Petar ne Kornelius
1 Dǝɓ ki no yaŋ Kaiseria a ɗii ne Kornelius, ako ye kapten sooje Romanen mai moo ɗiira ne “Kul Sooje Italia”. 2 Dǝɓ ah dǝɓ iŋ yo, a ɗuu Masǝŋ ne za yaŋ ah daŋ, a gbah jol za masyak mo kǝsyil Yahuduen pǝlli, a juupel wo Masǝŋ cẽecẽe. 3 Comki ne cok com sai ma ne lilli, kwo fanne, kwo angelos dan ge wol ah ɓǝr yaŋ faa nyi ko: Kornelius. 4 Kornelius ɓaŋ nahnǝn pee wol ahe, gal re ko pǝlli, so faa: A fẽe ye ne Dǝɓlii? Angelos faa nyi ko: Masǝŋ laa juupel ɓo ɓe, tǝkine ɓǝ fan mai moo gbah jol za masyak ne daŋ, tǝ foo ɓǝ ahe. 5 Zǝzǝ̃ǝko mo pee za ge yaŋ Joppe, ka mo ge ɗiira Simon ma ɗii ne Petar ge ne ko. 6 Ɗǝr ɓo yaŋ Simon maki ahe, pa ṽǝŋ wak yo, yaŋ ah a kah mabii gwari. 7 Ne cok angelos mai mo faa ɓǝ nyi ko mo kalle, Kornelius ɗii za kǝsyil za yeɓ ah gwa, so ɗii dǝɓ vaŋno kǝsyil sooje ma byak ko, dǝɓ ah a ɗuu Masǝŋ. 8 Kee ɓǝ fan mai mo joŋ daŋ nyi ra, so pee ra kal ge yaŋ Joppe.
9 Na tǝ'nan ah mo tǝ gara tǝ fahlii mo so ge daira kah yaŋ Joppe gwari, Petar yee ɓo zahdǝǝ sǝŋ ne com kǝsyitǝtǝl ka juupelle. 10 Ka koŋ i ko ɓo tǝ 'yah farel ka renne, amma ka tǝ joŋra farel ah joŋ ba, Petar lolomme. 11 Kwo sǝŋ gbǝrri, so kwo fan ki tǝ ɗǝr ginni, a tǝgbana godel ma'man ahe, uu ɓo ne nyah ah nai daŋ, so ɗǝr ge tǝ sǝrri. 12 Zahban fan ma ne ɓal tǝ nai daŋ a ɓǝr ahe, soo tǝ sǝrri, tǝkine zahban juu daŋ. 13 Laa kyaŋ faa ɓǝ nyi ko: Petar, mo ur mo ŋgoŋ re o. 14 Amma Petar zyii faa: Ka nai ya Dǝɓlii, mor me re fan ma ii ma ne 'nahm ah ge zah ɓe taa ya. 15 Kyaŋ so faa ɓǝ nyi ko faɗa: Fan mai Masǝŋ mo faa a pǝsãhe, mo faa sõone a ne 'nahm ka. 16 Fan ah joŋ zahlǝŋ sai, fahfal ah so jin kal ge sǝŋ katãako.
17 So Petar kaa ɓo tǝ foo ɓǝ ahe, fan mai me kwo a 'yah cuu ɓǝ fẽene? Amma ne cok ah sǝ, za mai Kornelius mo pee ra ɓo ka fiira fii yaŋ Simon sye a kẽne ɓe, so ge uura ɓo zahfah o. 18 Ɗiira ɗii ge yaŋ, so fiira fii faa: Simon ma ɗii ne Petar ɗǝr ɓo nyee ne? 19 Ka Petar kaa ɓo tǝ foo ɓǝ fan mai mo kwoko, ne cok ah Tǝ'yak faa nyi ko: Mo laa ɗao, za sai tǝ kyeɓra mo. 20 Mo ur mo ɗǝr ge sǝŋ ka mo ge ne ra, zok gan ah mo re mo ka, mor ame ye pee ra ɓo. 21 So Petar ɗǝr ge wo ɓǝǝ sǝŋ so faa nyi ra: Ame ye dǝɓ mai we tǝ kyeɓɓe, we ge ɓo ne ɓǝ fẽene? 22 Zyiira faa: Kapten Kornelius ye pee ru ge. Dǝɓ sãh ye ko, a ɗuu Masǝŋ, Yahuduen daŋ a sãara ko. Angelos ye faa nyi ko mo ge ɗiiko mo ge yaŋ ah ne ko, mor ka mo laako ɓǝ mai mo ga faa nyi ko. 23 Petar woo ra kal ge yaŋ ne ko, swǝra gŋ.
Tǝ'nan ah urra ɓaŋ fahlii. Za ki kǝsyil wee pam ma yaŋ Joppe swǝra fahlii ah ge ta. 24 Tǝ'nanŋhaa ah ge daira yaŋ Kaiseria ge lwaara Kornelius tai zum ah ra ɓo tǝkine bai 'yah ah ra daŋ tǝ byak tǝl ah ne ko. 25 Ne cok Petar mo tǝ dan ga ɓǝr yaŋ, Kornelius ge zyaŋ tǝl ah kea ge sǝŋ mor ɓal ah so ɗǝŋ ge sǝŋ pel ahe. 26 Amma Petar gbǝ ko ur sǝŋ, faa nyi ko: Ame laŋ me ye dǝfuu ta. 27 Fahfal ah kal ne faa ɓǝ ne Kornelius, so dan ge ɓǝr yaŋ, ge lwaa za taira ɓo gŋ pǝpãare. 28 Petar faa nyi ra: Awe ne suu ɓii laŋ we tǝ ɓe, ɓǝ iŋ Yahuduen nyi fahlii nyi dǝɓ Yahuduen ka mo taiko ki ne dǝɓ gwǝǝ wala ka dan ɓǝr yaŋ ah ya. Amma Masǝŋ cuu nyi me ka me kwo koo dǝɓ vaŋno tǝgbana a pǝɓe' wala a ne 'nahm ka. 29 Mor ah ne cok we pepee ge ɗii me, me pee ɗii ɓii ya, me ge ɓo koiko, me 'yah ka me tǝ, we ɗii me ge ɓo tǝ ɓǝ fẽene?
30 Kornelius zyii faa: Zah'nan ah joŋ ɓo nai tǝ'nahko cok ah na mai tǝɗe', me tǝ juupel yaŋ ɓe ne cok com sai ma ne lilli. Ne pel nai sǝ me kwo dǝɓ ki ɓoo mbǝro ɓo a sãh worak worak ge uu pel ɓe ne jaŋ, 31 faa nyi me: Kornelius, Masǝŋ laa juupel ɓo ɓe tǝkine ɓǝ fan mai moo gbah jol za masyak ne daŋ, so tǝ foo ɓǝ ahe. 32 Mo pee dǝɓ ki ge yaŋ Joppe ka mo ge ɗiiko Simon ma ɗii ne Petar ge ne ko. Ɗǝr ɓo yaŋ Simon pa ṽǝŋ wakke, yaŋ ah a kah mabii gwari. 33 Mor ah me pepee ge wo ɓo gwari, so mo joŋ pǝsãh mo ge daini. Zǝzǝ̃ǝko ru tai ɓo pel Masǝŋ nyee daŋ mor ka laa ɓǝ mai daŋ Dǝɓlii mo nyi ɓo mo ka faani.
Ɓǝ faa Petar yaŋ Kornelius
34 Petar tǝŋ ɓǝ faa: Zǝzǝ̃ǝko me tǝ ɓe 'manna, Masǝŋ ka joŋ za camcam ya. 35 Mor kǝsyil zahban daŋ koo zu ye mo tǝ ɗuu ko gŋ tǝkine joŋ fan matǝ goŋga ɓe, a laa pǝ'nyahre. 36 Ɓǝ'nyah mai Masǝŋ mo pee ge wo za Israel ka mo lwaara jam ne Yesu Kristu mai ako ye mo Dǝɓlii za daŋ we tǝ ɓǝ ah ɓe. 37 Awe tǝ ɓǝ mai mo tǝŋ sǝr Galile fahfal Yohana mo cuu ɓǝ baptisma gŋ ɓe, ɓǝ ah so ge myah sǝr Yudea ne lii ah daŋ. 38 So we tǝ ɓǝ mai Masǝŋ mo nyi swah nyi Yesu ma yaŋ Nazaret ne Tǝ'yak Matǝdaŋdaŋ, mo kyãh cok daŋ ne joŋ yeɓ masãh ah ne laɓ za mai Satan mo tǝ gaɓ ra daŋ, mor Masǝŋ no ne ki. 39 Aru ye za syedowal ɓǝ fan mai mo joŋ pǝ sǝr Yudea tǝkine yaŋ Jerusalem daŋ. Ira ko pǝ wul ne ɓaa ko wo kpuu. 40 Amma ne zah'nan sai ah Masǝŋ ur ko pǝ wulli, so nyi swah nyi ko ka cuu suu ah caŋryaŋ. 41 Cuu nyi za daŋ ya, amma cuu nyi ru za mai Masǝŋ mo syen ru ɓo kǝpel tǝgbana za syedowal ahe, aru za mai ru re fan ne ki tǝkine zwah fan ne ki fahfal Masǝŋ mo ur ko gin pǝ wulli. 42 So faa nyi ru ka ru cuu nyi zana, ako ye Dǝɓ mai Masǝŋ mo kan lakaali ɓo ne ki tǝ za ma ne cee tǝkine za ma wul daŋ. 43 Mor profetoen daŋ joŋra syedowal tǝl ah faara: Koo zune mo nyiŋ ko daŋ faɓe' dǝɓ ah ga rwah ga lal mor tǝɗii ahe.
Za mai mo ye ka Yahuduen a ɗǝǝra Tǝ'yak Matǝdaŋdaŋ
44 Ne cok ah ka Petar tǝ faa ɓǝ faa ba, Tǝ'yak Matǝdaŋdaŋ ɗǝr ge tǝ za mai mo tǝ laara ɓǝ faa ah daŋ. 45 Yahuduen ma iŋ ah mai mo gera gin yaŋ Joppe ge ɓo ne Petar, ne cok mo kwora Masǝŋ mo pee Tǝ'yak Matǝdaŋdaŋ ge tǝ za mai mo ye ka Yahuduen a, ŋhaa kaara tǝ ɓǝ ah gǝriŋ. 46 Mor laara mo tǝ faara ɓǝ ne zah camcam tǝkine yii Masǝŋ. So Petar faa: 47 Za mai mo ɗǝǝra Tǝ'yak Matǝdaŋdaŋ ɓo tǝgbana na ta na so gak cak ra ne nyiŋ baptisma ma ne bii ne? 48 So faa nyi ra ka mo nyiŋra baptisma pǝ tǝɗii Yesu Kristu. So fiira ko ka mo kaako wo ɓǝǝ zah'nan nje.
© Bible Moundang © Alliance Biblique du Tchad, 1996.
