1 Dǝɓ mai mo tǝ fan ɓo 'manna 'manna ka mo so gak mgbaiko mor ɓǝ daŋ, dǝɓ ah kǝka. Fatan dǝɓ a joŋ dǝɓ syesyakke, a joŋ zahpel ah syel ta.
A pǝsãh ka laa zah goŋe
2 Goŋ mo faa ɓǝ ɓe, sai mo laa zah ahe. Na gbǝ zah ɓo ne ki pel Masǝŋ, 3 mor ah na hǝǝ ne jiŋ fahfal ɓoo nyi swah ah ka. Na pea suu ne ɓǝ fan mai mo 'nyah suu ah ya ka, mor goŋ a joŋ fan daŋ na mo 'yahko. 4 Ɓǝ faa ah a ne swahe, so dǝɓ ma gak faa nyi ko ka fẽe mo joŋ nai ne, kǝka. 5 Dǝɓ ma laa zah ah ka dan pǝ ɓǝ magaɓ ah ya. Amma dǝɓ ma ne tǝtǝl tǝ ɓo ryakryak, kiita Masǝŋ a gin dai ne zah'nan ah mo kan ɓo. 6 Mor kiita tǝ ga ŋgoŋ tǝ fan joŋ dǝfuu daŋ comki, mor ɓǝɓe' dǝfuu a pǝ'manne. 7 Na tǝ fan mai mo tǝ ga joŋ pel a, so dǝɓ mai moo gak faa nyi na a ga joŋ naino laŋ kǝka. 8 Dǝɓ vaŋno ma ne swah ka cak suu ah bai wun kǝka, so dǝɓ ma gak tǝɓ zah'nan wul ah ga pel kǝka ta. Mawul mo ge ka gban dǝɓ ɓe, yella ǝ̃ǝ pel ah ka yea ya. Dǝɓ ka gak soo ko ne lak ka mo ǝ̃ǝ ya.
Dǝɓ ɓe' ne dǝɓ sãhe
9 Me lii ɓǝ fan daŋ mai mo tǝ joŋ wo sǝrri: dǝfuu a kaa swah tǝ dǝfuu ki na ko, so a joŋ ko yea pǝsyakke. 10 Me kwo za ɓea za moo ciira wul ɓǝǝ ɓe, zan ah yea tǝ kyãhra ga yaŋ Masǝŋ, za ma yaŋ Jerusalem so yaŋra tǝ fan joŋ za ɓea rai laŋ ɓe. Ɓǝ mai laŋ ka ne fahlii ya.
11 Pa ma joŋ ɓǝɓe' ka gaara ko daŋgai ne pel sǝ ya, mor ah ɓǝ ah a kǝǝ dǝfuu kaara ma ne ɓal joŋ ɓǝɓe' ga pelle. 12 Dǝɓ faɓe' a gak joŋ ɓǝɓe' zahlǝŋ temere, so a kyaŋ sǝŋ syii pǝlli kpǝ. Me tǝ ɓǝ mai za moo faara: Sai za mai moo ɗuura Masǝŋ to yee ga laara pǝ'nyahre, mor nyiŋra yǝk ah ɓo, me tǝ ɓe. So a faara: 13 Dǝɓ ɓe' mǝ ah ka ga laa pǝ'nyahr a, zah'nan cee ah a ga pǝ̃ǝ kal na cee fanne, mor ka foo ɓǝ Masǝŋ ya. Me tǝ mai ɓe. 14 Amma ne daŋ laŋ, ɓǝ ah ɓǝ kol o. Na ẽe ɓǝ mai mo tǝ joŋ wo sǝr ɗao: Comki za matǝ njaŋ a lwaara kiita za faɓe', so za faɓe' laŋ a lwaara reba za matǝ njaŋ. Mor ah me faa, ɓǝ kol o.
15 Ma ɓe, me yii ɓǝ laa pǝ'nyah ɓo. Mor kaa jam dǝfuu wo sǝr nyee ako ye ren fanne, zwan fanne, tǝkine laa suu ah pǝ'nyahre. Reba yeɓ ah moo joŋko zah'nan Masǝŋ daŋ koiko.
16 Ame kyeɓ ka me ciŋ pa fatanne, mor ka me tǝ ɓǝ fan mai dǝfuu mo tǝ joŋra wo sǝrri. Me kwo ɓe, koo na nǝnǝm ya com ne suŋ daŋ laŋ, 17 na ka gak tǝ ɓǝ fan mai Masǝŋ moo joŋ ya. Dǝfuu a gaɓra ne kyeɓ mor ahe, amma ka gak lwaara ya. Za fatan a gak faara rǝ tǝ ɓe, amma tǝra ya.
© Bible Moundang © Alliance Biblique du Tchad, 1996.
