Yeɓ Paulus mo joŋ yaŋ Tessalonika
1 Wee pa ɓuuru, awe ne suu ɓii we tǝ ɓe, ru ge ɓo ka wo ɓii tǝkol a. 2 We tǝ laŋ ɓe, cuura bone nyi ru tǝkine tǝǝ ru yaŋ Filipi, kǝpel ka ru ɓah ga wo ɓii yaŋ Tessalonika ya ba. Amma koo bone ah mo pǝlli ko laŋ, Masǝŋ nyi swah zahzyil nyi ru ka cuu Ɓǝ'nyah ah nyi we. 3 Mor ɓǝ mai ru tǝ cuu nyi zana, ɓǝ maɓe' ah wala ɓǝ matǝ vǝrvǝr ye ka, ru ka tǝ kyeɓ ka zyak dǝɓ ya. 4 Jeertǝ cẽecẽe ru faa tǝgbana Masǝŋ mo 'yahe, mor ako ye lii ru ɓo, so soɓ Ɓǝ'nyah ah jol ɓuuru. Aru ka tǝ kyeɓ ka 'nyah suu za ne ɓǝ ah ya, amma ru kyeɓ ka 'nyah suu Masǝŋ mai mo tǝ lii zahzyil ɓuuru. 5 Mor we tǝ belbelle, ru ge faa ɓǝ ah ne ɓǝ faa zah 'nyahr a, ru faa ɓǝ ah laŋ ne kyaŋ mai ka ru lwaa lak ne jol ɓii ya ta, Masǝŋ ye pa syedowal ɓuuru. 6 Ru kyeɓ yǝk wo dǝɓ ɗǝ ya, ru kyeɓ wo ɓii ya, ru kyeɓ wo za ki laŋ ya ta. 7 Kǝnah ru no ne fahlii ka yii yǝk suu ɓuu wo ɓii tǝgbana zapee Kristu. Amma ne daŋ laŋ ne cok ru wo ɓiiri, ru wonsuu ɓuuru, aru wonsuu tǝgbana mah wee moo byak wee ahe. 8 Mor ru tǝ 'yah we, ru nyi suu ɓuu ɓo ka mor ka cuu Ɓǝ'nyah Masǝŋ nyi we to ya, amma ru nyi cee ɓuu ɓo ta, mor awe ye za 'yah ɓuuru! 9 'Manna wee pa ɓuuru, awe gak foo ɓǝ yeɓ ɓuu mai ru joŋ ne bone. Mor ne cok ru yea wo ɓii tǝ cuu Ɓǝ'nyah Masǝŋ nyi we, ru joŋ yeɓ ne suŋ ne com daŋ mor ka ru gaɓ koo dǝɓ vaŋno kǝsyil ɓii ka.
10 Awe gak joŋ syedowal tǝ ɓǝ ɓuuru, Masǝŋ ye pa syedowal ah ta: syel ɓuu ru syee kǝsyil ɓii za ma iŋ ah a pǝsãhe, a njaŋ, a bai ɓǝɓe'. 11 Awe tǝ laŋ ɓe, ru joŋ wo koo zune kǝsyil ɓii tǝgbana pah wee moo joŋ mor wee ahe. 12 Aru lai we, ru swaa zahzyil nyi we, so aru cuu nyi we ka we syee pǝsãh tǝgbana Masǝŋ mo 'yahe, ako ye ɗii we ɓo ka we re Goŋ ah tǝkine yǝk ahe.
13 So aru joŋ osoko nyi Masǝŋ cẽecẽe mor ɓǝ maki ah faɗa. Mor ne cok ru ge cuu ɓǝ Masǝŋ nyi we, awe laa ɓǝ ahe, so we nyiŋ ɓǝ ah tǝgbana ɓǝ dǝfuu yo ya, amma we nyiŋ ɓǝ ah tǝgbana ɓǝ Masǝŋ mai mo goŋga 'manna. Mor ɓǝ faa Masǝŋ tǝ joŋ yeɓ pǝ zahzyil ɓii za ma iŋ ahe. 14 Wee pa ɓe, fan mai joŋ wo ɓii tǝgbana mai mo joŋ wo eklesia Masǝŋ mai mo no sǝr Yudea, mai ara ye mo za Yesu Kristu. Mor we laa bone jol za sǝr ɓiiri, foora mor ɓii tǝgbana za ma iŋ ma ŋhaa mo laara bone jol Yahuduen ta. 15 Ira Dǝɓlii Yesu pǝ wulli, tǝkine profetoen daŋ, foora mor ɓuu ta. Joŋra fan ma 'nyah suu Masǝŋ ya, syiŋra za ɓo ne lii ah daŋ! 16 Kyeɓra ka cak ru ka ru cuu ɓǝ ǝ̃ǝ nyi za mai mo ye ka Yahuduen a ka. Ne mai baara ŋhǝǝlaŋ faɓe' ɓǝǝ moo joŋra cẽecẽe cyõ ɓe. Kiita Masǝŋ lwaa ra lii ɓe ta.
Paulus 'yah ka ẽe za eklesia Tessalonika faɗa
17 Wee pa ɓuuru, daga ne cok mai ru woŋ ki ne we nje - ru woŋ ki ne we pǝ ɓǝ foo ya, amma suu ye woŋ ɓo to - ru ne koŋ ɓiiri, ru kyeɓ fahlii ka ga ẽe we faɗa. 18 Ru 'yah ka ga wo ɓiiri, ame Paulus me kyeɓ fahlii ka ga wo ɓii ɓo ɓal pǝpãa ɓe, amma Satan a cak fahlii ahe. 19 Awe - me cuu za ki ya - awe ye fan byak ɓuuru, ɓǝ 'nyah ɓuu ne fan ma cuu kacella ɓuu mai ruu gak yii suu ɓuu ne pel Dǝɓlii Yesu ne cok gin ahe. 20 Oho, awe ye yǝk ɓuu ne ɓǝ 'nyah ɓuuru.
© Bible Moundang © Alliance Biblique du Tchad, 1996.
