Masǝŋ ga ŋgoŋ kiita tǝ cok zyii dah Fǝnikia
1 Ɓǝ ma faa tǝ sǝr Tirus a naiko:
Awe za ma kyãh tǝ mabii malii ne dahe, we yeyee, mor cok zyii dah yaŋ ɓii sǝr Tirus ɓeɓ ɓe, yaŋ ah ra tǝkine cok zyii dah ah daŋ ɓeɓ tǝɗe' ɓe. Ɓǝ ah a tǝgbana mai we laa ka we no pǝ sǝr Kiprus ba ko. 2 Awe za ma joŋ fillu sǝr Sidon, we dahgorre. 3 Awe pee za syee tǝ mabii ka ga lea fan tǝkine lea sor sǝr Egiɓ, tǝkine ren luma ne za sǝr camcam daŋ.
4 Yaŋ Sidon, swãa mo re mo, mor mabii malii faa: Me bem wee ɗǝ ya, me wol wee mawǝǝ wala wee maŋwǝǝ taa ya syaŋsyaŋ.
5 Ne cok za sǝr Egiɓ mo laara ŋ sǝr Tirus ɓeɓ ɓe, suu ga coora tǝ ɓǝ ah coo.
6 Awe za Fǝnikia we yeyee, we ɗuu ka ga sǝr Espania! 7 Yaŋ sǝr Tirus ma'nyah lii mo yea pǝtãa ɓaaɓe kŋ ye nyẽe mgbaŋ ne? Yaŋ mai mo yea tǝ pee za syee tǝ mabii ga nyiŋ sǝr maki ah ciŋ mǝ ah kŋ ye mgbaŋ ne? 8 Azu ye zyeɓ ɓǝ mai ka ɓaŋ ɓeɓ gin tǝ Tirus yaŋ goŋ malii mai za goŋ ah ra mo ne tǝɗii pǝyǝk kal za sǝr daŋ ne? 9 Dǝɓlii ma ne swah daŋ ye zyeɓ ɓǝ ahe, zyeɓ ɓǝ ah nai mor ka vǝr ɓǝ yii suu ne fan manyeeki ah moo joŋra, so ka tǝr yǝk za ɓǝǝ maluu ah ra.
10 Awe za Tirus mai we kaa ɓo pǝ sǝr Espania, we gyo, we pǝǝ 'wah ɓii o! Amma dǝɓ ma gak byak we kǝka. 11 Mor Dǝɓlii tǝ ŋgoŋ kiita tǝ za ma kaa kah mabii tǝkine za goŋ ma wo sǝr daŋ, joŋ ka cok Fǝnikien mai moo joŋra fillu gŋ pǝlli daŋ mo ɓeɓɓe. 12 Yaŋ Sidon, fan mai moo laa pǝ'nyah ne daŋ pee ɓe. Za ɓo tǝ laara bone zǝzǝ̃ǝko, koo mo ɗuura kal ge sǝr Kiprus laŋ, ka ga lwaara kaa jam ya.
13 Za sǝr Babilon ye soɓra fan cok ge ɓeɓ sǝr Tirus, za Asiria ye ka. Za sǝr Babilon ye ge ryaŋra zah ɓǝǝra, hahra ɓaale Tirus ge sǝŋ, joŋra yaŋ ah ciŋ gboŋni .
14 Awe za ma ǝǝ dah tǝ mabii malii, we yeyee! Mor yaŋ malii mai we gbǝ yǝk ah ɓo ɓeɓ ɓe.
15 Zah'nan ah no ginni, ne cok ah a ga yaŋra sǝr Tirus syii jemma rǝŋ, ɓǝ ah ga joŋ tǝgbana zah'nan kal goŋ moo kaa wo sǝr daga byaŋ ah so syii ah moo vǝrri. Ne cok syii ah mo vǝr ɓe, Tirus ga yea tǝgbana matǝkoi mo tǝ ɗǝǝ lǝŋ ɓe, moo faa: 16 Amo matǝkoi mai za mo yaŋ mo ɓo, mo ɓaŋ tǝnjuŋ ɓo, mo ge kyãh tǝgǝǝ yaŋ ka mo ɗǝǝ lǝŋ ɓo ra kŋ ge zah ah faɗa, ka mo joŋ za 'yah ɓo mo foora ɓǝ ɓo kpǝ.
17 Ne cok syii jemma rǝŋ mo vǝr ɓe, Dǝɓlii ga soɓ sǝr Tirus ka joŋ yeɓ ɓe' ah matãa mai mo yea tǝ joŋ kǝpelle, a ga joŋ tǝkoi ne za goŋ wo sǝr daŋ. 18 Lak mai mo joŋko fillu lwaa ne ko, a ga ciŋ mǝ Dǝɓlii. Ka ga kan lak ah cok ki ya, amma za mai moo syeera mor Dǝɓlii a ga leara farel tǝkine mbǝro mai ara mo ne 'yah ah ne lak ahe.
© Bible Moundang © Alliance Biblique du Tchad, 1996.
