1 Ne zah'nan dappe, pǝzyil fĩi patǝ nai ahe, ne syii jemma sai , ame Ezekiel pa joŋzahsyiŋrĩ, we Buzi, ka me kaa ɓo ne Yahuduen mai mo woora ra ge ɓo pǝ byak ne ko, kah el Kebar pǝ sǝr Babilon. Coksǝŋ gbǝrri, Masǝŋ cuu fakwan nyi me. 2 (Ka zah'nan fĩi dappe, ne syii patǝ dappe ah mo gbǝra goŋ Jojakin kal ɓo ne yo.) 3 Dǝɓlii faa ɓǝ nyi me kah el Kebar pǝ sǝr Babilon ŋhaako, me laa yǝk jol ah mo kan tǝtǝl ɓe.
4 Me ẽe cokki, me kwo zyak mǝǝzuwuŋ nǝǝ gin fahsǝŋ ginni, ne swãh bam ma'man ahe, ne wii mai mo cok ɓo mo tǝ syenne. Cokfãi ryaŋ swãh bam ah ɓoo ɓo kǝsyilli. Kǝsyil wii ah fan ki a sãh gŋ tǝgbana vãm dǝmǝr. 5 Kǝsyil zyak mǝǝzuwuŋ ahe, me kwo fan ma ne cee camcam nai gŋ, jurra dǝfuu ɓo, 6 amma ara daŋ, ara ne zahpel nai nai, ne yee nai nai ta. 7 Ɓal ɓǝǝ uu ɓo ɓǝrak ɓǝrak, fyãh ɓal ɓǝǝ a na mǝ we woi dǝǝ, so a sãh tǝgbana vãm dǝmǝr. 8 Mor yee ɓǝǝ matǝ nai nai ko, kahlaa ɓǝǝ nai daŋ, jol gŋ tǝgbana mǝ dǝfuu. Fan ma ne cee matǝ nai, ara ne zahpel nai nai, ne yee nai nai ta. 9 Tǝdaa yee ɓǝǝ juu ki ɓo. Ne cok mo tǝ syeera ga ɓe, ka ferra suu ya, amma zune daŋ a syee ga pel ah jaŋjaŋ.
10 Fan ma ne cee rai daŋ, ara ne zahpel nai nai, ma nefah kǝpel jur mǝ dǝfuu ɓo, ma nefah jokǝsãh jur mǝ ɓol ɓo, ma nejokǝlǝɓai jur mǝ ŋgǝǝri ɓo, ma nefah kǝfal laŋ jur mǝ dǝɗuŋ ɓo. 11 Woora yee ɓǝǝ ge ɓo sǝŋ, tǝdaa yee ɓǝǝ gwa gwa juu ki ɓo. So yee ɓǝǝ maki ah ra matǝ gwa, a riira suu ɓǝǝ ne ko. 12 Mo tǝ syeera ga ɓe, zune daŋ a syee ga pel ah jaŋjaŋ, a gara pǝ cok makẽne daŋ mo 'yahra ga gŋ, ka ferra suu ɓǝǝ ya.
13 Me kwo fan ki ge kǝsyil fan ma ne cee, a na yakwii, a tǝgbana wii mai dǝɓ mo wõi ɓo wõi, so a lǝlaŋ. Wii ah a sǝsãhe, so sãh bam laŋ a pǝ̃ǝ gin pǝzyil ah ta. 14 Fan ma ne cee ra kŋ, a syeera ganne, a so pii soora ne hǝǝre, dǝɓ kwan tǝgbana sãh bamme.
15 Ne cok me tǝ ẽe fan ma ne cee matǝ nai ganne, me kwo fan na ɓal muŋta dǝǝ, a nai, uu ɓo tǝ sǝr kah fan ma ne cee rai vaŋno vaŋno daŋ. 16 Ɓal muŋta dǝǝ ah ra nai daŋ jur ki ɓo, daŋ a sãh tǝgbana tǝsal masãh ma ɗii ne kristolit. Yeɓ ah mo joŋ ɓo, a tǝgbana ɓal muŋta dǝǝ ah ra maki maa ge ɓo tǝgǝǝ maki ahe. 17 Ɓal muŋta dǝǝ ah a gak syeera ga nyah sǝr nai daŋ, bai mai mo ferra suu ɓǝǝra. 18 Wuu ɓal ah ra matǝ cyãhrĩ cyãhrĩ daŋ, a ne nahnǝn kǝɓǝr ne kǝlal daŋ. 19 Ne cok fan ma ne cee mo tǝ syeera ga ɓe, fan ma na ɓal muŋta dǝǝ a syeera ga ne ra ta, fan ma ne cee mo tǝ ur tǝ sǝr ga sǝŋ ɓe, ɓal muŋta dǝǝ ah ra a gara ta. 20 Fan ma ne cee, a gara pǝ cok makẽne daŋ mo 'yahra, so ɓal muŋta dǝǝ ah ra laŋ, a joŋra na mai fan ma ne cee mo joŋra ryakryak ta, mor fan ma ne cee ye lwaa ra ɓo. 21 Ne cok fẽene daŋ, fan ma ne cee mo tǝ syeera ganne, wala mo tǝ yeera ga sǝŋ, fan ma na ɓal muŋta dǝǝ ah ra laŋ, a joŋra noo ta.
22 Tǝtǝl fan ma ne cee ra sǝŋ, fan ki no gŋ a kwan tǝgbana coksǝŋ a sãh na tǝsal ma ɗii ne kristal. 23 Morkǝsǝŋ fan ma na coksǝŋ ahe, fan ma ne cee uura ɓo gŋ, rǝǝra yee ɓǝǝ ge ɓo lalle, tǝdaa yee ɓǝǝ juu ki ɓo, so riira suu ɓǝǝ ɓo ne tǝcoŋ yee matǝ gwa gwa ara mo ne ko. 24 Ame laa cii yee ɓǝǝ mo tǝ zwǝǝra, a cii tǝgbana bii malii ah moo ciini, tǝgbana cii yee za sal mapãa ahe, na kyaŋ Masǝŋ ma ne swah daŋ. Ne cok mo ka tǝ zwǝǝra yao ɓe, a hãmra yee ɓǝǝ ga tǝki, 25 amma kyaŋ a cii gin tǝ fan ma na coksǝŋ mo tǝ tǝtǝl ɓǝǝ sǝŋ ginni.
26 So tǝtǝl fan ma na coksǝŋ kŋ, me kwo fan ki gŋ, a na fakal mai mo zyeɓ ɓo ne tǝsal ma ɗii ne safir, me kwo fan kaa ɓo tǝ fakal ahe, jur dǝfuu ɓo. 27 Fan ah me kwo ge gŋ, a sãh tǝgbana vãm masyẽ mai moo yea ma mor wii. 28 A kwan tǝgbana tǝcee mai moo yea ma zahswãh sǝŋ ne cok bam mo syii ɓo. Cokfãi mai mo cuu yǝk Dǝɓlii ɓo yo.
Masǝŋ ɗii Ezekiel ka mo yeako profeto ahe
Ne cok me kwo naiko me lee ge sǝŋ, me ɗǝŋ zahpel ge tǝ sǝrri.
© Bible Moundang © Alliance Biblique du Tchad, 1996.
