Yunatan gbǝ zah ne David
1 Ne cok David mo vǝr ɓǝ faa ne Saul, Yunatan we goŋ Saul 'yah David pǝlli, 'yah ko tǝgbana suu ahe. 2 Daga com ah sǝ Saul ɓaŋ David soɓ ko ge yaŋ pah ah yao. 3 Yunatan gbǝ zah ne David, mor a 'yah ko na suu ahe. 4 Yunatan wǝǝ mbǝro gin sol ah nyi David tǝkine fan wo suu ah ra ne kafahe ah ne saŋ ah tǝkine ganda ah daŋ nyi nyi. 5 David a ga cok daŋ Saul moo pee ko ga gŋ, Saul ɓaŋ ko kan dǝɓlii tǝ za sal ne ko. Za daŋ a laara ɓǝ ah pǝ'nyah tǝkine zaluu yeɓ Saul daŋ.
Saul tǝŋ joŋ tǝwon ne David
6 Ne cok mo tǝ ginra yaŋ fahfal David mo jin gin cok in Filistiyo, ŋwǝǝ yaŋ Israel daŋ pǝ̃ǝra ne lǝŋ tǝkine dǝdaa zah fan kyẽm mai mo tǝ woŋra ka zyaŋ tǝ goŋ Saul. 7 Ŋwǝǝ ma joŋra kyẽm zyiira lǝŋ zahki faa: Saul ik ujenere vaŋno, David ik mǝ ah ujenere jemma. 8 Saul laa ɓǝ ah pǝ'nayhr a, ɓaŋ kpãh pǝlli, so faa: Nyira nyi David ujenere jemma, ma ɓee nyira nyi me ujenere vaŋno to, mai coŋ ɓo tǝ yah kaa goŋ ye to o. 9 Daga com ah sǝ, Saul tǝŋ ẽe David ne nahnǝn ɓe' ŋhaa ge pelle.
10 Tǝ'nan ah tǝ'yak ɓe' gee wo Masǝŋ ge tǝ Saul, joŋ fan tǝgǝǝ yaŋ na tǝcemme. Amma David woŋ tǝnjuŋ nyi ko tǝgbana moo woŋ ɓaa. So zǝǝ no mor jol Saul. 11 Saul daɓ zǝǝ ah faa: Me ga swǝ David ga wo yaŋ ne zǝǝ maiko. So Saul 'nǝǝ David ne zǝǝ com ah zahlǝŋ gwa, David ǝ̃ǝ pel ah zahlǝŋ gwa daŋ.
12 Saul ɗuu gal David mor Dǝɓlii no ne ki, amma Dǝɓlii soɓ jol gin wo Saul ɓe. 13 Saul ɗǝǝ tǝgǝǝ ne David nje, so Saul ɓaŋ ko kan dǝɓlii tǝ za ujenere ne ko. David a pǝ̃ǝ syee pel zana. 14 David ne pejii pǝzyil yeɓ ah daŋ mor Dǝɓlii no ne ki. 15 Ne cok Saul mo kwo David mo ne pejii naiko, so ɗuu gal ahe. 16 Za Israel ne za Yuda daŋ a 'yahra David, mor ako ye dǝɓlii masãh ahe.
David kan mǝlaŋ Saul
17 Saul faa nyi David: Me ga nyi Meraɓ mǝlaŋ ɓe malii nyi mo kanne. Amma mo joŋ yeɓ dǝɓ swah nyi me, mo ruu sal Dǝɓlii. (Saul foo ɓǝ faa: Ame ye me i ko ne jol ɓe ka, amma Filistien ye mo ira ko.) 18 David zyii zah Saul faa: Azu ye me ne zum ɓe ra tǝkine morsǝ̃ǝ ɓe kǝsyil za Israel ka me joŋ bǝǝ ne goŋ sye ne? 19 Amma cok ah mo ge ka mo nyira Meraɓ mǝlaŋ Saul nyi David ka kan o, so ɓaŋra nyi Adriel Meholatiyo.
20 Amma Mikal mǝlaŋ Saul 'yah David. Ge faara ɓǝ ah nyi Saul, so ɓǝ ah 'nyah suu ahe. 21 Saul faa: Me ga nyi ko nyi David amma a ga yea wol ah tǝgbana mǝmmǝǝ, Filistien ga ira ko. Saul faa ɓǝ nyi David ɓal gwa ahe: Tǝ'nahko mo ga joŋ bǝǝ ne me. 22 Saul faa nyi za yeɓ ahe: We faa ɓǝ ne David pǝ muŋ 'yaŋ, we faa nyi sye: Mo ẽe goŋ a laa pǝ'nyah ne mo, za yeɓ goŋ daŋ laŋ a 'yahra mo, zǝzǝ̃ǝko mo joŋ bǝǝ ne goŋ o. 23 Za yeɓ Saul faara ɓǝ ah nyi David naiko. Amma David zyii zah ɓǝǝ faa: We kwan joŋ bǝǝ ne goŋ sye nahnǝn ɓii pǝlaŋ ne? Ame laŋ me ye pa syakke, me ye ka fan ki ya. 24 Za yeɓ Saul ge keera ɓǝ mai David mo faa daŋ nyi ko. 25 Saul so faa: We ge faa nyi David sye: Goŋ ka tǝ 'yah lak 'yah ŋwǝǝr a, amma a 'yah zahfar gãhnyah Filistien temere ka faŋ val tǝ za syiŋ ahe. Amma pǝ ɓǝ foo zahzyil Saul a 'yah David mo wǝ ne jol Filistien. 26 Za yeɓ Saul ge keera ɓǝ ah mo faa nyi David. Ne cok David mo so laa naiko, ɓǝ ka joŋ bǝǝ ne goŋ 'nyah suu ah no cam. Ka zah'nan kan ah laŋ ge ya ba, 27 David ur ne zan ah kalra ge ik za kǝsyil Filistien temere gwa. So David ge ne zahfar gãhnyah ɓǝǝ ge nyira nyi goŋe, kee baa ɓo tǝɗe'. Saul ɓaŋ mǝlaŋ ah Mikal nyi ko.
28 Saul ẽere, tǝ ɓe, Dǝɓlii no ne David, za Israel daŋ tǝ 'yahra ko ta. 29 So ɗuu gal David ge pelle. Saul ciŋ pa syiŋ David lii.
30 Za goŋ Filistien pǝ̃ǝra ka ruu salle, amma ne cok moo pǝ̃ǝra daŋ, David yea ne pejii kal za yeɓ Saul daŋ. Tǝɗii ah yii pǝyǝk pǝlli.
© Bible Moundang © Alliance Biblique du Tchad, 1996.
