Dǝɓlii ɓeɓ yaŋ Jerusalem
1 Dǝɓlii ɓaŋ kpãh joŋ cokfuu ge tǝ yaŋ Sion.
Dǝɓlii fer yaŋ ah mo yea wol ah pǝyǝk kŋ ciŋ gboŋ ɓe.
Ne zah'nan mai Dǝɓlii mo ɓaŋ kpãh ɓo ne ko,
Koo yaŋ mai moo juura pel wol ah gŋ laŋ,
Soɓ ɓoo ɓe.
2 Dǝɓlii ɓeɓ yaŋ
Yuda vaŋno vaŋno daŋ bai kwan syakke.
Hah yaŋ maswah ah ra mai moo byakra sǝr ah ne ge sǝŋ.
Cuu swãa sǝr ah ne za goŋ ah daŋ.
3 Lee swah Israel daŋ ge sǝŋ jol kpãh ah mo ɓaŋ ɓo pǝ'manne.
Zyii gin gbah jol ɓuu ne cok pa syiŋ ɓuu mo ge ka cak zah ɓuu ya.
Ɓaŋ kpãh tǝ ɓuu pǝ'manne, ɓeɓ fan ɓuu daŋ.
4 Dǝɓlii yil saŋ ah ɓaŋ guu kan ge nyi ru na pa syiŋ ɓuuru.
Ik fan ma joŋ ru laa pǝ'nyah daŋ pǝ wulli.
Ɓaŋ kpãh tǝ ɓuu za yaŋ Jerusalem pǝ'manne.
5 Dǝɓlii ɓeɓ za Israel na pa syiŋ ɓǝǝra.
So soɓ yaŋ ɓǝǝ maswah ra ne yaŋ goŋ ɓǝǝ ra daŋ ciŋ gboŋni.
Ge ne ɓǝ swaa magaɓ ah tǝ za Yuda.
6 Dah yaŋ Masǝŋ mai ruu juupel wol ah gŋ ge sǝŋ.
Dǝɓlii joŋ za yaŋ ɓǝ fĩi mai moo joŋra tǝkine zah'nan com 'yak daŋ.
Dǝɓlii cuu swãa goŋ tǝkine pa joŋzahsyiŋ gwa daŋ ne kpãh mai mo ɓaŋ ɓo.
7 Dǝɓlii 'yah cok joŋ syiŋ ah yao,
Soɓ yaŋ ah laŋ ɓoo ɓe ta.
Soɓ za syiŋ ɓuu hah vuu ah ra ge sǝŋ.
Ŋwaara ɓǝ pǝ'man pǝ yaŋ Dǝɓlii,
Na mai ru yea tǝ joŋ ah ne cok ruu joŋ fĩi Dǝɓlii gŋ.
8 Dǝɓlii faa zye ga dah ɓaale yaŋ Jerusalem ga sǝŋ.
Lii ɓaale ah pǝsãhe,
Mor ka ɓeɓ belbelle.
Yaŋ byak cok maswah ra tǝkine ɓaale ra daŋ lea ge ɓo sǝŋ tǝki gǝdǝɓ.
9 Zahfah ah ra lea ge sǝŋ ɓe,
Kpuu coo ah ra hah ɓe ta.
Goŋ tǝkine zaluu sǝr daŋ kalra ge pǝ byak ɓe.
Dǝɓ ma cuu ɓǝ Masǝŋ nyi zan kǝkao.
Profetoen laŋ, Dǝɓlii ka faa ɓǝ nyi ra yao.
10 Za tam yaŋ Jerusalem haira tǝ sǝrri, ɓǝ jur zah ɓǝǝr a,
Rǝkra sǝr ge tǝtǝlli,
So ɓaara mbǝro dahsuu kaa ne ko.
So wee maŋwǝǝ ɗǝmra tǝtǝl ge sǝŋ.
11 Nahnǝn ɓe ka pǝswah yao jol yee me tǝ yeeni.
Ɓǝ foo tǝ yah in me.
Swah vǝr wo ɓe jol ɓǝ foo mai me tǝ foo tǝ ɓǝ ɓeɓ mai mo ge ɓo tǝ za ɓe.
Wee nyee tǝkine wee ma zahwon daŋ tǝ wukra koŋ bii tǝgǝǝ yaŋ haihai.
12 Koŋ farel tǝkine koŋ bii daŋ i ra ɓo,
A yera yee wo ma ɓǝǝra,
A kiŋra lea ga sǝŋ tǝ fahlii tǝgbana dǝɓ i ra ɓo ne nwãhe.
So a leara wul tǝ jol ma ɓǝǝra.
13 Me so faa ɗah ɓǝ fẽe nyi mo ne Jerusalem?
Me joŋ ɗah ɗii ka wuu zahzyil nyi mo ne Jerusalem?
Dǝɓ ma laa bone tǝgbana ma ɓo nyẽe kǝka.
Ɓeɓ mai mo ge ɓo tǝ ɓo a pǝ'manne,
Zahtǝmgboo ah kǝka tǝgbana mabii malii.
Dǝɓ ma gak ǝ̃ǝ mo pǝzyil ah kǝka.
14 Profetoen ɓo ra yea tǝ faara ɓǝ ki nyi mo ya sai berre.
Zyakra mo ne ɓǝ cuu ne mai mo ka joora faɓe' ɓo gin lal a,
Ka mo lǝŋ mo ka ne faɓe' ka toobii tǝl ah ya.
15 Za ma gin pǝ̃ǝ nyee daŋ a ẽera mo,
Mo lee ɓo sǝŋ,
A wera tǝwel a cikra tǝtǝl syak mo Jerusalem ne ko.
A faara: Yaŋ masãh lii kŋ koi ne?
Yaŋ mai dunia daŋ mo gbǝ yǝk ɓǝ ah ɓo kŋ koi ne?
16 Za syiŋ ɓo a syakra mo!
A ẽera mo rikrik ne nahnǝn ɓe'.
A wera tǝwel so ǝǝ zah ne syak a faara:
Mai gak uu ne ru ɗǝ ya,
Zah'nan mai ru yea tǝ kyaŋ ah ko ge ɓo nyẽeko.
17 Dǝɓlii joŋ fan mai mo faako ɓǝ ah zye ga joŋ kŋ ɓe.
Ɓeɓ na bai kwan syak tǝ man na mo faako ɓaa kǝpelle.
Soɓ za syiŋ man kaa swah tǝ mana,
A joŋ ra laa pǝ'nyah tǝ ɓǝ lee man na lee ɓo sǝŋ.
18 Jerusalem, mo yeyee, mo 'meere,
Ŋhaa ka cii yee ɓo mo dai Dǝɓlii.
Mo soɓ mĩi yee ɓo ɗuu na bii pǝ el com ne suŋ daŋ.
Mo yeyee tǝkine swaa ɓǝ ŋhaa ka swah ɓo mo vǝrri.
19 Ne suŋ ɓe, mo ur kaa sǝŋ ka mo yeyee,
Mo so ur kaa sǝŋ ka mo yeyee wo Dǝɓlii,
Mo kaa suŋ ne ko.
Mo kee ɓǝ ɓǝr ɓo daŋ ge nyi Dǝɓlii lalle,
Mo pǝǝ ko mor ɓǝ wee ɓo mai mo tǝ wukra koŋ tǝgǝǝ yaŋ haihai.
20 Mo ẽe ɗao Dǝɓlii,
Mo ẽe za mai mo tǝ joŋ ra laa bone ko ɗao.
Ŋwǝǝ a renra nǝǝ wee mai mo bemra ne suu ɓǝǝra,
So ɓǝr yaŋ Masǝŋ laŋ,
Za ik za joŋzahsyiŋ ne profetoen gŋ.
21 Wee nyee ne zaluu daŋ wul ɓǝǝ myah ɓo tǝ fahlii tǝgǝǝ yaŋ haihai.
Ikra tǝbanna ne ŋwǝǝ daŋ ne kafahe.
Ne cok mo ɓaŋ kpãhe, mo ik ra bai kwan syak tǝ ɓǝǝra.
22 Mo ɗii za syiŋ ɓe ka mo ge joŋra fĩi ɓeɓ cokki.
Dǝɓ ma gak ɗuu ǝ̃ǝ ne zah'nan ah mo ɓaŋ kpãh ɓo ne ko kǝka.
Wee ɓe mai me wol ra,
So me 'yah ra ɓo ta,
Ikra ra vǝr ɓe.
© Bible Moundang © Alliance Biblique du Tchad, 1996.
