1 Goŋ Salomo tǝŋ mor vuu yaŋ Dǝɓlii yaŋ Jerusalem tǝ waa Moria, pǝ cok mai Dǝɓlii mo cuu suu ah nyi goŋ David pah Salomo gŋ ɓaaɓe. Ne cok ah David nǝǝ cok ah so zyeɓ cok mai Araona Jebusiyo mo yea tǝ ɗuu sor gŋ. 2 Yaŋ Masǝŋ tǝŋ vuu ne patǝ gwa fĩi pǝzyil syii nai ah Salomo mo kaa goŋ ɓo. 3 Yaŋ Masǝŋ mai goŋ Salomo mo vuu, wah ah meetǝr jemma sai, 'ah ah meetǝr jemma. 4 Zahpel ah ma ga nǝfah kǝɓǝr yaŋ wah ah meetǝr jemma, tǝgbana 'ah yaŋ ah ta. Giŋ ah ma ga sǝŋ a meetǝr jemma yea. Zyeɓ ɓǝr yaŋ ah ne vãm kaŋnyeeri masãh ahe. 5 Lǝǝ kpuu bah ɓǝr yaŋ ahe, so syee vãm kaŋnyeeri masãh ah ge tǝl ahe, so ɗea foto kpuu dabonooje gŋ tǝkine foto gǝǝnyiŋ. 6 Goŋ ŋwǝǝ suu yaŋ Masǝŋ ne tǝsal masãh lii ahe, tǝkine vãm kaŋnyeeri mai mo gee sǝr Parvaim ge. 7 Syee vãm kaŋnyeeri ge wo suu yaŋ Masǝŋ, ne wo kpuu zahfah ra, ne kah zahfah tǝkine wo zahfah daŋ. Za joŋ yeɓ so ɗeara foto cerubim wo suu yaŋ Masǝŋ. 8 Ɗiira pedǝǝ yaŋ ah ne cok matǝdaŋdaŋ tǝɗe', wah ah meetǝr jemma, 'ah ah meetǝr jemma tǝgbana wah ah ta. Vãm kaŋnyeeri mai mo syee ge wo suu yaŋ pǝ cok matǝdaŋdaŋ tǝɗe', a nǝn ton jemma gwa tǝtǝl dappe. 9 Vãm kaŋnyeeri ma joŋ guu ne to a tǝgbana raita kilo, wo suu ɓǝr yaŋ tǝ yaŋ sǝŋ ah ra laŋ syee vãm kaŋnyeeri ge ɓo gŋ ta.
10 Goŋ faa nyi za yeɓ ah mo coora cerubim gwa ne vãmme, so syee vãm kaŋnyeeri ge wol ahe, so woora ge rǝk pǝ cok matǝdaŋdaŋ tǝɗe'. 11 Yee cerubim ah ra gwa daŋ wah ah meetǝr jemma, yee cerubim patǝ vaŋno ah i meetǝr gwa ne raita, ge juu wo suu yaŋ ɓo, yee ah maki ah laŋ wah ah meetǝr gwa ne raita ta, ge juu yee cerubim patǝ gwa ah ɓo. 12 Yee cerubim patǝ gwa ah wah ah meetǝr gwa ne raita, ge juu wo suu yaŋ ɓo ta, yee ah ma kǝki ah laŋ wah ah meetǝr gwa ne raita ta, so yee ah ma kǝki ah ge zyaŋ ki ne mǝ cerubim patǝ vaŋno ahe. 13 Yee cerubim rai syel ge ɓo lalle, daŋ ah a meetǝr jemma, cerubim ah uura ɓo ne ɓalle, jinra zahpel ɓoo ge ɓo wo yaŋ. 14 Zyeɓ godel ma cee ɓǝr ah ne zyim marwãhe, ŋwǝǝ ɓo ne ma kǝrãhmo, mafuu tǝ it-it ne masyẽ tǝ nyaknyak, joŋra foto cerubim ɓo wol ahe.
Wǝǝdǝǝ vãm syẽ gwa
(1 ZaG 7:15-22)15 Goŋ zyeɓ wǝǝdǝǝ maluu ah gwa, wah ah ra meetǝr jemma tǝtǝl rǝŋ, woora syii zahpel yaŋ Masǝŋ, tǝtǝl wǝǝdǝǝ vaŋno ah mo zyeɓra ɓo, wah ah meetǝr gwa ne raita. 16 So kaŋ fan na gǝǝnyiŋ tǝgbana mai mo pǝ cok matǝdaŋdaŋ kŋ, kan ge tǝtǝl wǝǝdǝǝ ah ra sǝŋ, so joŋ foto fan na lee kpuu ma ɗii ne grenadin temere, so rao ge wo gǝǝnyiŋ. 17 So syii wǝǝdǝǝ ah ra zah yaŋ Masǝŋ. Maki ah nǝjokǝsãhe, maki ah nǝjokǝlǝɓai, a ɗii ma nejokǝsãh ne Jakin, a ɗii ma nejokǝlǝɓai ne Boas.
© Bible Moundang © Alliance Biblique du Tchad, 1996.
