Yesu faa ɓǝ ɓeɓ yaŋ Masǝŋ
(Mk 13:1-2Lu 21:5-6)1 Yesu pǝ̃ǝ gin pǝ yaŋ Masǝŋ. Ne cok mo tǝ ganne, za syee mor ah gera wol ah mor ka cuu yaŋ Masǝŋ mo vuu ɓo nyi ko. 2 Amma Yesu zyii faa nyi ra: We kwo fan mai daŋ ɓe ne? Me faa nyi we goŋga, koo tǝsal ah vaŋno ka ga coŋ sǝŋ nyee ya, a ga hah ga sǝŋ daŋ tǝɗe'.
Bone mai moo ga ge kǝpel vǝr sǝrri
(Mk 13:3-13Lu 21:7-19)3 Ne cok Yesu mo kaa ɓo tǝ waa Ma Ne Tǝbaakãmme, za syee mor ah gera wol ah syak ɓǝǝra, fiira ko faa: Mo faa ɓǝ fan mai moo ga joŋ nyi ru ɗǝ, a ga joŋ nekẽne? Fan ma cuu cok gin ɓo tǝkine zah'nan vǝr sǝr ako fẽene?
4 Yesu zyii faa nyi ra: We joŋ yella ka dǝɓ mo zyak we ka. 5 Mor za pǝlli ga gera pǝ tǝɗii ɓe a ga faara: Ame ye Kristu. A ga zyakra za pǝlli. 6 We ga laa sal tǝ ruu kah ɓii gwari, we ga laa ɓǝ ah ga lal pǝɗǝk ta, ka we ɗuu gal ɓǝ ah ka. Mor fan ah a ga joŋ, amma ka vǝr sǝr ye ka ba. 7 Za ki ga ruura sal ne za ki, goŋ ki ga ruu sal ne goŋ maki ahe, koŋ ga wuu, sǝr ga coo pǝ sǝr camcam ta. 8 Fan marai daŋ bone ma kǝpel ah moo ga ge yo.
9 So za ga gbahra we mor ka cuu bone nyi we. A ga ikra we pǝ wulli. Za daŋ a ga syiŋra we mor ɓǝ ɓe. 10 Ne cok ah za pǝlli ga zyakra fahlii, a ga joŋra tǝkor ki, a ga syiŋra ki. 11 Profetoen maber ga pǝ̃ǝ pǝpãare, a ga zyakra za pǝlli. 12 Mor ɓǝɓe' ga yea cok daŋ, mor ah kǝlii za 'yah ɓǝǝ ga wuu pǝwokki. 13 Amma dǝɓ mo uu pǝsãh gŋ ŋhaa mo vǝr ne sõo ɓe, a ga ǝ̃ǝ. 14 Kǝpel ah a ga cuura Ɓǝ'nyah Goŋ ah mai wo za sǝr daŋ, mor ka joŋ syedowal wo za daŋ. So fahfal ah sǝr ga vǝrri.
Ɓeɓ maɓe'
(Mk 13:14-23Lu 21:20-24)15 We ga kwo ɓeɓ maɓe' mai profeto Daniel mo faa ɓǝ ah a ga uu pǝ cok matǝdaŋdaŋ. Dǝɓ mo kee ɓǝ ah ɓe, mo laako mor ahe. 16 So za mai mo no sǝr Yudea, mo ɗuura ge tǝ waare. 17 Dǝɓ mo zahdǝǝ sǝŋ ne cok ah ɓe, mo ɗǝrko ge ɓǝr yaŋ ah ka woo fan gŋ ka. 18 Dǝɓ mo 'wahe, mo pii sooko ge yaŋ ka ɓaŋ mbǝro ah ka. 19 Mor ne zah'nan ah bone ga yea wo ŋwǝǝ ma ne ɓil tǝkine ŋwǝǝ ma ne wee jolle. 20 We pǝǝ Masǝŋ mor ka cok ɗul ah mo ge joŋ ne cok gwahl wala ne com 'yak ka. 21 Mor ne cok ah bone malii tǝ ga ge, daga Masǝŋ mo joŋ fanne, ŋhaa tǝ'nahko, bone ma na mai ge taa ya, ka so ge laŋ yao ŋhaa ga lii. 22 Dǝɓlii mo tǝr zah'nan ah ra ya ɓe, koo dǝɓ vaŋno ka yea ne cee ya, amma Dǝɓlii tǝr zah'nan ah mor zan ah mai mo syen ɓo.
23 So dǝɓ ki mo ge faa nyi we: We ẽe Kristu no nyeeno, wala a ŋhaano, we nyiŋ ɓǝ ah ka. 24 Mor Kristu maber tǝkine profetoen maber a ga pǝ̃ǝra, a ga joŋra fan matǝ gǝriŋ ah tǝkine dǝǝbǝǝri mor ka zyak za mai Masǝŋ mo syen ra ɓo, moo gakra ɓe ko. 25 Amma me faa nyi we kǝpel ahe, ka we joŋ yella.
26 Mo ge faara nyi we: We ẽe a no cokki, ka we ge gŋ ka, wala mo faara nyi we: A no muŋ ɓo nyeeno, we nyiŋ ɓǝ ah ka. 27 Mor tǝgbana bam moo sãh coksǝŋ ŋhaa moo ur gin morcomzah'nan ga dai morcomlilli, We Dǝfuu laŋ a ga ge nai ta. 28 Cok mai wul fan mo gŋ ɓe, vak taira ga gŋ ta.
Gin We Dǝfuu
(Mk 13:24-27Lu 21:25-28)29 Fahfal zah'nan bone ah gwari sǝ, com ga joŋ pǝfuu, fĩi ka sǝǝ ya, ŋwǝǝmǝŋgai sǝŋ ga leara gin sǝŋ, swah mai mo coksǝŋ daŋ a ga laŋ. 30 So fan ma cuu gin We Dǝfuu a ga cuu tǝlǝǝ sǝŋ, zahban tǝ sǝr daŋ a ga dahra gorre, a ga kwora We Dǝfuu ge tǝ swãh bam sǝŋ tǝkine swah ne yǝk pǝ'manne. 31 Kokõorĩi malii ga ulli, a ga pea angeloi ah ra ga laa sǝr nai daŋ, a ga taira zan ah mai mo syenra ɓo wo sǝr daŋ.
Ɓǝ cuu ma lii ne kpuu wuuri
(Mk 13:28-31Lu 21:29-33)32 We fee ɓǝ ah gin wo kpuu wuuri. Ne cok we kwo jol ah ra tǝ zyee goo ɓe, we tanne, zah bam ge gwari ɓe. 33 Nai ta, ne cok we kwo fan marai daŋ tǝ joŋ ɓe, ka we tǝ gin ah ge gwari ɓe. 34 Me faa nyi we goŋga, za mai ka wukra vǝr daŋ ya, sai fan mai daŋ gin joŋ ɗǝ. 35 Sǝŋ ne sǝr ga vǝrri, amma ɓǝ faa ɓe ka vǝr a syaŋsyaŋ.
Masǝŋ ye tǝ zah'nan vǝr sǝr ɓo to
(Mk 13:32-37Lu 17:26-30Lu 34-36)36 Amma koo dǝɓ vaŋno tǝ zah'nan ah ne cok com gin ah ya. Angeloi laŋ tǝra ya, koo Wel laŋ tǝ ya, sai Pam ye tǝ to. 37 Fan mai mo joŋ ne cok zah'nan Noa a ga joŋ ne cok We Dǝfuu mo ga ge nai ta. 38 Ka bii malii ɓah gin a ba, za ryakra fanne, zwahra fanne, kanra ŋwǝǝre, wala a nyira wee ɓǝǝ maŋwǝǝ nyi wǝǝre, ŋhaa joŋra nai Noa dan ɓǝr dah ne sõo, 39 ɓaŋra syiŋ ɓǝ ki ya ŋhaa bii ge woo ra daŋ. A ga joŋ ne cok We Dǝfuu mo ga ge nai ta. 40 Ne cok ah za gwa a yea tǝ joŋra yeɓ 'wahe, a ga ɓaŋra dǝɓ vaŋno soɓ maki ahe. 41 Ŋwǝǝ gwa a yea tǝ laŋra sum zah nin vaŋno, a ɓaŋ mawin vaŋno, a soɓ maki ahe. 42 We byakke, mor we tǝ zah'nan mai Dǝɓlii ɓii moo ga ge ne ya. 43 Amma we laa ɓǝ ah pǝsãhe. Mor pah yaŋ mo tǝ cok mai nyin mo yah gin yaŋ ah ne ne suŋ ɓe, a kaa byakke, ka soɓ ko gin dan yaŋ ah ya. 44 Mor maiko, we zyeɓ suu ɓii kaa ne ko, mor We Dǝfuu gin dai ne cok mai we ka yea tǝ foo ɓǝ gin ah ya.
Dǝɓ yeɓ masãh ah ne dǝɓ yeɓ maɓe' ahe
(Lu 12:41-48)45 Dǝɓ yeɓ masãh ah ma ne tǝtǝl ko makẽne? Ako ye dǝɓ mai pah yeɓ ah mo soɓ yeɓ byak za yeɓ manyeeki ah jol ah mor ka mo nyi farel nyi ra ne cok ahe. 46 A pǝ'nyah wo dǝɓ yeɓ mai pah yeɓ ah mo ga pii soo ge yaŋ moo gin lwaa ko tǝ joŋ yeɓ ah naiko. 47 Me faa nyi we goŋga, pah yeɓ ah a ga soɓ fan ah daŋ ga nyi jolle. 48 Amma dǝɓ yeɓ maɓe' mo faa pǝ zahzyil ahe: Dǝɓlii ɓe ka pii soo ge gwari ya, 49 mo so tǝŋ loɓ za ma joŋra yeɓ ne ki, kal tǝ ren fan tǝkine zwan fan ne za ma tǝǝ ne yimmi. 50 So pah yeɓ ah a gin dai ne zah'nan mai dǝɓ yeɓ ah mo ka tǝ byak ya, tǝkine cok com mai mo tǝko ya. 51 A ga cuu bone nyi dǝɓ yeɓ ahe, a ga nyi zah fan mǝ ah nyi ko, ne za matǝ vǝrvǝrri, a ga yeyee gŋ tǝkine soŋ syelle.
© Bible Moundang © Alliance Biblique du Tchad, 1996.
