Goŋ Nebukanezar ge ryaŋ yaŋ Jerusalem
(2 KeeƁ 36:13-21Jer 52:3-11)1 Ne cok ka Sedekias kaa goŋ ɓo syii doraŋ, pǝ fĩi jemma ah ne zah'nan jemma, Nebukanezar goŋ Babilon ge ne za sal ah daŋ mor ka ruu sal ne yaŋ Jerusalem, ryaŋ yaŋ ah ne fan salle, vuura cok byak za ryaŋ yaŋ ah ne ko. 2 Ryaŋra yaŋ ah ne sal ŋhaa dai syii jemma tǝtǝl vaŋno mai Sedekias mo kaa goŋ ɓo ne ko. 3 Ne zah'nan doraŋ ma pǝ fĩi patǝ nai ahe, koŋ lee ɓǝr yaŋ ah pǝ'manne, farel ka dǝfuu mo re kǝkao. 4 So cera fahlii wo ɓaale yaŋ ahe. Za sal daŋ ɗuura pǝ̃ǝ tǝ fahlii ɓaale ah mo cera ɓo nǝfah kǝ pǝ 'wah goŋe. Amma ka Babilonien ryaŋra yaŋ ah ɓo. Goŋ ne zan ah ɓaŋra fahlii ma ga fah kǝsyicokki. 5 So za sal Babilonien foora mor goŋ kalle, ge lwaara ko kǝsyicok Jeriko. Za sal ah daŋ ɗuura kalle, soɓra ko syak ahe. 6 Gbǝra goŋ kal ge nyi goŋ Babilon ne yaŋ Ribla, ge ŋgoŋra kiita tǝl ah gŋ. 7 Gbahra wee Sedekias ŋgom ge lal ne nahnǝn ahe. So nǝǝra nahnǝn Sedekias ge lal gwa daŋ, kalra ge sǝr Babilon ne ki.
Woora za Yuda gin sǝr ɓǝǝ kal ne ko
(Jer 52:12-33)8 Pǝ fĩi dappe ne zah'nan rǝŋ ahe, ka Nebukanezar goŋ sǝr Babilon kaa goŋ ɓo syii jemma tǝtǝl doraŋ, Nebusaradan dǝɓlii za byak goŋ Babilon ge yaŋ Jerusalem ne ko. 9 Ɓoo wii nyi yaŋ Masǝŋ ne yaŋ goŋ daŋ, ɓoo wii nyi yaŋ Jerusalem ne lii ah daŋ. Ɓaa wii nyi yaŋ maluu ah mo vuura ɓo daŋ. 10 Za sal ah dahra ɓaale mai mo ryaŋ yaŋ Jerusalem ɓo ge sǝŋ. 11 Tǝcoŋ za mai mo coŋra ɓo ɓǝr yaŋ ahe, ne za mai mo tǝ 'yahra ka ga Babilon ne suu ɓǝǝra, Nebusaradan woo ra kal ge sǝr Babilon ne ko. 12 Amma soɓ za masyak ah mo pǝ sǝr ah fahfalle, ara ye za ma pǝǝ sor tǝkine pea kpuu vin.
13 Amma Babilonien dahra waddǝǝ kpuu sǝŋ ma vãm syẽ mai mo ɓǝr yaŋ Dǝɓlii, ne cok ma kan fan tǝl ahe, ne Mabii mai mo zyeɓra vãm syẽ mo kan ɓo ɓǝr yaŋ Dǝɓlii ne ko ge lalle, woora vãm ah kal ge Babilon ne ko. 14 Woora ciiri, fan woo cokki, nyahe, ne tahsah tǝkine fan ma vãm syẽ mo mor ka joŋ yeɓ daŋ kal ne ko. 15 Woora tǝkpelzaŋraŋ ne tahsah ne fan ma vãm kaŋnyeeri ne ma vãm solai ah ra kal ne daŋ. 16 Wǝǝdǝǝ kpuusǝŋ matǝ gwa ne Mabii kŋ tǝkine cok ma kan fan mai Salomo mo zyeɓ mor yaŋ Masǝŋ, yǝk fan ma joŋ ne vãm syẽ marai dǝɓ ka gak lii ya. 17 Wah waddǝǝ kpuusǝŋ ah vaŋno ah i jol jemma tǝtǝl nama. Tǝtǝl ma vãm syẽ ah mai mo tǝtǝl ahe, wah ah i jol sai. Fan matǝ gǝrlǝŋ gǝrlǝŋ tǝgbana lee fan a wo tǝtǝl ah ne lii ah daŋ. Mai daŋ a ne vãm syẽ. Waddǝǝ kpuusǝŋ maki ah laŋ kaŋra fan ɓo wol ah nai ta.
18 So Nebusaradan ɓaŋ pa joŋzahsyiŋ Seraja ne Zefanias pa joŋzahsyiŋ ma fahfal ahe, tǝkine za ma byak zahfah sai rǝkki. 19 So kal ge tǝgǝǝ yaŋ, ge gbǝ dǝɓlii za salle, ne zaluu dappe kǝsyil za ma pel goŋ mo yaŋ ahe, ne pa ma ŋwǝǝ fan nyi dǝɓlii sal mai moo ɓaŋ za sǝr ah ga pǝ sooje, tǝkine za jemma yea mai mo lwaa ra yaŋ Jerusalem. 20 Nebusaradan woo ra kal ge nyi goŋ Babilon ne yaŋ Ribla daŋ. 21 Goŋ Babilon loɓ ra, ik ra ge lal pǝ wul yaŋ Ribla pǝ sǝr Hamat.
Woora za Yuda gin sǝr ɓǝǝ kal ne naiko.
Tǝcoŋ za ki ɗuura kal ge sǝr Egiɓ
(Jer 40:7-9Jer 41:1-3)22 Nebukanezar goŋ Babilon ɓaŋ Gedalia we Ahikam we Safan kan dǝɓlii ne tǝ za mai mo soɓra ɓo fahfal sǝr Yuda. 23 Ne cok zaluu sooje ne sooje ɓǝǝ mo laara goŋ Babilon ɓaŋ Gedalia kan dǝɓlii ɓo ne ko, gera wo Gedalia Mispa. Zan ah ye Ismael we Netania ne Johanan we Kareak ne Seraja we Tanhumet ma Netofa tǝkine Jazania ma Maaka, ara tǝkine za ɓǝǝ daŋ. 24 Gedalia haa zah nyi zaluu sooje ne sooje ɓǝǝ faa: We ɗuu gal zaluu sǝr Babilon ka, we kaa pǝ sǝr ah o, we joŋ yeɓ mor goŋ Babilon, mo nai ɓe, we ga kaa jam.
25 Amma pǝzyil fĩi patǝ rǝŋ ahe, Ismael we Netania we Elisama dǝɓ morsǝ̃ǝ goŋ yo, ge ne za jemma, ge ira Gedalia ne Yahuduen ne Babilonien mai mo ne ki daŋ ge lal pǝ wul Mispa. 26 So za urra ne pãa ɓǝǝ daŋ, zaluu ne wee nyee daŋ ɗuura ne zaluu sooje daŋ kalra ge sǝr Egiɓ, mor ɗuura gal Babilonien.
Jojakin lwaa tǝtǝl suu ah tǝkine yǝk sǝr Babilon
(Jer 52:31-34)27 Ne syii jemma sai tǝtǝl rǝŋ ah fahfal mo gbǝra Jojakin goŋ Yuda kal ge ɓo pǝ byak ne ko, pǝzyil fĩi jemma tǝtǝl gwa ah ne zah'nan jemma gwa tǝtǝl rǝŋ ahe, Evil-Marduk goŋ sǝr Babilon wǝǝ Jojakin gin pǝ daŋgai ne ɓoo. Syii ah mai mo kaa goŋ ɓo ne yo. 28 Faa ɓǝ 'nyah nyi Jojakin kan ko pǝ cok yǝk ma kal za goŋ mai mo ne ki sǝr Babilon daŋ. 29 Jojakin wǝǝ mbǝro daŋgai mo wol ah ge lalle. Pǝ zah'nan kal ah mo kaa ɓo wo sǝr daŋ a ren farel ne goŋe. 30 Fan mai ako mo ne 'yah ah pǝ zah'nan kal ah daŋ, goŋ nyi nyi ko.
© Bible Moundang © Alliance Biblique du Tchad, 1996.
