Baruk kee ɗerewol macẽe ah yaŋ Masǝŋ
1 Ne syii patǝ nai ah Jojakim we Josias mo kaa goŋ sǝr Yuda ɓo, Dǝɓlii faa ɓǝ nyi Jeremias, faa: 2 Mo ɓaŋ ɗerewol macẽe ahe, ka mo ŋwǝǝ ɓǝ mai me faa nyi mo tǝtǝl za Israel ne za Yuda tǝkine tǝtǝl za daŋ ge gŋ. Mo ŋwǝǝ ɓǝ fan mai me faa nyi mo kǝpel ne cok mai ka Josias ye kaa goŋ ɓo, ŋhaa ge dai tǝ'nahko. 3 Ɗah maki za Yuda mo laara ɓǝ ɓeɓ mai me zyeɓ ɓo ka pee gin tǝ ɓǝǝ ɓe, a ga soɓra fahlii ɓe' ɓǝǝ no ne. Nai ɓe, me ga rwah ɓǝɓe' ɓǝǝ ne faɓe' ɓǝǝ ga lalle.
4 So Jeremias ɗii Baruk we Neriija, kee ɓǝ mai daŋ Dǝɓlii mo faa nyi ko nyi Baruk, so Baruk ŋwǝǝ ɓǝ ah daŋ ge pǝ ɗerewol macẽe ahe. 5 Jeremias so faa nyi Baruk: Me ka ga yaŋ Masǝŋ ya. 6 Amma me 'yah mo ge gŋ ne zah'nan mai za mo tǝ syẽe fanne, ka mo kee ɗerewol macẽe ah gŋ ge sǝŋ ne kyaŋ pǝ'manne, ka mo laara ɓǝ mai daŋ Dǝɓlii mo faa nyi me, me so kee ɓǝ ah ɓo nyi mo, so mo ŋwǝǝ ɓo. Mo joŋ nai ka koo zune daŋ mo laa, tǝkine za sǝr Yuda mai mo urra gin yaŋ ɓǝǝ camcam mo ge ɓo gŋ daŋ. 7 Ɗah maki a ga piira soo ge wo Dǝɓlii a soɓra fahlii ɓe' ɓǝǝ no ne? Mor zahzyil ɓeɓ Dǝɓlii ɓaŋ kpãh ɓo tǝ zai pǝ'manne. 8 So Baruk kal ge kee ɓǝ faa Dǝɓlii pǝ yaŋ Masǝŋ tǝgbana mai Jeremias mo faa nyi ko.
9 Ne syii patǝ dappe ah Jojakim we Josias mo kaa goŋ sǝr Yuda ɓo, pǝzyil fĩi doraŋ ah za laira ɓǝ ka syẽe fan kyeɓ 'yah Dǝɓlii ne ko. Za ma yaŋ Jerusalem ne za mai mo gera gin yaŋ ma pǝ sǝr Yuda daŋ ge ɓo, syẽera fanne. 10 Za daŋ laara ɓǝ mai Baruk mo kee pǝ ɗerewol macẽe ahe, ɓǝ mai Jeremias mo faa daŋ, kee pǝ yaŋ Masǝŋ ɓǝr yaŋ Gemaria we Safan, pa ŋwǝǝ fanne, ɓǝr yaŋ ma sǝŋ ah gwari ne zahfah Mafuu ma dan ga yaŋ Masǝŋ.
Baruk kee ɗerewol macẽe ah pel zaluuri
11 Mika we Gemaria we Safan laa ɓǝ mai Baruk mo kee pǝ ɗerewol macẽe ah Dǝɓlii mo faa ɓo. 12 So ur kal ge yaŋ goŋ dan ge ɓǝr yaŋ pa ŋwǝǝ fan goŋe, ka zaluu daŋ taira ɓo gŋ: Elisama pa ŋwǝǝ fan goŋe, Delaja we Semaja, Elnatan we Akbor, Gemaria we Safan, Sedekias we Hanania tǝkine zaluu manyeeki ah daŋ. 13 Mika kee ɓǝ mai mo laa Baruk mo kee nyi za daŋ nyi ra. 14 So zaluu peera Jehudi we Netania we Selemia we Kusi, ge wo Baruk, ka faa nyi ko mo ɓaŋko ɗerewol macẽe ah mai mo keeko nyi za ge ne ko. So Baruk ɓaŋ ɗerewol ah kal ge wo ɓǝǝ ne ko. 15 Faara nyi ko: Mo kaa ge sǝŋ o, ka mo kee ɗerewol macẽe ah nyi ru. Baruk so kee nyi ra. 16 Fahfal mo kee ɓǝ ah daŋ nyi ra, woora nahnǝn ẽera ki ne galle, faara nyi Baruk: Sai ru ga kee ɓǝ ah nyi goŋ ɗǝ. 17 So fiira ko faa: Mo faa nyi ru ɗǝ, mo ŋwǝǝ ɓǝ mai daŋ ɗǝne? Jeremias ye faa ɓǝ ah nyi mo ne? 18 Baruk zyii zah ɓǝǝ faa: Jeremias ye kee ɓǝ ah nyi me, ko me ŋwǝǝ ɓǝ ah ge pǝ ɗerewol macẽe ah mai ne aŋkǝr. 19 So faara nyi ko: Amo ne Jeremias gwa daŋ we ge muŋ suu ɓiiri, we soɓ za mo tǝra cok ɓii ka.
Goŋ ɓoo wii nyi ɗerewol macẽe ahe
20 Zaluu kanra ɗerewol macẽe ah yaŋ Elisama pa ŋwǝǝ fanne, so urra kal ge zah yaŋ goŋe, ge keera ɓǝ mai mo laara daŋ nyi goŋe. 21 Goŋ so pee Jehudi ka mo ge ɓaŋko ɗerewol ah ge ne ko. Jehudi ge ɓaŋ ɗerewol macẽe ah yaŋ Elisama ge kee nyi goŋ tǝkine zaluu ah mo haira ɓo pel ah daŋ. 22 Ne cok ah ka gwahl o, goŋ ge kaa ɓo zahwii tǝ noo wii pǝ yaŋ goŋ ma kaa gŋ ne cok gwahlle. 23 Ne cok Jehudi mo kee ɗal ɗerewol ah gwa koo sai ɓe, goŋ a ŋgoŋ zah moo ne we nyah malaŋ ah ɓoo ga tǝ wii, joŋ ge naiko, ŋhaa syak ɗerewol macẽe ah ne wii vǝr tǝɗe'. 24 Amma goŋ ne zaluu ah mo laara ɓǝ mai mo ŋwǝǝ ɓo, ɗuura gal a, joŋra fan ma nǝn cuu ɗiira marvǝǝ ɓo laŋ ya. 25 Elnatan ne Delaja ne Gemaria pǝǝra goŋ ka mo ɓooko wii nyi ɗerewol macẽe ah ka, amma zyii laa ɓǝ faa ɓǝǝr a. 26 Goŋ so faa nyi yerima Jerameel ne Seraja we Azriel ne Selemia we Abdiel ka mo ge gbǝra Jeremias ne pa ŋwǝǝ fan ah Baruk ge ne ko. Amma Dǝɓlii woo ra muŋ zoŋ.
Jeremias ŋwǝǝ ɗerewol macẽe ah maki faɗa
27 Fahfal goŋ mo ɓoo wii nyi ɗerewol macẽe ah mai Jeremias mo kee nyi Baruk, Dǝɓlii faa nyi Jeremias, 28 mo ɓaŋko ɗerewol macẽe maki ahe, ka mo ŋwǝǝko ɓǝ mai daŋ mo pǝ ɗerewol macẽe ah ma kǝpel mai goŋ Jojakim mo syak wii ne ko. 29 Dǝɓlii faa nyi ko mo faako nyi goŋ Jojakim: Amo syak ɗerewol macẽe ah ne wii, amo fii Jeremias ŋ mor fẽe ŋwǝǝ goŋ Babilon gin ɓeɓ sǝr mai a ga ik dǝfuu ah ne faɓal daŋ pǝ wul ne? 30 Mor ahe, ame Dǝɓlii me tǝ faa nyi mo goŋ Jojakim, koo dǝɓ vaŋno kǝsyil morsǝ̃ǝ ɓo ka ga kaa goŋ ya, a ga kwakra wul ɓo ɓoo nǝn com nooko, ne suŋ laŋ mahm ga nǝn tǝl ahe. 31 Me ga ŋgoŋ kiita tǝ ɓo ne morsǝ̃ǝ ɓo tǝkine zaluu ɓo ra mor faɓe' mai daŋ we joŋni, me ga pee ɓeɓ ge tǝ ɓii ne za yaŋ Jerusalem tǝkine za sǝr Yuda daŋ, mor we zyii ka ɓaŋ syiŋ lai mai me lai we ya.
32 So Jeremias ɓaŋ ɗerewol macẽe maki ah nyi nyi pa ŋwǝǝ fan ah Baruk. So Baruk ŋwǝǝ ɓǝ mai daŋ Jeremias mo faa nyi ko, ŋwǝǝ ɓǝ mai daŋ mo pǝ ɗerewol ma kǝpel goŋ Jojakim mo syak ne wii. Jeremias so ɓoo ɓǝ ma na ɓǝ ah camcam ge gŋ.
© Bible Moundang © Alliance Biblique du Tchad, 1996.
