Fĩi Paska
(Pǝ̃ǝ 12:1-20)1 We yii Dǝɓlii Masǝŋ ɓii ne joŋ fĩi Paska pǝzyil fĩi ma ɗii ne Abiɓ, mor Dǝɓlii pǝ̃ǝ ne we daga sǝr Egiɓ ne suŋ pǝzyil fĩi ahe. 2 We ge pǝ cok mai mo nǝǝko ɓo ka za mo juupel wol ah gŋ, ka we ŋgom gwii wala dǝǝ ɓii gŋ mor ka joŋ fĩi Paska ne ka yii Dǝɓlii Masǝŋ ɓiiri. 3 Ne cok we tǝ ren nǝǝ ah ra ɓe, ka we re ne tǝwaa ma joŋ ne fan mbǝ̃ǝ ka. Zah'nan rǝŋ we re tǝwaa mai mo joŋ ɓo ka ne fan mbǝ̃ǝ ya, mor we zol gin sǝr Egiɓ ne hǝǝre. We re tǝwaa ahe - tǝwaa ah a ga ɗii ne farel bone - ka pǝ zah'nan cee ɓii we kaa ɓo daŋ, ka we foo ɓǝ zah'nan mai we pǝ̃ǝ gin pǝ bone sǝr Egiɓ. 4 Tǝgǝǝ zah'nan rǝŋ, fan mbǝ̃ǝ mo yea koo ɓǝr yaŋ dǝɓ vaŋno pǝ sǝr ɓii ka, we ŋgom nǝǝ faɓal ah ra ne zah'nan patǝ vaŋno ah ne lilli, we re nǝǝ ah ra tǝɗe', we soɓ dai tǝ'nan ah ka.
5-6 We ge ŋgom faɓal ma joŋ fĩi Paska pǝ cok mai Dǝɓlii mo nǝǝ ɓo ka za mo juupel wol ah gŋ to, we ŋgom pǝ cok maki ah cam pǝ sǝr mai Dǝɓlii Masǝŋ ɓii mo tǝ ga nyi nyi we ka. We ŋgom ka com tǝ zoo o, tǝgbana ne cok com mai we pǝ̃ǝ gin sǝr Egiɓ ne ko. 7 We kǝǝ nǝǝ ahe, ka we re pǝ cok mai Dǝɓlii mo nǝǝ ɓo ka za mo juupel wol ah gŋ, ka tǝ'nan ah we pii soo ge yaŋ ɓiiri. 8 Tǝgǝǝ zah'nan yea we re tǝwaa ma bai fan mbǝ̃ǝre, amma ne zah'nan patǝ rǝŋ ah we tai juupel wo Dǝɓlii Masǝŋ ɓii ne ko, we joŋ yeɓ ne zah'nan ah ka.
Fĩi tai fagwahlle
(Pǝ̃ǝ 34:22Lew 23:15-21)9 Ne cok we tǝŋ joŋ fagwahl ɓe, ka we kee com 'yak rǝŋ. Mo baa ɓe, 10 ka we joŋ fĩi ma tai fagwahl ne ka yii Dǝɓlii Masǝŋ ɓiiri, we ge nyi ne fan nyi mai zahzyil ɓii mo 'yah ka nyi nyi ko, nǝn fan mai mo ẽeko we ɓo ne ko. 11 We laa pǝ'nyah pel Dǝɓlii, ne wee ɓiiri, za yeɓ ɓiiri, Lewitien, za gwǝǝre, wee syelle, tǝkine ŋwǝǝ wul daŋ mo kaara ɓo kǝsyil ɓiiri. We joŋ fan ah pǝ cok mai Dǝɓlii mo nǝǝ ɓo ka za mo juura pel wol ah gŋ. 12 We foo, awe laŋ we yea pǝ byak sǝr Egiɓ ta. We joŋ yella, ka we zǝǝ tǝ ɓǝ lai mai ka.
Fĩi julli
(Lew 23:33-43)13 Fahfal we ɗuu sor ɓii daŋ vǝr tǝkine ŋhǝǝ bii lee kpuu vin ɓii daŋ ɓe, ka we joŋ fĩi jul zah'nan rǝŋ. 14 We laa pǝ'nyah ne joŋ fĩi ah ne wee ɓiiri, za yeɓ ɓiiri, Lewitien, za gwǝǝre, wee syelle, tǝkine ŋwǝǝ wul daŋ mo kaara ɓo kǝsyil ɓiiri. 15 We yii Dǝɓlii Masǝŋ ɓii ne joŋ fĩi ah zah'nan rǝŋ, pǝ cok mai mo nǝǝko ɓo ka we juupel wol ah gŋ. We laa pǝ'nyahre, mor Dǝɓlii ẽe fagwahl ɓii ɓo, tǝkine yeɓ jol ɓii daŋ.
16 Syii daŋ, za wǝǝ mai mo kǝsyil ɓiiri, mo ge juura pel ɓal sai pel Dǝɓlii pǝ cok mai mo nǝǝko ɓo ka za mo juupel wol ah gŋ: ne fĩi Paska, fĩi tai fagwahlle, ne fĩi julli. Zune daŋ mo geko ne fan nyi ah 17 tǝgbana mai moo gakko, nǝn fan mai Dǝɓlii Masǝŋ ɓii mo ẽeko ɓo ne mo nyi ɓo nyi ko.
Ɓǝ lai mor za ma ŋgoŋra kiita
18 Kǝsyil zahban ɓii daŋ, we rǝk za lakaali ne zaluu manyeeki ah pǝ yaŋ maluu daŋ mai Dǝɓlii Masǝŋ ɓii mo tǝ ga nyi nyi we, ka zan ah mo ŋgoŋra kiita ne fahlii ahe, mo joŋra za ne camcam ka. 19 Mo tǝ ŋgoŋra kiita ɓe, mo joŋra vǝrvǝr gŋ wala joŋ za ne kiita camcam ka, mo nyiŋra facokkol ka, mor fan ah a rǝ̃ǝ nahnǝn nyi za matǝ goŋga rǝ̃ǝ, a joŋ ka mo joŋra fan ne fahlii maɓe' ahe. 20 Cẽecẽe we kyeɓ goŋga, ka we joŋ fan ne fahlii tǝ goŋga to, ka we ge re sǝr mai Dǝɓlii Masǝŋ ɓii mo tǝ ga nyi nyi we, ka we kaa gŋ.
21 Ne cok we vuu cok joŋ syiŋ wo Dǝɓlii Masǝŋ ɓii ɓe, ka we so pee kpuu koo mafẽene ah kah ah ka juupel wol ah ka. 22 We pee koo tǝsal laŋ kah ah ka juupel wol ah ka ta, mor Dǝɓlii syiŋ ɓǝ ah ra ɓo syiŋ.
© Bible Moundang © Alliance Biblique du Tchad, 1996.
