Masǝŋ ga byak yaŋ Jerusalem
1 Ɓǝ pǝgaɓ tǝ za mai moo gara sǝr Egiɓ ka fii gbah jol gŋ! Mor soɓra ɓǝ foo ɓǝǝ uu ɓo tǝ ɓǝ swah za sal sǝr Egiɓ, ne pǝr ɓǝǝ tǝkine muŋta sal ɓǝǝ ne za ma yee tǝl ah ra. Amma zyii soɓra suu ɓǝǝ wo Dǝɓlii Matǝdaŋdaŋ Masǝŋ Israel wala ka fii ko ka mo gbahko jol ɓǝǝ ya. 2 Dǝɓlii tǝ fan mai moo joŋko ɓe. A pee ɓeɓ gin tǝ za faɓe' tǝkine za mai moo gbanra zah ne ra ka byak ra. 3 Egiɓien dǝfuu ye ra, Masǝŋ ye ka ra ya. Pǝr ɓǝǝ ye fan sǝrri, masǝŋ ye ka ra ya. Ne cok Dǝɓlii mo joŋ yeɓ vaŋno ɓe, za maswah ah a lee ga sǝŋ, za matǝtǝ̃ǝ ah mai mo tǝ gbahra jol ɓǝǝ laŋ a ga leera. Ara gwa daŋ a ga muŋra.
4 Dǝɓlii faa nyi me: Tǝgbana ɓol mai mo gbǝ gwii ɓe, koo za kǝpii ah mo tǝ laira ko laŋ, mo ka gakra nĩi ko tǝl ah ga lal a, nai ta, fan ki ka gak cak me Dǝɓlii ma ne swah daŋ bai byak waa Sion a. 5 Tǝgbana juu moo tan kol ah moo byak wee ahe, nai ta, ame Dǝɓlii ma ne swah daŋ me ga byak Jerusalem me ǝ̃ǝ yaŋ ahe.
6 Masǝŋ faa: Za Israel, awe joŋ faɓe' wo ɓe, we ŋwookyaŋ ne me. Amma zǝzǝ̃ǝ mai we pii soo ge wo ɓe. 7 Zah'nan ah no ginni, ne cok ah we ga myah masǝŋ ki ra mai we zyeɓ ne vãm solai tǝkine vãm kaŋnyeeri daŋ ga lalle. 8 Sǝr Asiria ga lee zah salle, amma ka ga lee ne swah mǝ dǝfuu ya. Asirien ga ɗuura zah salle, wee tǝbanna ɓǝǝ a ga ciŋra byakke. 9 Goŋ ɓǝǝ ga ɗuu gal kalle. Zaluu ɓǝǝ a ga ɗuura gal soɓ tutowal sal ɓǝǝ ɓoo. Dǝɓlii mai moo juura pel wol ah yaŋ Jerusalem, mai moo syakra fan joŋ syiŋ ne wol ah gŋ faa naiko.
© Bible Moundang © Alliance Biblique du Tchad, 1996.
