1 Dǝɓlii faa nyi Mosus: Mo faa nyi Aron: Mo ɓoo jol ɓo ne kǝndaŋ ɓo tǝ el ra, tǝ wee el tǝkine lak vuu ra, ka mo joŋ manjaktǝril mo pǝ̃ǝra gin pǝ bii ge zahgee lalle. 2 Aron ɓoo jol ah tǝ bii Egiɓ ra, so manjaktǝril urra ge, so koora sǝr Egiɓ kǝrik. 3 Amma za yiila joŋra ma ɓǝǝ nai ta, joŋra manjaktǝril ge tǝ sǝr Egiɓ.
4 Farao ɗii Mosus ne Aron faa nyi ra: We pǝǝ Dǝɓlii ka mo nĩi manjaktǝril wo ɓe ge lal tǝkine wo za ɓe daŋ, so me ga soɓ za nyẽe ka kalle, mor ka mo joŋra syiŋ wo Dǝɓlii. 5 Mosus faa nyi Farao: Mo cuu cok mai mee ga pǝǝ Dǝɓlii mor ɓo ne za yeɓ ɓo tǝkine za ɓo nyi me, ka mo nĩiko manjaktǝril wo ɓii kal pǝɗǝkki, ka mo yea pǝ zǝǝ to. 6 Farao zyii faa: Ɓǝ ah mo joŋ tǝ'nanne. Mosus faa: A ga joŋ tǝgbana ɓǝ faa ɓo ka mo tǝ, dǝɓ ma na Dǝɓlii Masǝŋ ɓuu kǝka. 7 Manjaktǝril ga zolra gin wo ɓo ne yaŋ ɓo ra, ne za yeɓ ɓo ra tǝkine za ɓo ra, a ga yeara pǝ zǝǝ to. 8 Mosus ne Aron pǝ̃ǝra ge wo Farao, so Mosus ɓyaŋ ɓǝ wo Dǝɓlii ne ɓǝ manjaktǝril makẽne mo joŋ ra ɓo ge tǝ Farao. 9 So Dǝɓlii joŋ tǝgbana ɓǝ faa Mosus, manjaktǝril wukra ɓǝr yaŋ, piicelle tǝkine 'wah daŋ. 10 Egiɓien taira wor ge tǝki ɗulɗul ŋhaa joŋ sǝr ah fuŋ ndǝ̃ǝ. 11 Farao kwo zye lwaa 'yak ɓe, so yer zahzyil ahe, so ka laa ɓǝ Mosus ne Aron ao, tǝgbana Dǝɓlii mo faako kŋ.
Ŋwǝǝ ge tǝ sǝr Egiɓ
12 Dǝɓlii faa nyi Mosus: Mo faa nyi Aron: Mo ɓaŋ kǝndaŋ ɓo ka mo i ɓǝm sǝr ne ko, ka mo ciŋ ŋwǝǝ tǝ sǝr Egiɓ daŋ. 13 So Aron joŋ naiko, ɓaŋ jol ah ne kǝndaŋ ahe, so i ɓǝm sǝr ne ko, ɓǝm ah ciŋ ŋwǝǝ ge tǝ dǝfuu tǝkine faɓalle. Ɓǝm sǝr Egiɓ daŋ ciŋ ŋwǝǝre. 14 So za joŋ yiila laŋ kyeɓra ka ciŋ ŋwǝǝ nai ta, amma gakra ya. Ŋwǝǝ ge tǝ dǝfuu ne faɓal daŋ. 15 So za joŋ yiila faara nyi Farao: Mai yeɓ Masǝŋ yo. Amma zahzyil Farao yerre, ka laa ɓǝ Mosus ne Aron a, tǝgbana Dǝɓlii mo faa kŋ.
Kŋ lwǝǝ suu ge tǝ sǝr Egiɓ
16 Dǝɓlii faa nyi Mosus: Mo ur ne zah'nan pimpim ka mo kyaŋ tǝ Farao ne cok mo tǝ gako zahbii, mo faa nyi ko: Masǝŋ faa sye: Mo soɓ za ɓe kal ka ga juura pel wo ɓe. 17 Mo zyii ka soɓ za ɓe ka gan a ɓe, me ga pee kŋ foolǝ ge tǝ ɓo, tǝ za yeɓ ɓo, tǝ za ɓo ne ɓǝr yaŋ ɓo ra. Kŋ foolǝ ga baa ɓǝr yaŋ za sǝr Egiɓ. A ga koora cok mai za mo no gŋ daŋ kǝrik. 18 Amma ne cok ah me ga woŋ tǝgǝǝ sǝr Gosen cok kal za ɓe ne sǝr Egiɓ camcam. Kŋ foolǝ ka ga pǝ sǝr Gosen a. Ne mai mo ga tǝ, ame ye Dǝɓlii tǝ sǝrri. 19 Me ga woŋ kǝsyil za ɓe ne za ɓo. Fan ma cuu ɓǝ mai ga joŋ tǝ'nanne. 20 Dǝɓlii ge joŋ na maiko. Kŋ foolǝ gǝr ge ŋwoo, dǝǝra ge yaŋ Farao tǝkine yaŋ za yeɓ ahe, ɓeɓra sǝr Egiɓ daŋ.
21 Farao ɗii Mosus ne Aron faa nyi ra: We gyo, we ge joŋ syiŋ wo Masǝŋ ɓiiri, amma we joŋ pǝ sǝr maiko. 22 Mosus zyii faa: Ka pǝsãh nǝn joŋ nai ya, mor ru ga joŋ syiŋ wo Dǝɓlii Masǝŋ ɓuu ne farenjẽa Egiɓien, ru joŋ ne farenjẽa ne nahnǝn Egiɓien ɓe, ka ɓaara ru ne tǝsal a ne? 23 Ru ga kǝsyicok tǝgǝǝ zah'nan sai ka joŋ syiŋ wo Dǝɓlii, Masǝŋ ɓuuru, tǝgbana mo faako nyi ru. 24 Farao so faa: Me ga soɓ we ka joŋ syiŋ wo Dǝɓlii Masǝŋ ɓii kǝsyicokki, amma ka we kal pǝɗǝk ka. We juupel mor ɓe. 25 Mosus faa: Me ga pǝ̃ǝ gin wo ɓo ka me pǝǝ Masǝŋ. Tǝ'nan kŋ foolǝ ga yea pǝɗǝk ne Farao ne za yeɓ ah ra tǝkine zan ahe. Amma ka Farao mo joŋ vǝrvǝr bai zyii soɓ za kal ga joŋ syiŋ wo Dǝɓlii faɗa kao. 26 Mosus pǝ̃ǝ gin wo Farao, pǝǝ Dǝɓlii. 27 Dǝɓlii joŋ tǝgbana mai Mosus mo fii, so kŋ kal pǝɗǝk ne Farao ne za yeɓ ah ra tǝkine zan ahe, coŋ koo vaŋno ya. 28 Amma Farao yer zahzyil ah faɗa, soɓ za nyẽe kal a.
© Bible Moundang © Alliance Biblique du Tchad, 1996.
