Za syiŋ ɓǝǝ cakra yeɓ ahe
1 Za syiŋ za Yuda ne za Benyaamin laara, za mai mo pii soora gin pǝ byak ge, tǝ vuura yaŋ Dǝɓlii Masǝŋ Israel. 2 Gera wo Serubabel ne zaluu ma morsǝ̃ǝ za camcam, faara: We soɓ ru tai ne we ka na vuu yaŋ Masǝŋ o, mor aru laŋ ru juupel wo Masǝŋ mai wee juupel wol ah ta. Aru tǝŋ joŋ syiŋ wol ah daga ne cok mai Esar-Haddon goŋ sǝr Asiria mo pee ru ge kaa nyee sǝ.
3 Serubabel, Joswa, ne zaluu ma morsǝ̃ǝ za camcam faara nyi ra: Ru ka ne 'yah mai ka we gbah jol ɓuu tǝ yeɓ vuu yaŋ mor Dǝɓlii Masǝŋ ɓuur a. Aru ga vuu ne suu ɓuu na mai Kirus goŋ sǝr Persia mo faa ɓo nyi ru.
4 So za gwǝǝ mai mo ge kaara ɓo pǝ sǝr ah kyeɓra ka nǝǝ zahzyil nyi za Yuda ka gal mo re ra, mo soɓra vuu ahe. 5 Soora zaluu pel goŋ ne lak ka mo cakra yeɓ ɓǝǝra. Kaara ne joŋ sãi yeɓ ah nai pǝ zah'nan goŋ Kirus, ŋhaa ge dai zah'nan goŋ Darius. 6 Ne cok Ahasverus mo tǝŋ kaa goŋe, za ki ŋwǝǝra ɓǝ za sǝr Yuda ne za yaŋ Jerusalem ne ko.
Peera leetǝr wo goŋe
7 Ne cok Artaserses mo kaa goŋ sǝr Persia, Bislam, Mitredat ne Tabel ne za ma ne ki ŋwǝǝra leetǝr wo goŋe. Leetǝr ah ŋwǝǝ ne zah Aramien, ne cok mo tǝ keera, so ferra ɓǝ ahe. 8 Govener ma ɗii ne Rekum ne Simsai pa ŋwǝǝ fan pǝ sǝr ahe, ŋwǝǝra leetǝr wo goŋ Artaserses tǝ ɓǝ yaŋ Jerusalem, faara:
9 Leetǝr ur gin jol ɓe Rekum govener, ne jol Simsai pa ŋwǝǝ fanne, ne za ma ne ru, za lakaali, ne zaluu manyeeki ah mo ne ru daŋ, mai ru ye za Erek, ne Babilon, ne Suusa pǝ sǝr Elam, 10 tǝkine za ki mai Asurbanipal goŋ malii mayǝk mo woora gin sǝr ɓǝǝ mo ge rǝk ra ɓo yaŋ Samaria, ne pǝ sǝr ma morcomlil kah el Efrat daŋ.
11 Leetǝr ah mo ŋwǝǝra a naiko:
Aru za yeɓ ɓo ma pǝ sǝr ma morcomlil kah el Efrat, ru pee leetǝr mai wo goŋ Artaserses. 12 Ru 'yah goŋ mo tǝ, Yahuduen mai mo gera gin pǝ sǝr goŋ ɓo manyeeki ah mo ge kaara ɓo yaŋ Jerusalem, so tǝ vuura yaŋ maɓe' ma ur ɓǝ kŋ. Tǝŋra mor vuu ɓaale ah ɓe, so laŋ a ga vǝrra yeɓ ah gwari ta. 13 Goŋe, mo kal vuura yaŋ ah so ɓaale ah mo vuu rwǝ̃ǝ ta ɓe, ka zyii sǝǝra gǝraama koo mafẽene ah yao, ko ka fan lwaa goŋ laŋ ɓeɓ ɓe ta. 14 Aru, ru ye za joŋ yeɓ goŋe, mor ah ru 'yah ka fan ah mo joŋ nai ya, so ru foo, 15 ka mo nyi fahlii, mo mgbaira ɗerewol pa ɓo lii ra ma kǝpel mo rǝk ɓo. Mo joŋ nai ɓe, mo ga lwaa pǝ ɗerewol ah yaŋ nyẽe yaŋ ma ŋwookyaŋ yo, urra ɓǝ ne za goŋ ma kǝpel tǝkine zaluu mai mo kaara swah tǝ sǝr ah ɗǝ. Zan ah ara pǝgaɓ ka kaa dǝɓlii tǝ ɓǝǝra, mor ah ako ye joŋ ɓeɓra yaŋ ah ko. 16 Mor ru tǝ ɓe, yaŋ nyẽe mo kal vuu, so ɓaale ah mo vuu rwǝ̃ǝ ta ɓe, goŋ ka gak lwaa sǝr ma morcomlil kah el Efrat yao.
Goŋ jin leetǝr
17 Goŋ so jin zah leetǝr wo ɓǝǝ faa:
Me jin zah leetǝr mai wo Rekum govener, ne Simsai pa ŋwǝǝ fanne, ne za ma ne ra mai mo kaara ɓo yaŋ Samaria, ne pǝ sǝr ma morcomlil kah el Efrat daŋ, me haozah wo ɓiiri. 18 Leetǝr mai we pee ge, so ferra, keera ɓǝ ah nyi me ɓe. 19 Me so nyi fahlii ka mo mgbaira ɓǝ yaŋ nyẽe ẽe pǝsãh ɗǝ, me so lwaa ɓo, daga ne cok ma kǝpelle, za yaŋ Jerusalem urra ɓǝ ne za goŋ ɗǝ, a ŋwoora kyaŋ, a urra ɓǝ pǝlli. 20 Za goŋ mai ara mo pǝswah kaara goŋ yaŋ Jerusalem, lwaara sǝr ma morcomlil kah el Efrat daŋ, a nyiŋra gǝraama tǝ ɓǝǝ ne tǝ fan lee tǝkine tǝ fahlii gwǝǝ daŋ. 21 Mor ahe, me faa ɓo, ka we cak ra, mo vuura yaŋ ah ka, ŋhaa sai ka me so nyi fahlii ah ɓe. 22 We joŋ yella ne ɓǝ ahe, ka fahlii fan lwaa goŋ mo ɓeɓ ka.
23 Ne cok leetǝr goŋ Artaserses mo ge dai nai sǝ, keera ɓǝ ah nyi Rekum, ne Simsai, ne za ma ne ra daŋ, so urra ne hǝǝ kalra ge yaŋ Jerusalem, joŋra Yahuduen ne doole, ka mo soɓra yeɓ ahe. 24 Soɓra yeɓ vuu yaŋ Masǝŋ yaŋ Jerusalem uu naiko, tǝgbana mai fan ah mo joŋ ne cok ma kǝpelle, ŋhaa dai syii patǝ gwa ah Darius mo kaa goŋ sǝr Persia ɓo.
© Bible Moundang © Alliance Biblique du Tchad, 1996.
