David fii Masǝŋ ka mo gbahko jol ah pel za syiŋ ah ra
1 Lǝŋ David.
2 Masǝŋ, zahzyil ɓe uu ɓo tǝ ɓo,
Ame zyeɓ suu ɓe kaa ɓo ne ka ɗǝǝ lǝŋ ka yii mo ne ko.
Mazwãhsuu ɓe, mo kpiŋ o!
3 Tǝnjuŋ ɓe tǝkine tǝnjuŋ zahrãa ɓe,
We kpiŋ o! Me ga kpiŋ com ka mo zooko!
4 Dǝɓlii, me ga joŋ osoko nyi mo kǝsyil zana,
Me ga yii mo kǝsyil za sǝrri.
5 'Yah ɓo pǝ'man ŋhaa ge dai coksǝŋ,
Ɓǝ sãh ɓo zyaŋ coksǝŋ ɓo ne lii ah daŋ.
6 Masǝŋ mo cuu yǝk ɓo coksǝŋ tǝkine tǝ sǝr daŋ.
7 Mo ǝ̃ǝ ru ne swah ɓo,
Mo laa juupel ɓe,
Mor ka za mai mo tǝ 'yah ra mo ǝ̃ǝra.
8 Masǝŋ faa ɓǝ daga pǝ cok kal ah faa:
Me ga kaa kacella,
Me ga woŋ Sikem,
Me ga wom el Sukot nyi za ɓe,
9 Sǝr Giliat ma ɓe yo, Manasse laŋ ma ɓe ye ta,
Efraim njok vãm tǝtǝl ɓe yo,
Yuda mǝ ah kǝndaŋ goŋ ɓe yo.
10 Amma me ga joŋ
Moab tǝgbana tahsah er bii ɓe,
Me ga joŋ Edom na cok rǝk sǝɓal ɓe.
Me ga ɓyaŋ ɓǝ tǝ Filistia ka cuu me kaa kacella tǝl ah ɓe.
11 Azu ye ga yaŋ sal ne me ne?
Azu ye ga ɓaŋ me ga sǝr Edom ne ne?
12 Masǝŋ, mo ɓoo ru ge lal ɓe ne?
Mo ka pǝ̃ǝ ne za sal ɓuu yao ne?
13 Mo gbah jol ɓuu ne ruu sal ne za syiŋ ɓuuru,
Mor gbah jol mǝ dǝfuu ka ne yeɓ ya.
14 Masǝŋ mo no kah ɓuu ɓe, ru ga kaa kacella,
A ga cuu swãa za syiŋ ɓuuru.
© Bible Moundang © Alliance Biblique du Tchad, 1996.
