Goŋ joŋ osoko wo Masǝŋ mor kaa kacella
1 Lǝŋ David.
Me joŋ osoko nyi Dǝɓlii, pa byak ɓe.
Ako yee swaa me,
Ako yee cuu yella ruu sal nyi me.
2 Ako ye pa byak ɓe tǝkine pa gbah jol ɓe,
Ako ye cok muŋ ɓe ne pa ǝ̃ǝ ɓe.
Me soɓ suu ɓe wol ah ka me kaa jam,
Ako ye jee za gee me sǝŋ.
3 Dǝɓlii, dǝfuu ko fẽe ye ka mo foo ɓǝ ah ka mo ɓaŋ syiŋ ah ne?
4 Dǝfuu tǝgbana tǝ'yak mai dǝɓ moo feeni,
Zah'nan ah a tǝgbana cee fan moo kalle.
5 Dǝɓlii, mo joŋ coksǝŋ ɗǝŋ ge,
Ka mo ɗǝr gŋ ge sǝŋ.
Mo juu waa ne jolle,
Ka suŋwii mo pǝ̃ǝ gŋ ge lalle.
6 Mo pee sãh bam ge, ka mo myah za syiŋ ɓo ne ko.
Mo 'nǝǝ guu nĩi ra ne ko.
7 Mo nyen jol ɓo daga coksǝŋ ge sǝŋ,
Mo ɓaŋ me gin pǝ paŋbii ge lalle,
Mo ǝ̃ǝ me.
Mo ǝ̃ǝ me gin mor jol za gwǝǝre,
8 Mai mo ka faara goŋga ya.
Koo mo haara zah ɓo laŋ,
Ka gwahra ber ɓo ne ko.
9 Masǝŋ, me ga ɗǝǝ lǝŋ mafuu ah yii mo ne ko,
Me ga woŋ tǝnjuŋ ɗǝǝ lǝŋ cor mo ne ko.
10 Amo yee nyi swah nyi goŋ kaa kacella ne ko,
Mo wǝǝ dǝɓ yeɓ ɓo David.
11 Mo ǝ̃ǝ me jol za syiŋ ɓe,
Mo wǝǝ me jol za gwǝǝ mai mo ka faara goŋga ya.
Koo mo haara zah laŋ, ka gwahra ber ɓo ne ko.
12 Ka wee ɓuu mawǝǝ mo yeara pǝswah daga laŋ ɓǝǝ tǝgbana kpuu mai moo giŋ pǝswahe,
Ka wee ɓuu maŋwǝǝ mo yeara tǝgbana foto mai moo zyeɓra ma yaŋ goŋe.
13 Kahcel ɓuu mo baa ne zahban fakpãhpǝǝ camcam daŋ,
Ka gwii ɓuu mo bemra ujenere ujenere.
14 Ka dǝǝ ɓuu mo bem pǝlli,
Mo sye ɓil ka, mo muŋ ka ta.
Ka ru laa yee ma ne ɓǝ swaa tǝgǝǝ yaŋ ɓuu ka.
15 A pǝ'nyah wo sǝr mai fan marai daŋ moo ga joŋ gŋ.
A pǝ'nyah wo za mai Dǝɓlii ye mo Masǝŋ ɓǝǝra!
© Bible Moundang © Alliance Biblique du Tchad, 1996.
