Yunas zyii laa zah Dǝɓlii ya
1 Comki Dǝɓlii faa ɓǝ nyi Yunas we dǝɓ ma ɗii ne Amitai, 2 faa nyi ko: Mo ge yaŋ malii ma ɗii ne Niniwe, mo lai zan ahe, mor me kwo faɓe' ɓǝǝ mo tǝ joŋra ɓe. 3 So Yunas ur ka ɗuu gin pel Dǝɓlii kalle, ɓaŋ fahlii maki ah kal ge yaŋ Joppe, lwaa dah ma ga sǝr Espania gŋ, soo lak dah ahe, yee kaa ge gŋ ne za pãa ka ɗuu gal Dǝɓlii kal ga sǝr ahe.
4 Amma Dǝɓlii pee zyak mǝǝzuwuŋ ma'man ah nǝǝ ge tǝ mabii, zyak ah kuu ne swah no cam, ŋhaa dah coŋ biŋ ka dan ga mor bii. 5 Za dah ɗuura galle, ŋwaara ɓǝ ne yee daŋ ka fii gbah jolle, mor ka koo zune kǝsyil ɓǝǝ mo fiiko masǝŋ ahe. So woora faswaa pǝ dah rǝk ge pǝ bii mor ka dah mo yea pǝgwahe. Amma Yunas ɗǝr kal ge ɓo ɓǝr dah ma sǝŋ ahe, swǝ ɓo gŋ lee nǝm pǝṽaŋ. 6 Dǝɓlii dah ge lwaa ko gŋ faa nyi ko: Mo nǝnǝm mai ɓo nai mor fẽene? Mo ur mo juupel wo masǝŋ ɓo, ɗah maki a ga kwo syak tǝ man a gbah jol man no ne?
7 Za dah faara tǝgǝǝ ki: Na byãh syiŋrĩ, mor ka na tǝ pa mai mo 'nam gaɓ mai lwaa na ɓo ne ko. Byãhra syiŋrĩ. Mo byãhra syiŋ ɗii tǝɗii Yunas ne ko o, syiŋ gbǝ ko sǝ. 8 So faara nyi ko: Mo faa nyi ru, gaɓ mai ge tǝ man mor fẽene? Amo ge ɓo tǝ joŋ fẽe nyee ne? Mo gee kẽe ge ne? Amo ye ban fẽene? 9 Yunas zyii zah ɓǝǝ faa: Ame Yahuduyo, me syee mor Masǝŋ ma coksǝŋ mai mo joŋ sǝrri, ne mabii daŋ. 10 So Yunas kee ɓǝ ah ge nyi ra pel faa, zye tǝ ɗuu gin pel Dǝɓlii ye ganne. Gal re za dah pǝlli, so faara nyi ko: Mo joŋ fan mai nai mor fẽene?
11 Amma zyak a kuu ga pel ne swahe, so za dah faara nyi ko: Ru joŋ ɗah moo joŋ ɗii ka zyak nyẽe mo i zah kuu ne? 12 Yunas zyii zah ɓǝǝ faa: We ɓaŋ me ɓoo ge pǝ bii, zyak ga i zahe, me tǝ ɓe, zyak mai ge ɓo tǝ ɓii mor ɓǝɓe' ɓe. 13 So za dah ǝǝra dah ne swahe, kyeɓra ka dah mo ge dai zahgeere, amma gakra ya, mor zyak ah tǝ kuu pǝ'manne. 14 So pǝǝra Dǝɓlii faa: Dǝɓlii, mo ŋgoŋ kiita wul tǝ ɓuu tǝ ɓǝ dǝɓ mai ru tǝ ga ɓaŋ ɓoo ga pǝ bii ka, mo kee ɓǝ ah ge tǝ ɓuu tǝgbana ru i wul ɓo ka, mor Dǝɓlii, amo joŋ fan daŋ tǝgbana amo mo 'yahe. 15 Fahfal ah so ɓaŋra Yunas ɓoo ge pǝ bii, so zyak cõo nyanya bii laŋ yao. 16 Za dah so ɗuura gal Dǝɓlii, ŋgoŋra fan joŋ syiŋ wol ah ne ko. So faara: Ru ga joŋ mor ahe.
17 Dǝɓlii so faa nyi syiŋ malii ka mo sǝ̃ǝko Yunas, Yunas joŋ ɓǝr syiŋ zah'nan sai, suŋ sai ta.
© Bible Moundang © Alliance Biblique du Tchad, 1996.
