Juupel matǝ goŋga
1 Lǝŋ Asaf.
Dǝɓlii Masǝŋ mayǝk tǝ ɗii za sǝr daŋ, daga morcom zah'nan ne morcomlil, ka faa ɓǝ nyi ra.
2 Masǝŋ kaa ɓo yaŋ Sion masãhe, tǝ sǝǝ gŋ ginni.
3 Masǝŋ man tǝ ginni, amma ka tǝ gin ne zahtǝmgbuu ya,
Cii wii mai mo tǝ syen tǝ cii pel ahe,
Zyak mǝǝzuwuŋ tǝ kuu kah ahe.
4 Masǝŋ tǝ ɗii coksǝŋ ne sǝr ka mo yeara na syedowal ahe,
Ka mo ẽera ko ne ŋgoŋ kiita tǝ zan ahe.
5 Faa: We tai za ɓe matǝ njaŋ ah mai mo gbǝra zah ɓo ne me ne joŋ syiŋ ge wo ɓe.
6 Coksǝŋ tǝ cuuni: Masǝŋ a njaŋ, ako ye lakaali.
7 Za ɓe, we laa, me tǝ ga faa ɓǝ nyi we za Israel,
Ame ye Masǝŋ ɓiiri.
8 Me ka lai we tǝ ɓǝ joŋ syiŋ mai wee joŋ tǝkine cwah fan wo ɓe ya.
9 Amma me ka tǝ 'yah ŋgǝǝri ɓii tǝkine kǝdai ɓii ra ya.
10 Mor nǝǝ cok daŋ ma ɓe yo,
Faɓal ma yaŋ daŋ ma ɓe ye ta.
11 Juu tǝkine fan ma ne cee wo sǝr daŋ ma ɓe yo.
12 Koo koŋ mo i me ɓo laŋ, me ka yee nyi we ya,
Mor sǝr tǝkine fan mai mo gŋ daŋ ma ɓe yo.
13 Ame ren nǝǝ ŋgǝǝri no ne?
Me zwan syim kǝdai no ne?
14 We tǝ 'yah joŋ syiŋ wo Masǝŋ ɓe,
We joŋ osoko nyi ko tǝkine nyi fan mai we faa ɓǝ ah ɓo ka nyi nyi ko.
15 We ɗii me ne cok mai gaɓ mo lwaa we,
Me ga ǝ̃ǝ we, so we ga joŋ osoko nyi me.
16 Amma Masǝŋ faa nyi dǝɓ ɓe':
Amo kee ɓǝ lai ɓe mor fẽene?
Amo faa ɓǝ tǝ ɓǝ gbanzah ɓe mor fẽene?
17 Mo ka tǝ zyii ka me lai mo ya,
Mo soɓ ɓǝ lai ɓe ɓoo ge lalle.
18 Ne cok mo kwo dǝɓ nyin ɓe, mo gban bai ne ki,
Mo gban zah ne za ma joŋ ɓǝǝre.
19 Cẽecẽe mo 'yah faa ɓǝ maɓe' ahe,
Mo ka cak tǝkpuuzah ɓo ne gwah ber a.
20 Cẽecẽe mo kyeɓ ka faa ɓǝɓe' tǝ naa pa ɓo ra,
Ka mo lwaa ɓǝɓe' tǝtǝl ɓǝǝ ne ko.
21 Amo joŋ fan mai daŋ naiko,
Ame faa ɓǝ ki ya,
So mo lǝŋ ame tǝgbana mo.
Amma zǝzǝ̃ǝko me ga lai mo,
Me ga cuu ɓǝɓe' ɓo nyi mo caŋryaŋ.
22 Awe za mai we ka tǝ foo ɓǝ ɓe ya, we laa ɓǝ maino.
Nai ya ɓe, me ga muŋ we, dǝɓ ma ǝ̃ǝ we ka ga yea ya.
23 Dǝɓ mo tǝ joŋ syiŋ osoko wo ɓe ɓe, ka tǝ yii me.
Me ga ǝ̃ǝ za mai mo tǝ laara zah ɓe daŋ.
© Bible Moundang © Alliance Biblique du Tchad, 1996.
