Yusafat kaa goŋe
1 Yusafat kaa goŋ pǝ cok pah ah Asa, zyeɓ suu ah kaa ne kal za Israel. 2 Rǝk sooje pǝ yaŋ ma ne ɓaale ah ra pǝ sǝr Yuda daŋ, ne pǝ sǝr ah mai govener camcam mo kaa ɓo gŋ, tǝkine pǝ yaŋ mai pah ah Asa mo re ne sal pǝ sǝr Efraim daŋ. 3 Dǝɓlii ẽe Yusafat, mor ɓaŋ tǝɓal pah ah zyii ka juupel wo Ba'al a. 4 A joŋ mor Masǝŋ pah ahe, syee mor ɓǝ lai Masǝŋ, joŋ fan tǝgbana mai za goŋ Israel moo joŋra ya. 5 Dǝɓlii nyi swah nyi Yusafat ka mo lwaa sǝr goŋ Yuda ge mor jol tǝɗe', za daŋ a ginra nyi ne fanne, ŋhaa so kǝ̃ǝ pǝlli, ge pǝyǝkki. 6 Soɓ ɓǝ foo zahzyil ah ka joŋ mor Dǝɓlii, dah cok juupel za gwǝǝ ne masǝŋ ki cam ɓǝǝ pǝ sǝr Yuda daŋ ge lalle.
7 Ne syii patǝ sai ah mo kaa goŋ ɓo, pee zaluu ma ne ki ka mo ge cuura fan pǝ yaŋ maluu pǝ sǝr Yuda, zan ah ra naiko: Ben-Hail, Obadias, Zakarias, Netanel, ne Mika. 8 Pee Lewitien manyeeki ah ge ne ra ta: Semaja, Netania, Zebadia, Asayel, Semiramot, Yunatan, Adonija, Tobiija, ne Toɓ-Adonija, tǝkine za joŋzahsyiŋ gwa: Elisama ne Jehoram. 9 Ɓaŋra ɗerewol Ɓǝ Lai Dǝɓlii kal ne ko, kyãhra yaŋ maluu pǝ sǝr Yuda daŋ, cuura ɓǝ ah nyi zana.
Yǝk Yusafat
10 Dǝɓlii joŋ za goŋ mai mo kaara ɓo kah sǝr Yuda daŋ ɗuura gal ruu sal ne Yusafat. 11 Za ki kǝsyil Filistien, a woora vãm solai tǝkine fan nyi manyeeki ah gin nyi Yusafat ne ko. Za Araɓ maki ah gera nyi ne kǝbǝr 7.700, kǝdai 7.700 ta.
12-13 So zah'nan Masǝŋ daŋ, swah Yusafat ne yǝk ah a ga pelle. Vuu yaŋ maswah ah pǝ sǝr Yuda tǝkine yaŋ maluu ah mor ka rǝk fan gŋ ta, so rǝk zaluu sooje maswah ah ra yaŋ Jerusalem, 14 ne morsǝ̃ǝ za ɓǝǝ camcam ne patǝtǝlli. Adna ako ye dǝɓlii sooje mǝ morsǝ̃ǝ za zahban Yuda, a ne sooje mǝ ah 300.000. 15 Patǝ gwa ahe, Jokanan, a ne sooje mǝ ah 280.000. 16 Patǝ sai ahe, Amasia we Zikri, a ne sooje 200.000. Amasia zyeɓ suu ah ɓo ka joŋ mor Dǝɓlii ne 'yah zahzyil ahe. 17 Dǝɓlii sooje ma pel za ma morsǝ̃ǝ Benyaamin ye Eliada, sooje maswah ah yo. A ne za ma woo bal sal ne saŋ daŋ 200.000. 18 Patǝ gwa ah mai mo lwaa za ge ɓo tǝtǝl ahe, ako ye Jezobat, a ne za 180.000, zan ah tǝra yella ruu sal ɓo no cam. 19 Za mai daŋ joŋra yeɓ ne goŋ Yusafat, tǝkine za mai ako mo rǝk ra pǝ yaŋ maswah ah ra pǝ sǝr Yuda daŋ.
© Bible Moundang © Alliance Biblique du Tchad, 1996.
