Akas goŋ Yuda
(2 ZaG 16:1-4)1 Ne cok Akas mo kaa goŋ, ka joŋ syii ɓo jemma gwa, kaa goŋ yaŋ Jerusalem syii jemma tǝtǝl yea. Joŋ fan ma 'nyah suu Dǝɓlii tǝgbana pamlii David mo joŋ ya, amma joŋ fan maɓea ahe. 2 Akas ɓaŋ tǝɓal za goŋ Israel mapãa ah ra. A no ne Ba'al mai mo ɓaŋra ɓo ne vãm syẽ. 3 Tǝǝ syiŋ ɓǝrdi pǝ cok tǝforoŋ we Hinnom, cwah wel ah tǝ wii joŋ syiŋ wo masǝŋ ki ra ne ko, joŋ tǝgbana zahsyiŋ maɓe' ah mo kǝsyil za mai Dǝɓlii mo nĩi ra gin pǝ sǝr ah pel za Israel myahe. 4 Akas a joŋ syiŋ tǝkine tǝǝ ɓǝrdi pǝ cok joŋ syiŋ za gwǝǝre, pǝ cok ma tǝgee sǝŋ ah ra, a joŋ ma mor kpuu maluu ta.
Akas ruu sal ne sǝr Siria ne Israel
(2 ZaG 16:5)5-6 Akas joŋ faɓe', mor ah Dǝɓlii Masǝŋ ah soɓ goŋ sǝr Siria ge nĩi ko, gbah za sǝr Yuda pǝlli kal ge yaŋ Damaskus ne ko. So Dǝɓlii soɓ Peka we Remalia goŋ Israel ge ruu sal ne ki, nĩi ko, ik sooje sǝr Yuda 120.000 ge lal com vaŋno. Dǝɓlii Masǝŋ pa ɓǝǝ lii ra soɓ fan ah joŋ ra nai mor soɓra ko ɓoo ɓo. 7 So sooje Israel maswah ah no a ɗii ne Zikri, i Maaseja we goŋ Akas pǝ wulli, i Azrikam dǝɓ ma lwaa ɓǝ yaŋ goŋ daŋ pǝ wul ta, tǝkine Elkana patǝ gwa goŋ daŋ. 8 Sooje za Israel gbahra ŋwǝǝ wee pa ɓǝǝ za Yuda ne wee ɓǝǝ daŋ 200.000 kalra ge yaŋ Samaria ne ko, woora fan ma lwaa zah sal kal ne pǝlli ta.
Profeto Oded
9 Dǝɓ ki no a ɗii ne Oded, profeto Dǝɓlii yo, kaa ɓo yaŋ Samaria ge zyaŋ ne za sal Israel ne cok mai mo tǝ danra ga tǝgǝǝ yaŋ Samaria, faa nyi ra: Dǝɓlii Masǝŋ pa ɓii lii ra ɓaŋ kpãh tǝ za Yuda, soɓ ra ge mor jol ɓiiri, amma we so ɓaŋ kpãh ik ra ne pǝ wulli. 10 So zǝzǝ̃ǝ mai we 'yah ka joŋ za wǝǝ ne ŋwǝǝ sǝr Yuda ne yaŋ Jerusalem na byak ɓiiri. We tǝ sõone awe laŋ we joŋ faɓe' ɓo wo Dǝɓlii Masǝŋ ɓii ta, we tǝ ya ne? 11 We laa ɓǝ faa ɓe. Za mai we gbah ra ɓo ara ye wee pa ɓii mawǝǝ ne maŋwǝǝre. We soɓ ra kalle, nai ya ɓe, Dǝɓlii ga ɓaŋ kpãh ŋgoŋ kiita tǝ ɓii ne ko.
12 Zaluu ma pel za pǝ sǝr goŋ ma fah kǝsǝŋ ah nai, Azaria we Johanan, Berekia we Mesillemot, Ezekias we Sallum, ne Amasa we Hadlai laara ɓǝ mai za sal mo joŋra ge ne pǝ'nyahr a. 13 Faara nyi ra: We ge nyee ne za mai we gbah ra ɓo ka. Ana joŋ faɓe' wo Dǝɓlii ɓe, na joŋ ko ka mo ɓaŋ kpãh ŋgoŋ kiita tǝ man ne ɓe, so zǝzǝ̃ǝ mai we 'yah ka so joŋ fan mai moo so joŋ ka ɓǝɓe' man mo ge pel ne? 14 So za sal wǝǝra za mai mo gbahra ra ɓo myahe, tǝkine fan ma lwaa zah sal daŋ soɓ ra nyi nyi ra ne zaluu ɓǝǝra. 15 So za matǝ nai mai tǝɗii ɓǝǝ mo ɗii ɗahpel kŋ nyiŋra za mai mo gbahra ra, ɓaara mbǝro mai mo woora zah sal nyi za ma ne suu kolle, maara sǝɓal ge nyi ra ɓalle, nyira farel ne fazwan nyi ra, kanra nǝm ge nyi ra zah nwãh mo wo suu ɓǝǝra, woora za mai mo pǝtǝtǝ̃ǝ mo ka gakra syel a yee tǝ korro. Za mai mo gbahra ra daŋ pii soora ge pǝ sǝr Yuda, gera yaŋ mai kpuu dabonooje mo gŋ pǝlli, ako ye Jeriko. So za sal Israel jinra kal ge fah yaŋ ɓǝǝra.
Akas fii goŋ Asiria ka gbah jol ahe
(2 ZaG 16:7-9)16-17 Edomien so tǝŋ ruura sal ne za sǝr Yuda faɗa, gbahra byak pǝlli. So goŋ Akas pee za kal ge wo goŋ Asiria ka fii ko ka mo gbahko jol ahe. 18 Ne cok moo laŋ, Filistien pǝ̃ǝra sal ge ɓo zah sǝr Yuda, rera yaŋ maluu ma tǝ waa sǝr Yuda nǝfah kǝmorcomlil ne ma fah morkǝsǝŋ ah ɓe. Nyiŋra yaŋ Bet-Semes, Ajalon, Gederot, ne yaŋ Soko, Timnat, ne Gimzo, tǝkine yaŋ manyee ma kah ah ra daŋ, so kaara gŋ. 19 Akas goŋ sǝr Yuda kyeɓ ɓǝɓe' lwaa zan ah ne ko, joŋ faɓe' wo Dǝɓlii, mor ah Dǝɓlii pee gaɓ ge tǝ za sǝr Yuda. 20 So Tigilot-Palasar goŋ Asiria ge, gbah jol Akas laŋ ya, so cuu syak nyi jeertǝ, joŋ gaɓ ge tǝtǝl ah pǝlli. 21 Akas woo fan sãh mai mo yaŋ Masǝŋ ne ma yaŋ goŋ ne mai mo yaŋ zaluu ma pel za pãa daŋ nyi nyi goŋ Asiria, amma ne daŋ laŋ, ɓǝ ah ka ne yeɓ ya.
Faɓe' Akas
22 Ne cok Akas mo dan pǝ bone, so joŋ faɓe' wo Dǝɓlii kal ma kǝpel 'yaŋ. 23 Ŋgom fan joŋ syiŋ ne wo masǝŋ Sirien mai mo nĩira ko. So faa: Masǝŋ Sirien gbahra jol za goŋ Siria, me tǝ joŋ syiŋ wo ɓǝǝ ɓe, a ga gbahra jol ɓe ta. Ɓǝ ah so ɗii ɓeɓ ge tǝl ah ne tǝkine za sǝr ahe. 24 Akas woo fan ma joŋ yeɓ yaŋ Masǝŋ dah ge lal belbelle, so coo zahfah yaŋ Masǝŋ, vuu cok joŋ syiŋ ma syak ah tǝgǝǝ yaŋ Jerusalem daŋ. 25 Pǝ yaŋ maluu ne yaŋ manyee ah pǝ sǝr Yuda daŋ, vuu cok joŋ zahsyiŋ za gwǝǝ gŋ ka tǝǝ ɓǝrdi wo masǝŋ za ki. Ne fahlii mai Akas 'nam kpãh Dǝɓlii Masǝŋ pamlii ra ge tǝ suu ah ne ko.
26 Fan mai daŋ Akas mo joŋ daga tǝtǝŋ kaa goŋ ah ŋhaa vǝr ahe, ɓǝ ah ŋwǝǝ ɓo pǝ ɗerewol Ɓǝ Za Goŋ Yuda ne Israel. 27 Goŋ Akas wuu, ciira ko yaŋ Jerusalem, amma ciira ko pǝ cok cii za goŋ ya. Wel ah Ezekias kaa goŋ pǝ cok ahe.
© Bible Moundang © Alliance Biblique du Tchad, 1996.
