Dǝɓ mai mo kur ɓo laɓ ɓe
1 Comki Petar ne Yohana tǝ gara yaŋ Masǝŋ ne cok com sai ma juupel ma ne lilli. 2 Kah zahfah yaŋ Masǝŋ mai moo ɗiira ne zahfah Masãhe, dǝɓ ki no kur ɓo daga byaŋ ah sǝ, ge kaa ɓo gŋ. Mor zah'nan daŋ a ɓaŋra ko gin kan gŋ ka mo syeako lak jol za ma gara yaŋ Masǝŋ. 3 Ne cok mo kwo Petar ne Yohana mo tǝ ga danra ga pǝ yaŋ Masǝŋ, so syea fan jol ɓǝǝra. 4 Petar ne Yohana ẽera ko, so Petar faa nyi ko: Mo ẽe ru ɗǝ. 5 So dǝɓ ah ẽe ra ne ɓǝ ɓǝrri, lǝŋ zye ga ɗǝǝ fan jol ɓǝǝra. 6 So Petar faa nyi ko: Me ka ne solai ne vãm kaŋnyeeri ya, amma fan mai me no ne ko me ga nyi nyi mo, me faa nyi mo pǝ tǝɗii Yesu ma yaŋ Nazaret mo ur mo syee o. 7 So Petar ɓaŋ jokǝsãh ah gbǝ ko ne ɓaŋ ko ur sǝŋ. Ne cok ah sǝ, ɓal ah tǝkine rõm ah ra daŋ ge pǝswahe. 8 Dǝɓ ah zwǝǝ ge sǝŋ, so uu ne ɓalle, so kyãhe. Fahfal ah so dan ge pǝ yaŋ Masǝŋ ne zapee, a syeeni, a zwǝǝ ga sǝŋ tǝkine joŋ osoko nyi Masǝŋ. 9 Za daŋ kwora ko mo tǝ syeeni, ne moo yii Masǝŋ daŋ. 10 Ne cok mo so tǝra, dǝɓ mai mo yea tǝ kaa kah zahfah Masãh syea fan kŋ yo, so gal re ra ŋhaa kaara gǝriŋ tǝ ɓǝ fan mai mo joŋ ɓo wol ahe.
Ɓǝ cuu Petar pǝ yaŋ Masǝŋ
11 Ne cok dǝɓ ah mo zyii ka soɓ Petar ne Yohana ya, za daŋ kaara gǝriŋ so ɗuura ge wo ɓǝǝ mor daŋki ma ɗii ne daŋki Salomo. 12 Petar mo kwo naiko, tǝŋ ne cuu ɓǝ wo za faa: Awe za Israel, we kaa ɓo gǝriŋ tǝ ɓǝ laɓ dǝɓ mai mor fẽene? We ẽe ru we lǝŋ aru ye joŋ ne yella ɓuu tǝkine swah ɓuu ka ru laɓ dǝɓ mai mo ur syee ne? 13 Masǝŋ Abraham, Isak ne Yakuɓ, Masǝŋ pa man lii ra ako ye yii Dǝɓ yeɓ ah Yesu. Awe ne suu ɓii we soɓ ko nyi zaluuri. Pilatus tǝ kyeɓ kǝnah ka wǝǝ ko, so we faa nyi ko we tǝ ko ya. 14 Ako ye Dǝɓ Matǝdaŋdaŋ ne Dǝɓ Sãhe, amma we ɓoo ko ge lalle we so fii Pilatus ka mo wǝǝko pa in wul nyi we jeertǝ. 15 We i Goŋ Cee pǝ wulli, amma Masǝŋ ur ko gin pǝ wulli, aru ye za syedowal ahe. 16 Swah mai mo no pǝzyil tǝɗii Yesu tǝkine nyiŋ tǝɗii ahe, ako ye nyi swah nyi dǝɓ mai we tǝ kwan ko we tǝ ko ɓo, mor iŋ ah mo nyiŋ Yesu ɓo ako ye laɓ ko ɓo hǝraŋ pel ɓii daŋ.
17 Wee pa ɓe, me tǝ belbel fan mai awe ne zaluu ɓii we joŋ wo Yesu we joŋ ɓo bai tan ahe. 18 Amma Masǝŋ faa ɓǝ ah ɓo kǝpel ne zah profetoen: Kristu ga laa bone, so joŋ ɓǝ ah ge cok ah na mai mo faa ɓo. 19 We toobii, we ge wo Masǝŋ, mor ka mo rwahko faɓe' ɓii ge lalle, Dǝɓlii ga pee cok 'yak ge wo ɓiiri. 20 A ga pee Kristu mai mo nǝǝ ɓo mor ɓii daga ɓaa ge, ako ye Yesu. 21 A ga kaa coksǝŋ ŋhaa ka fan daŋ mo joŋ pǝfuu tǝgbana Masǝŋ mo faa ɓǝ ah ɓo ne zah profetoen ah ra matǝdaŋdaŋ daga ɓaaɓe. 22 Mosus faa: Dǝɓlii Masǝŋ ɓii ga pee Profeto Masǝŋ mai moo ga ur pǝzyil ban ɓii ge wo ɓii tǝgbana mo pee me ta. We ga laa ɓǝ mai moo ga faa nyi we daŋ. 23 Koo zune mo laa ɓǝ faa profeto ah ya ɓe, a ga nĩira ko kǝsyil za Masǝŋ ga lalle, a muŋ. 24 Profetoen mai mo faara ɓǝ daŋ, tǝŋ daga Samuel tǝkine za ma fahfal ah ra daŋ faara ɓǝ zah'nan ma tǝ'nahko. 25 Ɓǝ mai Masǝŋ mo faa ɓǝ ah ne zah profetoen a mor ɓiiri, awe no ne faren pǝzyil ɓǝ gbanzah mai Masǝŋ mo gbǝ ne pa ɓii lii ra, faa nyi Abraham: Me ga ẽe za sǝr daŋ ne morsǝ̃ǝ ɓo ra. 26 So Masǝŋ nǝǝ Dǝɓ yeɓ ah pee ge wo ɓii kǝpelle, mor ka mo ẽeko we mo joŋ koo zune kǝsyil ɓii daŋ mo soɓ yeɓ ɓe' ah ra.
© Bible Moundang © Alliance Biblique du Tchad, 1996.
