2 KEE ƁƏ 29 - Bible Moundang (MUA)

Ezekias goŋ Yuda

1 Ne cok Ezekias mo kaa goŋ sǝr Yuda, ka joŋ syii ɓo jemma gwa tǝtǝl dappe, kaa goŋ yaŋ Jerusalem syii jemma gwa tǝtǝl doraŋ. A ɗii mah ah ne Abi, mǝlaŋ Zakarias yo. 2 Ezekias a joŋ fan ma 'nyah suu Dǝɓlii tǝgbana pamlii David mo joŋni.

Vãh yaŋ Masǝŋ

3 Ne fĩi patǝ vaŋno pǝzyil syii ah fahfal Ezekias mo kaa goŋe, so gbǝr zahfah yaŋ Masǝŋ, zyeɓ zahfah ah ra. 4 Tai za joŋzahsyiŋ ne Lewitien zah yaŋ Masǝŋ ma morcomzah'nanne. 5 Faa ɓǝ ne ra gŋ, faa: Awe Lewitien we joŋ suu ɓii daŋdaŋ, we vãh yaŋ Dǝɓlii Masǝŋ pa man lii ra, we woo fan ma ne 'nahm ah mai mo ɓǝr yaŋ Masǝŋ daŋ ge lalle. 6 Pa man lii joŋra faɓe' wo Dǝɓlii Masǝŋ mana, joŋra fan ma bai 'nyah suu ahe, soɓra ko ɓoo, ka zyii gara pǝ cok mai za moo juupel wol ah gŋ ya. 7 Coora zahfah yaŋ Masǝŋ, so rumra pitǝrla. Ka tǝǝra ɓǝrdi ne joŋ syiŋ suŋwii pǝ yaŋ Masǝŋ Israel yao. 8 Mor ah Dǝɓlii ɓaŋ kpãh tǝ za sǝr Yuda, ne za yaŋ Jerusalem, joŋ fan matǝ gǝriŋ ah ne ma ren gal ah wo ɓǝǝra. Awe tǝ ɓǝ ah laŋ ɓe. 9 Za ikra pa man ra zah salle, gbahra ŋwǝǝ man ne wee man joŋ byak ne ra. 10 Zǝzǝ̃ǝko, me foo ɓo ka gban zah ne Dǝɓlii Masǝŋ Israel, ka mo ɓaŋko kpãh tǝ man faɗa kao. 11 Wee ɓe, we muŋ cok tǝkol ka, awe ye za mai Dǝɓlii mo syen we ɓo, ka we tǝǝ syiŋ ɓǝrdi nyi nyi, ka we zaŋ za ka mo juura pel wol ahe.

12-14 Lewitien mai ara mo gŋ a naiko:

Za ma morsǝ̃ǝ Kehot we Makat we Amasia, ne Joel we Azaria.

Ma morsǝ̃ǝ Merari ye Kis we Abdi, ne Azaria we Jehalelel.

Ma morsǝ̃ǝ Gerson ye Joak we Zimma, ne Eden we Joak.

Ma morsǝ̃ǝ Elsafan ye Simri, ne Jiel.

Ma morsǝ̃ǝ Asaf ye Zakarias, ne Mattania.

Ma morsǝ̃ǝ Heman ye Jehiel, ne Syimai.

Ma morsǝ̃ǝ Jedutun ye Semaja, ne Uziel.

15 So taira Lewitien manyeeki ahe, joŋra suu ɓǝǝ daŋdaŋ, fahfal ah so kalra ne vãh yaŋ Masǝŋ tǝgbana ɓǝ lai Dǝɓlii, na mai goŋ mo faa ɓǝ ah ɓo nyi ra ka mo joŋra. 16 Za joŋzahsyiŋ danra ge ɓǝr yaŋ Masǝŋ mor ka vãh ahe, woora fan ma ne 'nahm mo ɓǝr yaŋ Masǝŋ daŋ ge rǝk zahfah ah lalle, so Lewitien woora gin gŋ kal ge pǝ el Kedron ne ko.

17 Tǝŋra yeɓ vãh yaŋ Masǝŋ ne fĩi patǝ vaŋno ah ne zah'nan vaŋno ah ta. Ne zah'nan nama pǝzyil fĩi ah ge daira zahfah yaŋ Masǝŋ ne ko, joŋra yeɓ vãh yaŋ Masǝŋ zah'nan nama, ne zah'nan jemma tǝtǝl yea pǝ fĩi ah vǝrra yeɓ ah daŋ ne ko.

Ɓaŋra yaŋ Masǝŋ nyi Masǝŋ pǝki

18 Lewitien ge keera ɓǝ yeɓ mai mo joŋra nyi goŋ Ezekias, faara: Aru vãh yaŋ Masǝŋ daŋ ɓe, tǝkine cok joŋ syiŋ ma joŋ syiŋ suŋwii ne fan yeɓ ah ra, ne taabǝl mai mo mor rǝk farel ma nyi mor Masǝŋ cẽecẽe ne fan yeɓ ah ra daŋ. 19 So aru woo fan yeɓ yaŋ Masǝŋ mai goŋ Akas mo yea woo ɓo ne syii mai mo kaa goŋ ɓo mo joŋ faɓe' wo Masǝŋ, ru jin ge ne ru nyi nyi Masǝŋ ɓe. Fan ah ra daŋ a no rǝk ɓo pel cok joŋ syiŋ Dǝɓlii.

20 Ezekias ur ne zah'nan pim tai zaluu ah so kalra ge yaŋ Masǝŋ. 21 Woora ŋgǝǝri rǝŋ, pǝsǝ̃ǝ rǝŋ, wee pǝsǝ̃ǝ rǝŋ ta, mor ka joŋ syiŋ ma ɓaŋ faɓe' ne tǝ goŋ ga lal ne za yaŋ ah ne za sǝr Yuda daŋ, ka nǝǝ yaŋ Masǝŋ ne pǝsãh mor Masǝŋ ta. Goŋ faa nyi za joŋzahsyiŋ ma morsǝ̃ǝ Aron ka mo ŋgomra faɓal rai joŋ syiŋ ne tǝ cok joŋ syiŋrĩ. 22 Za joŋzahsyiŋ ŋgomra ŋgǝǝri ah ra kǝpelle, so ŋgomra wee pǝsǝ̃ǝre, sahra syim faɓal rai daŋ ge tǝ cok joŋ syiŋrĩ. 23 Fahfal ah lii, woora kǝdai ge wo goŋ ne tǝkine za manyeeki ah mo gera ɓo cok juupelle, rǝkra jol ɓǝǝ ge tǝ kǝdai ah ra. 24 So za joŋzahsyiŋ ŋgomra, sahra syim ah ge tǝ cok joŋ syiŋrĩ, mor ka ɓaŋ faɓe' za daŋ ga lalle. Mor goŋ faa mo joŋra syiŋ suŋwii ne syiŋ ma ɓaŋ faɓe' ga lal mor za Israel daŋ.

25 Goŋ syee mor ɓǝ mai Dǝɓlii mo cuu nyi goŋ David ne zah Gad pa ẽe cok goŋe, ne profeto Natan, rǝkra Lewitien yaŋ Masǝŋ ne tǝnjuŋ tǝkine koŋkeere. 26 Lewitien uura ne fan ɗǝǝ lǝŋ jol tǝgbana mai goŋ David moo joŋni, za joŋzahsyiŋ laŋ uura ne kokõorĩi jol ta. 27 So Ezekias faa, mo joŋra syiŋ suŋwii tǝ cok joŋ syiŋrĩ. Ne cok za joŋzahsyiŋ mo tǝŋra joŋ syiŋrĩ, za tǝŋra ɗǝǝ lǝŋ yii Dǝɓlii ne ko, za ki tǝŋ ulra kokõorĩi tǝkine fakyẽm manyeeki ah daŋ. 28 Za mai mo no gŋ daŋ keara ge sǝŋ juupelle, za ma ɗǝǝ lǝŋ ɗǝǝra lǝŋni, za ma woŋra fakyẽm kaara ne woŋ ah ŋhaa za joŋzahsyiŋ vǝrra joŋ syiŋ mo tǝ joŋra. 29 Ne cok mo vǝrra yeɓ ahe, goŋ ne za daŋ keara ge sǝŋ juura pel wo Masǝŋ. 30 Goŋ Ezekias ne zaluu daŋ faara nyi Lewitien mo ɗǝǝra lǝŋ ma yii Dǝɓlii mai David ne profeto Asaf mo ŋwǝǝra. Ne cok mo keara ɓo sǝŋ tǝ juupel wo Masǝŋ, so ɗǝǝra lǝŋ gŋ ne laa pǝ'nyahre.

31 Fahfal ah Ezekias faa nyi zana: Zǝzǝ̃ǝko awe joŋ suu ɓii daŋdaŋ mor Dǝɓlii ɓe, we woo fan joŋ syiŋ ɓii ma joŋ osoko nyi Dǝɓlii ge nyi ne ko. Za laara ɓǝ faa ahe, za ki kǝsyil ɓǝǝ nyira faɓal ɓǝǝ ne 'yah zahzyil mor ka joŋ syiŋ suŋwii ne ko. 32 Gera ne ŋgǝǝri jemma rǝŋ, pǝsǝ̃ǝ temere, wee pǝsǝ̃ǝ temere gwa, fan mai daŋ a mor ka joŋ syiŋ suŋwii ne wo Dǝɓlii. 33 So gera ne ŋgǝǝri temere yea ne pǝsǝ̃ǝ ujenere sai mor ka joŋ syiŋ ne ka za mo rera nǝǝ ahe. 34 Amma za joŋzahsyiŋ ara ka pǝpãa ka gak ŋgom faɓal rai daŋ ya, so Lewitien gbahra jol ɓǝǝ ŋhaa vǝrra yeɓ ahe, za joŋzahsyiŋ so joŋra suu ɓǝǝ daŋdaŋ. (Mor Lewitien joŋra suu ɓǝǝ daŋdaŋ ne zahzyil vaŋno kal za joŋzahsyiŋ ɓe.) 35 Syiŋ suŋwii ah a pǝlli, za joŋzahsyiŋ ara ye ne yeɓ ka joŋ syiŋ suŋwii ne nǝm faɓal mai za mo ŋgom ka joŋ syiŋ ne ka mo so rera nǝǝ ah ta, so ka sǝǝ syiŋ fazwan ne syiŋ suŋwii.

So juura pel yaŋ Masǝŋ faɗa. 36 Goŋ Ezekias ne za pãa daŋ laara pǝ'nyahre, mor Masǝŋ gbah jol ɓǝǝ lwaara joŋ yeɓ ah daŋ vǝr gwari.