Fakwan tǝkine fan matǝ caŋryaŋ mai Paulus mo kwo
1 Sai me ga yii suu ɓe, so me tǝ laŋ ɓe, ɓǝ ah ka pǝsãh ya. Amma zǝzǝ̃ǝko me ga faa ɓǝ fakwan tǝkine fan matǝ caŋryaŋ mai Dǝɓlii mo cuu nyi me. 2 Ame tǝ dǝɓ eklesia maki ah vaŋno, syii ah joŋ ɓo jemma tǝtǝl nai ɓe, ɓaŋra ko kal ge coksǝŋ maɗǝk tǝ kǝraɓ ah ne ko. Ɓaŋra ko ɓe 'manna ne? Wala kwo fan ɓo ne? Me tǝ ya, sai Masǝŋ ye tǝ ɓo to. 3-4 Oho me tǝ ɓe, ɓaŋra dǝɓ ah kal ge Paradis ne ɓe, ge laa ɓǝ faa mai dǝfuu mo laa ge sok taa ya gŋ, zah dǝfuu ka gak faa ɓǝ ah ya. Me so faa faɗa, ɓaŋra ko kal ge gŋ 'manna ne? Wala kwo fan ɓo ne? Me tǝ ya, sai Masǝŋ ye tǝ ɓo to. 5 Me ga yii suu ɓe tǝ ɓǝ dǝɓ ahe, amma me ka tǝ ga yii suu tǝ ɓǝ suu syak ɓe ya, sai tǝ fan mai moo gak cuu tǝtǝ̃ǝ ɓe gin lal to. 6 Koo me tǝ 'yah ka yii suu ɓe ko laŋ, me ka gak ciŋ tǝgwĩi tǝ ɓǝ ah ya, mor me tǝ ga faa goŋga. Amma me tǝ ɗuu gal yii suu ɓe, mor me 'yah ka dǝɓ mo foo ɓǝ malii ma kal tǝ mai mo kwo me tǝ joŋni, tǝkine mai mo laa me tǝ faa tǝtǝl ɓe ka.
7 Amma mor ka cak me ka me yii suu ɓe tǝ ɓǝ fan malii matǝ caŋryaŋ mai me kwo ka, mor ah kan syem nyi me pǝ suu ka gaɓ me, syem ah ge wo ɓe tǝgbana papee Satan ka gban me, ka cak me, ka me yii suu ɓe ka. 8 Me juupel wo Masǝŋ tǝ ɓǝ ah ɓal sai, me fii ko ka mo nĩi syem ah wo ɓe ge lalle. 9 Amma zyii faa nyi me: Gboŋgboŋ ɓe kii mo ɓe, mor ne cok mo pǝtǝtǝ̃ǝ ɓe, swah ɓe ga swaa mo ba. Mor ahe, me laa pǝ'nyah pǝlli ka me so yii suu ɓe ne tǝtǝ̃ǝ ɓe mor ka me laa swah Kristu mo tǝ syee ne me tǝ ɓe. 10 Me tǝ laa pǝ'nyah ne tǝtǝ̃ǝ ɓe, mor tǝǝ camcam, ne bone camcam, ne foo mor tǝkine gaɓ camcam daŋ me tǝ laa mor Kristu. Mor ne cok me pǝtǝtǝ̃ǝre, ka me so pǝswahe.
Paulus swaa ɓǝ eklesia yaŋ Korint
11 Ame tǝ faa ɓǝ tǝgbana me ye tǝgwĩi, amma awe ye joŋ me ne swah ciŋ ɓo. Kǝnah awe ye za ma yii me. Mor koo me ye ka fan ki ya laŋ, me ka ne fahlii ka yea na fan ma fahfal ah wo zapee ɓii maluu rao ya. 12 Fan mai moo gak cuu ame ye papee, ako ye yeɓ mai me joŋ kǝsyil ɓii tǝkine rõm ɓǝ, fan ah ra a na fan ma cuu fanne, na fan matǝ gǝriŋ tǝkine dǝǝbǝǝri. 13 Ame gbǝ we ɓo cam ne eklesia manyeeki ah ne? Sai mai me gaɓ we ne 'yah fan jol ɓii ya to ya ne? We rõm me tǝ ɓǝ ah me joŋ ɓo ka pǝsãh ya!
14 Zǝzǝ̃ǝ me tǝ kyeɓ fahlii ka ga ẽe we patǝ sai ah ye nyẽeko, me ka tǝ ga gaɓ we ne syea fan jol ɓii ya, me tǝ 'yah syiŋ suu ɓiiri, me ka tǝ 'yah lak ɓii ya. Mor wee ye ka kyeɓ lak wol za ɓǝǝ ne ya, amma za wee yee kyeɓra wol wee ɓǝǝ ne ko. 15 Ame ne suu ɓe, me ga laa pǝ'nyah ne ɓeɓ fan mai mo jol ɓe tǝkine suu syak ɓe daŋ, mor ka gbah jol ɓiiri. So ma ɓii we so ga 'yah me biŋ nai sǝ o, mor me tǝ 'yah we pǝlli ne?
16 Awe gak zyii ɓǝ mai me ka rǝk faswaa tǝ ɓii ya ko. Amma za ki ga faara me tǝ kǝǝ we, me gbǝ we ɓo ne berre. 17 We ẽe ɓo ɗǝne? Me joŋ vǝrvǝr wo ɓii ne dǝɓ ki vaŋno kǝsyil za mai me pee ra ge wo ɓii ɓe ne? 18 Me pee Titus ka mo geko wo ɓiiri, ame pee naa pa man mai we tǝ ko ɓe ga ne ki, ka mo ge fiiko we, Titus nyiŋ fan jol ɓii ɓe ne? Ru ka joŋ yeɓ tǝ vaŋno ya ne? Syel ɓuu ka tǝki vaŋno ya ne?
19 Maki daga ɓaaɓe, we yea ma tǝ lǝŋ ru tǝ kyeɓ ka joŋ suu ɓuu njaŋ ye pel ɓiiri. Ka nai ya! Aru tǝ faa ɓǝ tǝgbana mai Kristu mo tǝ 'yahe, wee pa ɓe, fan daŋ mai ru tǝ joŋ pel Masǝŋ, ru tǝ joŋ ka gbah jol ɓiiri. 20 Ame tǝ ɗuu galle, mor ne cok me ge wo ɓii ɓe, me ka ga lwaa we na mai me 'yah ya, awe laŋ we ka lwaa me na mai we tǝ 'yah ya ta. Me tǝ ɗuu galle, mor maki me ge wo ɓii ɓe, me ga lwaa syelle, tǝwonni, ɓaŋ kpãhe, balle, ɓǝ faa maɓea ahe, faŋ valle, yii suu, tǝkine fan joŋ tǝ haihai kǝsyil ɓiiri. 21 Me tǝ ɗuu galle, mor ka ne ga ɓe ma fahfal mai Masǝŋ ɓe mo ge won me pel ɓiiri, me ga yeyee tǝ za mai mo joŋra faɓe' ɓo daga ɓaaɓe, mo so zyiira toobii ka soɓ ɓǝ 'nahm ɓǝǝ ne joŋ ɓǝǝ tǝkine tǝkoi mai mo tǝ joŋra ya.
© Bible Moundang © Alliance Biblique du Tchad, 1996.
