Masǝŋ ga ŋgoŋ kiita tǝ yaŋ Damaskus tǝkine sǝr Israel
1 Ɓǝ ma faa tǝ yaŋ Damaskus a naiko:
Dǝɓlii faa, yaŋ Damaskus ka ga yea yaŋ malii faɗa yao, a ga ciŋ gboŋni. 2 Yaŋ sǝr Siria maluu daŋ a ga ɓeɓ belbelle, yaŋ ah daŋ a ga ciŋ cok pii pǝsǝ̃ǝ tǝkine dǝǝ, dǝɓ ka ga nĩi ra gŋ ga cok ki ne ya. 3 Israel ka ga gak byak suu ah laŋ ya, Damaskus ka ga yea ne tǝtǝl suu ah yao. Sirien mai tǝtǝl ɓǝǝ mo coŋ ɓo no sǝŋ, a ga lwaara swãa na za Israel ta. Ame Dǝɓlii ma ne swah daŋ me faa naiko.
4 Dǝɓlii faa: Zah'nan ah no ginni, ne cok ah yǝk Israel ga vǝr ne ko. Joŋ ɓǝǝ ga vǝrri, a ga ciŋra za syakke. 5 Sǝr Israel ga yea tǝgbana dǝ̃ǝ 'wah mai mo joŋra fagwahl ah gin gŋ ɓo, a ga yea tǝgbana 'wah ma pǝ cok tǝforoŋ Refaim mo ŋhǝǝra lee kpuu ah gin gŋ ɓo. Sai za biŋ yee ga coŋ sǝŋ gŋ to. 6 Israel ga yea tǝgbana kpuu maŋgo mai mo ŋhǝǝra lee ah ɓo mo coŋ ge ɓo zahdaa kpuu ah sǝŋ gwa, koo sai, nai, wala dappe to. Ame Dǝɓlii Masǝŋ Israel me faa naiko.
7 Ne cok zah'nan ah mo ge ɓe, za ga jinra nahnǝn ka fii gbah jol wo pa ma joŋ ɓǝǝ Masǝŋ Matǝdaŋdaŋ mǝ za Israel. 8 Ka ga ɓaŋra syiŋ ɓǝ cok joŋ syiŋ mai mo zyeɓra ne jol ɓǝǝ yao, wala ka ga soɓra suu ɓǝǝ wo yeɓ jol ɓǝǝ tǝgbana cok matǝdaŋdaŋ mai moo juura pel wo masǝŋ ki ma ɗii ne Astarte tǝkine pǝ cok joŋ syiŋ mai moo tǝǝra ɓǝrdi gŋ yao.
9 Ne cok zah'nan ah mo ge ɓe, yaŋ ma ne ɓaale ah ra daŋ a ga ciŋ cok kol tǝkine gboŋ tǝgbana yaŋ Hevien maluu ne mǝ Amorien mo ciŋ cok makol ah ne cok mai mo ɗuura gal za Israel.
10 Za Israel, we yaŋ Masǝŋ mai mo ǝ̃ǝ we, mo byak we tǝgbana bal ruu sal masãh ahe. So we kal tǝ pea kpuu masãh ah ne kyaŋ mai ka we juupel wo masǝŋ gwǝǝ gŋ. 11 Amma koo kpuu ah mo dǝ mo so zyee com pea ah sǝ laŋ, mo ka ga lwaa fan ki gŋ ya, sai mo lwaa bone tǝkine fasyen magaɓ ah gŋ to.
Masǝŋ ga vǝr za syiŋ Israel
12 Zahban maswah ah a joŋra fan tǝgbana zyak moo wea bii mabii, a ŋwaara ɓǝ tǝgbana bii moo ciini. 13 Za syeera ga pel tǝgbana wea bii moo syeeni, amma Masǝŋ mo ge yee zah ɓǝǝ ɓe, a ga piira soo tǝgbana sǝr ma tǝwaa bii moo ɓaŋ ɗuu gin sǝŋ ne ko, ɓǝ ah ga joŋ tǝgbana kun sor mai zyak moo ɓaŋ zah saŋ kal ne ko. 14 Ne lil ɓe, za a ɗuura gal ɓǝǝra, amma zah'nan mo cee ɓe, ara kǝkao! Reba za mai moo gin woora fan sǝr man koiko!
© Bible Moundang © Alliance Biblique du Tchad, 1996.
