Mosus ne Aron gera pel Farao
1 Fahfal ah Mosus ne Aron gera wo Farao, faara nyi ko: Dǝɓlii, Masǝŋ za Israel faa: Mo soɓ za ɓe kalle, ka mo ge joŋra fĩi ka yii me ne kǝsyicokki. 2 Amma Farao zyii faa: Azu ye Dǝɓlii ka me laa zah ah ka soɓ za Israel kal ne? Me tǝ Dǝɓlii ya, so me ka soɓ Israel kal a ta. 3 So faara: Masǝŋ Yahuduen cuu suu ah wo ɓuuru, oseni mo soɓ ru ge kǝsyicok tǝgǝǝ zah'nan sai ka joŋ syiŋ wo Dǝɓlii Masǝŋ ɓuuru, ka mo ikko ru ne syem wala kafahe ka. 4 So goŋ Egiɓ faa nyi Mosus ne Aron: Mor fẽe we woo zan gin tǝ yeɓ ɓǝǝ ne? We soɓ byak rai ge tǝ yeɓ ɓǝǝra. 5 So faa: We ẽe ɗǝ, awe kal Egiɓien ne pãa ɓe, so 'yah ka we soɓ joŋ yeɓ mor fẽene?
6 Com moo sǝ Farao lai kapita tǝkine swah yeɓ ma kǝsyil za Israel faa: 7 We nyi tǝndǝŋ nyi za ka nǝǝ darŋgel ne ko na matãa kao, sai mo ge goora ne suu ɓǝǝra. 8 We joŋ ra nǝǝ darŋgel tǝgbana pãa ah matãa moo nǝǝra, we nǝǝ ge ra lal ka. Ara ye vǝǝkoi, mor maiko tǝ ɓyaŋra ɓǝ ne faa na ge joŋ syiŋ wo Masǝŋ mana. 9 Pǝram na ɓoo yeɓ za mai ge gŋ ka mo gaɓra ne joŋ ahe, ka mo ɓaŋra syiŋ ɓǝ ber kao.
10 Kapita tǝkine swah yeɓ ge faara nyi za Israel: Farao faa zye ka nyi tǝndǝŋ nyi we yao, 11 we ge kyeɓ tǝndǝŋ ne suu ɓii pǝ cok mai we ga lwaa gŋ daŋ. Amma yeɓ ɓii ka so nǝǝ ga lal koo biŋ laŋ ya ta. 12 Za myahra wo sǝr Egiɓ daŋ ka goo zãa zahwaa tǝndǝŋni. 13 Amma kapita a hǝǝra ra faa: We vǝr yeɓ ɓii ma pǝ zah'nan daŋ tǝgbana ma ne cok tǝndǝŋ mo yeani. 14 Loɓra swah yeɓ mai kapita Farao mo rǝkra ra tǝ za Israel, faara: Mor fẽe we baa yeɓ nǝǝ darŋgel ɓii ma tǝ'nah tǝgbana matãa ya ne?
15 Za swah yeɓ za Israel ge yera yee pel Farao faara: Mor fẽe mo joŋ ru na morãi ne goŋe? 16 Ka nyira tǝndǝŋ nyi ru yao. So a faara nyi ru: We nǝǝ darŋgelle. A so loɓra ru, amma ɓǝɓe' ah a wo ɓo . 17 Farao zyii faa: Awe ye vǝǝkoi matǝ tǝɗe'. Mor maiko we faa na ge joŋ syiŋ wo Dǝɓlii. 18 Zǝzǝ̃ǝko we ge joŋ yeɓɓe. Ka nyira tǝndǝŋ nyi we ya, ne daŋ laŋ sai we ga nǝǝ darŋgel baa na matãa. 19 Swah yeɓ za Israel kwora ɓe, rǝ dan pǝ cok magaɓ ne mai mo faara nyi ra: Pǝ zah'nan daŋ we nǝǝ darŋgel na matãa, ka nǝǝ ga lal a.
20 Ne cok mo pǝ̃ǝra gin wo Farao, ge zyaŋra ne Mosus ne Aron tǝ kyaŋra ra. 21 Faara nyi ra: Sai Dǝɓlii ye tǝ ɓǝ ɓiiri, a ŋgoŋ kiita ɓii ba, mor awe ye joŋ ru ka ru yea na za ɓea pel Farao ne pel za yeɓ ah ra, awe ye nyi kafahe ge ra jol ka ikra ru ne ko.
Masǝŋ faa ɓǝ nyi Mosus ne Aron
22 Mosus so faa ɓǝ nyi Dǝɓlii faa: Dǝɓlii, mor fẽe mo joŋ ɓe' wo za mai ne? Mo pee me mor fẽene? 23 Daga me ge wo Farao me faa ɓǝ ne ki pǝ tǝɗii ɓo, a joŋ ɓǝɓe' wo za rai kpǝ, so mo ǝ̃ǝ za ɓo ya syaŋsyaŋ.
© Bible Moundang © Alliance Biblique du Tchad, 1996.
